Imran Khan Attacked:
প্ৰতিবেশী ৰাষ্ট্ৰ পাকিস্তানত সংঘটিত হৈছে এক ভয়ংকৰ ঘটনা । প্ৰাক্তন প্ৰধানমন্ত্ৰী ইমৰান খানৰ ৰেলীত অচিনাক্ত দুৰ্বৃত্তৰ গুলীচালনা ৷ গুলীচালনাত ইমৰান খানকে ধৰি কমেও ৪ জন লোক আহত হোৱাৰ বিপৰীতে নিহত হয় এজন ৷
বৃহস্পতিবাৰে পাকিস্তানৰ প্ৰাক্তন প্ৰধানমন্ত্ৰী তথা তেহৰিক-ই-ইনচাফৰ মুৰব্বী জনে ৱাজিৰাবাদত এখন প্ৰচাৰ ট্ৰাকত গৈ থকা সময়তে অচিনাক্ত বন্দুকধাৰীয়ে তেওঁলৈ লক্ষ্য কৰি গুলীচালনা কৰে ৷ ফলত তেওঁৰ ভৰিত সামান্য
আঘাত প্ৰাপ্ত হয় আৰু তেওঁৰ এজন সমৰ্থক নিহত হোৱাৰ বিপৰীতে আহত হয় চাৰিজনকৈ দলীয় কৰ্মকৰ্তা ৷
অৱশ্যে বন্দুকধাৰী জনক দলীয় কৰ্মীয়ে লগে লগে কৰায়ত্ব কৰে ৷ পিছতে আৰক্ষীয়ে গ্ৰেপ্তাৰ কৰা বন্দুকধাৰীজনৰ পৰিচয় তাৎক্ষণিকভাৱে জনা নাযায়। আনহাতে কোনো গোটেও গুলীচালনাৰ দায়িত্ব স্বীকাৰ কৰা নাই ।
এই আক্ৰমণে ২২৫ নিযুত লোকৰ বিশাল জনসংখ্যাৰ পাৰমাণৱিক সশস্ত্ৰ ৰাষ্ট্ৰ পাকিস্তানত বৰ্ধিত ৰাজনৈতিক অস্থিৰতাৰ বিষয়ে নতুন উদ্বেগ সৃষ্টি কৰে ।
এপ্ৰিলত সংসদত অনাস্থা ভোটত পৰাভূত হোৱাৰ পিছৰে পৰা খানে সমগ্ৰ দেশজুৰি গণ সমদলৰ কাৰ্যসূচী ৰূপায়ণ কৰিছে ৷ য’ত খানে প্ৰধানমন্ত্ৰী শ্বাহবাজ শ্বৰীফ আৰু আমেৰিকা যুক্তৰাষ্ট্ৰৰ এইয়া গোপন ষড়যন্ত্ৰ বুলি দাবী কৰাৰ বিপৰীতে পাক প্ৰধানমন্ত্ৰী শ্বৰিফ আৰু ৱাশ্বিংটনে এনে অভিযোগ অস্বীকাৰ কৰিছে।
উল্লেখ্য যে পাকিস্তানৰ ৰাজনৈতিক হত্যাৰ এক দশকজোৰা ইতিহাস আছে৷ যাৰ ভিতৰত আছে ২০০৭ চনত মুছলমান প্ৰধান দেশখনৰ প্ৰথম গণতান্ত্ৰিকভাৱে নিৰ্বাচিত মহিলা প্ৰধানমন্ত্ৰী বেনৰ্জী ভুট্টো। ভুট্টোক আত্মঘাতী বোমাৰুৰ দ্বাৰা হত্যা কৰা হৈছিল ৷
এই আক্ৰমণটো পূব পঞ্জাৱ প্ৰদেশৰ ৱাজিৰাবাদ জিলাত সংঘটিত হৈছিল য’ত প্ৰাক্তন ক্ৰিকেট তাৰকা- ৰাজনীতিবিদ জনে ৰাজধানী ইছলামাবাদ অভিমুখে ট্ৰাক আৰু গাড়ীৰ এটা ডাঙৰ কনভয়ৰে সমদল কৰি গৈ আছিল ৷ এই সমদলৰ জৰিয়তে খানৰ বিশেষ উদ্দেশ্যনিহিত হৈ আছে ৷ প্ৰধানমন্ত্ৰী শ্বৰিফ চৰকাৰক আগতীয়া নিৰ্বাচন অনুষ্ঠিত কৰিবলৈ বাধ্য কৰা।
স্মতৰ্ৱ্য যে গুলীচালনাত আহতসকলৰ ভিতৰত তেহৰিক-ই-ইনচাফৰ এজন আইন উপদেষ্টা ফৈজল জাভেদে এক বিবৃতিত কয়, ইমৰান খানৰ ইছলামাবাদলৈ বলক’ শীৰ্ষক প্ৰতিবাদী সমদল বন্ধ নহ’ব। এই ঘটনাই আমাৰ লক্ষ্যক আৰু মজবুত কৰিলে ৷
