Conflict in State Bjp:
লোকসভা নিৰ্বাচনলৈ মাজত মাত্ৰ কেইটামান মাহ থকা অৱস্থাত ৰাজ্যিক বিজেপিত ন-পুৰণি বিজেপিক লৈ সৃষ্টি হোৱা সংঘাতক লৈ অস্বস্তিত পৰিছে দিল্লীৰ নেতৃবৰ্গ ৷
আনকি ন- পুৰণি বিজেপি নেতাৰ যুঁজখন তীব্ৰতৰ হৈ উঠাত থৰকাছুটি হেৰুৱাইছে ৰাজ্যিক নেতৃত্ব ৷ আনহাতে শেহতীয়াকৈ সমষ্টি পুনৰ নিৰ্ধাৰণক লৈয়ো অসন্তুষ্টি প্ৰকাশ জ্যেষ্ঠ বিজেপি নেতাৰ ৷
আনহাতে ভূতৰ ওপৰত দানহ পৰাৰ দৰে শেহতীয়াকৈ বিজেপিৰ কিষান মৰ্চাৰ নেত্ৰী ইন্দ্ৰানী তহবিলদাৰ আত্মহত্যা ঘটনাৰ পাছতে চৰকাৰী চাকৰীৰ নিযুক্তিক লৈ ইতিমধ্যে পোহৰলৈ আহিছে ভয়ংকৰ কাণ্ড ৷
ৰাজ্যিক বিজেপিৰ বশিষ্টস্থ বাজপেয়ী ভৱনৰ পৰা চাকৰিৰ এখন ৰমৰমীয়া বেহা সংঘটিত কৰিছিল বিজেপিৰ কে’বা টাও শাখা সংগঠনৰ একাংশ নেতা- পালিনেতাই ৷
এছ আই কেলেংকাৰীত লিপ্ত হৈ পৰৱৰ্তী সময়ত জেলৰ ভাত খোৱা বহিস্কৃত বিজেপি নেতা দ্বিবন ডেকা পুনৰ সাঙোৰ খাইছে তৃতীয় আৰু চতুৰ্থ বৰ্গৰ নিযুক্তিত ৷
ইতিমধ্যে কিষান মৰ্চাৰ নেত্ৰী ইন্দ্ৰানী তহবিলদাৰ আত্মহত্যা ঘটনাৰ তদন্ত কৰিবলৈ গৈ আৰক্ষী বিচুৰ্ত্তি খাবলগীয়া হৈছে ৷কেনেকৈ চাকৰি দিয়াৰ নামত কে’বা গৰাকী বিজেপি নিম্ন পৰ্যায়ৰ নেতৃয়ে চাকৰি প্ৰাৰ্থীৰ পৰা সংগ্ৰহ কৰিছিল বহু লাখ টকা ৷
আৰক্ষীৰ জালত পৰা দ্বিবন ডেকাই শেহতীয়াকৈ জেৰাত সদৰি কৰা অনুসৰি ইতিমধ্যে তৃষ্ণা শৰ্মাসহ বহু কেইজনক আৰক্ষীয়ে গ্ৰেপ্তাৰ কৰাৰ পাছতে এইবাৰ পুঠিখলিহনাৰ সলনি জালত পৰাৰ সম্ভাৱনা আছে ৰৌ- বৰালী। শান্তনু পুজাৰীৰ দৰে জ্যেষ্ঠ নেতাৰ নাম সাঙোৰ খাইছে চাকৰি বজাৰৰ স’তে ৷ এনেবোৰ ঘটনাক্ৰমক লৈ তীব্ৰ অসন্তুষ্টি প্ৰকাশ কৰিছে বহু কেইগৰাকী পুৰণি নেতাই ৷
আনহাতে ন- পুৰণি বিজেপিৰ সংঘাত চলি থকাৰ মাজতে প্ৰাক্তন ৰাজ্যিক সভাপতি তথা প্ৰাক্তন কেন্দ্ৰীয় মন্ত্ৰী ৰাজেন গোঁহাই- এ কেবিনেট পদ ত্যাগ কৰে ৷
ইয়াৰ পূৰ্বে প্ৰাক্তন ৰাজ্যিক সভাপতি তথা পূব গুৱাহাটীৰ বিধায়ক সিদ্ধার্থ ভট্টাচার্যই মুকলিকৈ ৰাজ্যিক নেতৃত্বৰ বিৰুদ্ধে ক্ষোভ উজাৰে ৷ একেদৰে নলবাৰীৰ প্ৰাক্তন বিধায়ক অশোক শৰ্মা, মৰিগাঁৱৰ বিধায়ক ৰমাকান্ত দেউৰীয়েও মুকলিকৈ প্ৰদেশ বিজেপিৰ বিৰুদ্ধে সৰৱ হৈ পৰাৰ মাজতে মন্ত্ৰী জয়ন্তমল্ল বৰুৱাই সকলো শালীনতাৰ সীমা চেৰাই ৰাজেন গোঁহাইক ৰাজনীতি ত্যাগ কৰি নাতি- নাতিনীৰ স’তে সময় কটাবলৈ আহবান জনাই।
মন্ত্ৰী জয়ন্তৰ উৰ্ধতালিক সহজভাৱে নলৈ গোঁহাই- এ দিল্লীত সাক্ষাৎ কৰে গৃহমন্ত্ৰী অমিত শ্বাহক ৷ সাংবাদিকৰে হোৱা বাৰ্তালাপত চাৰিবাৰকৈ নগাঁৱৰ সাংসদ পদ শুৱনি কৰা গোঁহাই- এ কয়,গৃহমন্ত্ৰীয়ে জয়ন্তমল্ল কোন বুলি প্ৰশ্ন কৰি তেওঁক চিনি নোপোৱা বুলিহে প্ৰকাশ কৰে ৷ গৃহমন্ত্ৰীৰে তেওঁৰ সাক্ষাৎ ইতিবাচক বুলি মন্তব্য কৰি গোঁহাই-এ দলৰ হৈ কাম কৰি যোৱাৰ কথা সদৰি কৰে ৷
