G-20 Summit Update:
শনিবাৰৰ পৰা নতুন দিল্লীত অনুষ্ঠিত হ’বলগীয়া জি- ২০ শীর্ষ সন্মিলনক কেন্দ্ৰ কৰি ব্যাপক তৎপৰতাৰ সৃষ্টি হৈছে। এই বৈঠকত যোগদানৰ উদ্দেশ্যে আগমন ঘটিব মার্কিন ৰাষ্ট্ৰপতি জ’ বাইডেনকে ধৰি বিশ্বৰ বহু প্ৰভাৱশালী ৰাষ্ট্ৰ নেতাৰ। বাইডেনৰ নিৰাপত্তাক কেন্দ্ৰ কৰি বিশেষভাৱে ব্যস্ত হৈছে দিল্লী আৰক্ষীৰ লগতে কেন্দ্ৰীয় নিৰাপত্তা বাহিনী।
হোৱাইট হাউছে জনোৱা মতে, আজি ৱাশ্বিংটন ডিচিৰ পৰা দিল্লী অভিমুখে ৰাষ্ট্ৰপতি বাইডেনে উৰা মাৰিছে। তেওঁৰ লগত আহিছে মাৰ্কিন ৰাষ্ট্ৰপতিৰ চৰকাৰী বাহন ‘দ্য বিষ্ট’। সুত্ৰত প্রকাশ যে আমেৰিকাৰ পৰা বিমানযোগে এই বাহনখন অনা | হৈছে। ভাৰত ভ্ৰমণকালত তেওঁ এই নিজস্ব চৰকাৰী বিশেষ বাহনখনতে চলাচল কৰিব।
বিশ্বৰ সৰ্বাধিক শক্তিশালী আৰু নিৰাপদ বাহন বুলি কোৱা হয় এইখনক। বুলেটপ্রুফ এই বাহনখন সকলো সময়তে বাইডেনৰ নিৰাপত্তাৰক্ষীয়ে পহৰা দি থাকে। দিল্লীত বাহনখনৰ বাবে বিশেষ নিৰাপত্তা ব্যৱস্থা কৰা হৈছে।
সেয়েহে সাতে পাঁচে মিলি আন ৰাষ্ট্ৰ নেতাতকৈ তুলনামূলকভাবে বাইডেনক লৈ দিল্লীত চৰম ব্যস্ততা দেখা গৈছে। তিনি তৰপীয়া নিৰাপত্তা ব্যৱস্থাৰে দিল্লীক ঘেৰি পেলোৱা হৈছে।
এই তিনি তৰপীয়া নিৰাপত্তা বলয়ৰ একেবাৰে বাহিৰৰ স্তৰত থাকিব অৰ্ধসামৰিক বাহিনী, দ্বিতীয় স্তৰত বিশেষ প্রশিক্ষণপ্রাপ্ত কমাণ্ডো বাহিনী আৰু প্ৰথম স্তৰত অৰ্থাৎ একেবাৰে ভিতৰণ বলয়ত থাকিব চোৰাংচোৱা বিভাগৰ ছদ্মবেশধাৰী বিষয়াসকল।
ৰাষ্ট্ৰপতি বাইডেন ভাৰতত থকাৰ সময়ছোৱাত দিল্লীৰ ওপৰত আকাশমাৰ্গৰ পৰা দৃষ্টি ৰাখিবলৈ অহৰহ বিচৰণ কৰিব ভাৰতীয় সেনাবাহিনীৰ হেলিকপ্টাৰ।
এই হেলিকপ্টাৰসমূহত সেনাবাহিনী আৰু নেচনেল ছিকিউৰিটি গার্ড (এন এছ জি)ৰ কমাণ্ডো থাকিব। দিল্লীৰ বহু মহলীয়া ভৱনসমূহতো এনএছজি আৰু সেনাবাহিনীৰ স্নাইপাৰসকলক নিয়োগ কৰা হৈছে।
দিল্লী আৰক্ষীকো বিভিন্ন দায়িত্বত ন্যস্ত কৰা হৈছে। মার্কিন ৰাষ্ট্ৰপতিৰ নিৰাপত্তা সুনিশ্চিত কৰিবলৈ বিভিন্ন স্থানত ড্রান প্ৰতিৰোধী প্রযুক্তি ব্যৱহাৰ কৰা হৈছে যাৰ ফলত এই অঞ্চলসমূহত ড্রোনে বিচৰণ কৰিব নোৱাৰিব।