তেহৰিক-ই-ইনচাফৰ জ্যেষ্ঠ নেতা ফাৱাদ চৌধুৰীয়ে খানৰ ট্ৰাকৰ চাৰিওফালে থকা সমৰ্থকসকলক কৈছিল যে এই আক্ৰমণ দেশৰ প্ৰাক্তন প্ৰধানমন্ত্ৰীৰ জীৱন শেষ কৰাৰ এক প্ৰয়াস আছিল ।
আনহাতে ৱাজিৰাবাদ জিলা আৰক্ষী বিষয়া গজানফাৰ আলীয়ে কৈছিল যে আক্ৰমণটোত এজন লোক নিহত হৈছিল আৰু আন নজন আহত হৈছিল। প্ৰাক্তন প্ৰধানমন্ত্ৰী গৰাকীৰ সোঁ ভৰিত গুলী লগাৰ পিছতে লাহোৰৰ এখন চিকিৎসালয়ত ভৰ্তি কৰা হয় ৷ চিকিৎসকে তেওঁক বিপদমুক্ত বুলি সদৰি কৰে ৷ তদুপৰি তেওঁক ভৰিত বেণ্ডেজ কৰি জিৰণি লোৱাৰ পৰামৰ্শ দিয়ে চিকিৎসকে ৷
ইপিনে পাক গৃহমন্ত্ৰী ৰাণা ছানাউল্লাহ খানে এই আক্ৰমণক গৰিহণা দিয়ে। পাক চৰকাৰে ঘটনাটোৰ তদন্তৰ নিৰ্দেশ দিছে।
শেহতীয়া খবৰ মতে এই ঘটনাৰ পিছতে ইমৰান খানে ৰাজধানীলৈ যাত্ৰা কৰাৰ পৰিকল্পনাৰ পৰা আঁতৰি আহিবলৈ অস্বীকাৰ কৰিছে। ইপিনে পাক সামৰিক বাহিনীয়ে কৈছে যে যদিও খানৰ ইছলামাবাদত এক ৰেলী অনুষ্ঠিত কৰাৰ গণতান্ত্ৰিক অধিকাৰ আছে ৷
থিক একেদৰে কাকো দেশখন অস্থিৰ কৰিবলৈ অনুমতি দিয়া নহ’ব। ইছলামাবাদৰ কৰ্তৃপক্ষই ইতিমধ্যে যিকোনো সংঘৰ্ষ বা হিংসা প্ৰতিহত কৰিবলৈ চহৰখনৰ চাৰিওফালে অতিৰিক্ত নিৰাপত্তা মোতায়েন কৰিছে।
হাজাৰ হাজাৰ সমৰ্থকৰ সৈতে পাঞ্জাৱ প্ৰদেশৰ ৰাজধানী লাহোৰৰ পৰা খানে যাত্ৰা আৰম্ভ কৰাৰ এসপ্তাহৰো কম সময়ৰ পিছত এই আক্ৰমণটো সংঘটিত হয়।
খানৰ কনভয় ইছলামাবাদলৈ আগবাঢ়িব নে নাই সেয়া তাৎক্ষণিকভাৱে জনা নাযায়। ইয়াৰ পূৰ্বে তেহৰিক-ই-ইনচাফৰ জ্যেষ্ঠ নেতা ফাৱাদ চৌধুৰীয়ে কৈছিল যে তেওঁলোকে শুক্ৰবাৰে ইছলামাবাদত প্ৰৱেশ কৰাৰ পৰিকল্পনা কৰিছে।
ইছলামাবাদত আজি সন্ধিয়া শ্বৰীফ চৰকাৰে স্পষ্ট কৰি দিয়ে যে কোনো কাৰণে দেশত মধ্যৱৰ্তী নিৰ্বাচন নহয় ৷ পৰৱৰ্তী নিৰ্বাচন ২০২৩ চনত নিৰ্ধাৰিত সূচী অনুসৰি অনুষ্ঠিত হ’ব ।
মনকৰিবলগীয়া যে খানৰ প্ৰতি শেহতীয়া প্ৰত্যাহ্বান হিচাপে থিয় দিছে পাকিস্তানৰ নিৰ্বাচন আয়োগে ৷ আয়োগে তেওঁক বেআইনীভাৱে চৰকাৰী উপহাৰ বিক্ৰী কৰা আৰু আয়তকৈ অধিক সম্পত্তি আহৰণ কৰা আৰু চৰকাৰী ধন আত্মসাৎ কৰাৰ অভিযোগত পাঁচ বছৰৰ বাবে ৰাজহুৱা পদত অধিষ্ঠিত হোৱাৰ বাবে অযোগ্য ঘোষণা কৰিছিল।
অৱশ্যে ইমৰাণ খানে মুখ্য নিৰ্বাচন আয়ুক্ত চিকান্দাৰা ৰাজাৰ বিৰুদ্ধে গোচৰ ৰুজু কৰাৰ ভাবুকি দিয়াৰ নহয় আয়োগৰ সিদ্ধান্তৰ বিৰুদ্ধে ন্যায়ালয়ৰ দ্বাৰস্থ হৈছে ৷