ন- পুৰণি বিজেপিৰ সংঘাতক লৈ শেহতীয়াকৈ দিল্লীৰ কেন্দ্ৰীয় নেতৃবৰ্গই গুৰুত্ব সহকাৰে লৈ দূত হিচাপে গুৱাহাটীলৈ প্ৰেৰণ কৰিছে বিজেপিৰ ৰাষ্ট্ৰীয় উপ-সভাপতি তথা অসমৰ নিৰ্বাচনৰ দলীয় পর্যবেক্ষক বৈজয়ন্ত পাণ্ডা ৷ দলৰ ৰাষ্ট্ৰীয় উপ-সভাপতি গৰাকীয়ে কইনাধৰা ৰাজ্যিক অতিথি শালাত ইতিমধ্যে মিলিত হয় কেইবাগৰাকী পুৰণি নেতাক ৷একেদৰে মিলিত হয় অসন্তুষ্ট বিধায়কৰে ৷
প্ৰাপ্ত খবৰ অনুসৰি ৰাজ্যিক বিজেপিত শেহতীয়াকৈ গা কৰি উঠা আভান্তৰিন কন্দলক লৈ চিন্তিত হৈ পৰিছে ৰাষ্ট্ৰীয় সভাপতি জে পি নাড্ডা ৷
নাড্ডাই সংগোপন ৰাজ্যিক বিজেপিৰ সকলো দিশৰ বুজ ল’বলৈ গুৱাহাটীলৈ পঠিয়াই বিজেপিৰ ৰাষ্ট্ৰীয় উপ-সভাপতি তথা অসমৰ নিৰ্বাচনৰ দলীয় পর্যবেক্ষক বৈজয়ন্ত পাণ্ডাক ৷
মঙলবাৰে বিজেপিৰ বেয়া দিনত সংগঠনক শক্তিশালী ৰূপ দিয়া দুই জ্যেষ্ঠ পুৰণি বিজেপি নেতা ৰাজেন গোঁহাই আৰু পূব গুৱাহাটীৰ বিধায়ক সিদ্ধাৰ্থ ভট্টাচাৰ্যৰে এক গোপন বৈঠকত মিলিত হয়বৈজয়ন্ত পাণ্ডা ৷পাণ্ডাই দুই নেতাৰে প্ৰায় এঘন্টা আলোচনা কৰে ৷
বৈঠকত কোনবোৰ বিষয় স্থান পায় এই সন্দৰ্ভত জানিব পৰা নাই যদিও আচৰিতজনকভাৱে উপস্থিত নাছিল ৰাজ্যিক বিজেপিৰ কোনো এজন নেতা ৷
অতি সংগোপনে অনুষ্ঠিত হয় ৰাজ্যিক বিজেপিৰ দুই প্ৰাক্তন সভাপতিৰে পাণ্ডাৰ বৈঠক ৷
মনকৰিবলগীয়া যে,ৰাজ্যত কংগ্ৰেছ শাসনৰ তিনিটা কাৰ্যকালৰ সময়ছোৱাত নিজৰ দক্ষতাৰে বিজেপিক নতুন ৰূপ লোৱাত অগ্ৰণী ভূমিকা লৈছিল ৰাজেন গোঁহাই আৰু সিদ্ধাৰ্থ ভট্টাচাৰ্য ৷
আনকি গোঁহাই- এ কংগ্ৰেছৰ ঘাটি নগাঁও সংসদীয় সমষ্টিৰ পৰা চাৰিবাৰকৈ সাংসদ হোৱোৰ লগতে ৰাজ্য বিধানসভালৈ বিজয় কৰাই আনিছিল কে’বাজনো বিধায়কক ৷ সংকটকালত দলীয় সংগঠনক নতুন মাত্ৰা প্ৰদান কৰিছিল যদিও শেহতীয়াকৈ গোঁহাই,ভট্টাচাৰ্য সহ বহু কেইজন পুৰণি জ্যেষ্ঠ বিজেপি নেতাক দলীয় কাম-কাজৰ পৰা আঁতৰাই ৰাখিছিল ৷
ৰাজ্যিক বিজেপিৰ এনেবোৰ কৰ্মকাণ্ডক লৈ ক্ষোভিত হৈ পৰিছিল বহু কেইজন নেতা- বিধায়ক ৷ উমি উমি জ্বলি থকা জুয়ে ভয়ংকৰ ৰূপ লোৱাৰ মুহূৰ্ততে কেন্দ্ৰীয় নেতৃত্ব উপসম ঘটাবৰ বাবে উঠিপৰি লাগিছে ৷
দিল্লীৰ এটা সূত্ৰই সদৰি কৰা মতে ৰাজ্যিক বিজেপিৰ সভাপতি ভৱেশ কলিতাৰ শেহতীয়া কেতবোৰ কাম-কাজক লৈ অসন্তুষ্ট দিল্লীৰ নেতৃবৰ্গ ৷
এনে প্ৰেক্ষাপটত ৰাজ্যিক বিজেপিৰ অন্তৰ্কন্দল নিৰ্মূল দিল্লীৰ নেতৃবৰ্গৰে কিদৰে কৰে সেইয়া আগন্তুক দিনত হ’ব লক্ষণীয় ৷