সূত্ৰত প্ৰকাশ যে বাইডেন আৰু আমেৰিকাৰ পৰা অন্যান্য প্রতিনিধিসকলৰ আইটিচিৰ এক বিলাস বহুল হোটেলৰ চাৰিটা কোঠা বুক কৰা হৈছে। ১৪ মহলাৰ কোঠাত থাকিবলগীয়া
বাইডেনৰ ভূমিমহলালৈ অহা-যোৱাৰ বাবে বিশেষ লিফটৰ ব্যৱস্থাও কৰা হৈছে। তেওঁ থকা স্থানলৈ মাত্ৰ কেইজনমান লোক যাব পৰাৰ অনুমতি আছে। চকুৰ পলকতে এতিয়া দিল্লীক এনে এক ৰূপত দেখা যায় য’ত কেৱল জি-২০ উপলক্ষেই ব্যস্ততা।
দিল্লীৰ চুকে কোনে বিচৰণ কৰি আছে ভাৰতীয় চোৰাংচোৱা সংস্থাসমূহৰ বিষয়াসকল। বিভিন্ন স্থানত দেখা গৈছে হাতত উদ্যত বন্দুকসহ পহৰাৰত হৈ আছে কমাণ্ডো। হেলিকপ্টাৰৰ জৰিয়তে আকাশমাৰ্গৰ পৰা দিল্লীৰ বিভিন্ন অলিয়ে গলিয়ে চোকা দৃষ্টি দিছে ভাৰতীয় সেনাবাহিনী আৰু এনএছজিৰ কমাণ্ডো।
সম্মিলনলৈ আহিবলগীয়া অন্যান্য বিদেশী অতিথিসকল যিসমূহ হোটেলত থাকিব তাতো ঢোকা দৃষ্টি ৰাখিছে ভাৰতীয় চোৰাংচোৱাই। দিল্লী আৰু গুৰুগ্ৰামৰ বিভিন্ন হোটেলত প্রায় ৩৫০ টা কোঠা ভাড়ালৈ লোৱা হৈছে। সূত্ৰত প্ৰকাশ যে দিল্লীৰ হোটেলসমূহতে থাকিব ৰাষ্ট্ৰ প্ৰধানসকল।
জি-২০ দেশসমূহৰ উপৰি আন কে’বাখনো দেশৰ ৰাষ্ট্ৰনেতাসকলক দিল্লীলৈ অতিথি হিচাপে অনা হৈছে। এই দেশসমূহৰ ভিতৰত আছে বাংলাদেশ, মিচৰ, মৰিছাছ, নেডাৰলেণ্ড, নাইজেৰিয়া, ওমান, ছিংগাপুৰ, স্পেইন আৰু সংযুক্ত আৰব আমিৰশ্বাহি।
এক প্ৰতিবেদন অনুসৰি ৰাষ্ট্ৰপতি বাইডেনৰ আপ্যায়নৰ ব্যৱস্থা কৰা হৈছে আইটিচি মৌর্য শ্বেৰাটনত। চীনৰ ৰাষ্ট্ৰপতি জি জিনপিঙৰ বাবে দিল্লীৰ তাজ পেলেচত ব্যৱস্থা কৰা হৈছিল যদিও তেওঁ নাহিব বুলি ৰাষ্ট্ৰখনৰ বৈদেশিক মন্ত্রণালয়ে অৱগত কৰিছে। চীনৰ প্ৰধানমন্ত্ৰী হিচাপে উপস্থিত থাকিব প্রধানমন্ত্রী লি কিয়াং। একেখন হোটেলতে থাকিব অষ্ট্ৰেলিয়াৰ প্রতিনিধি দল।
দিল্লীৰ কণাট প্লেচৰ ছাংহেৰা হোটেলত ব্ৰিটেইনৰ প্ৰধানমন্ত্রী ঋষি চুনাক তথা জাৰ্মানীৰ চেঞ্চেলসহ প্ৰতিনিধিৰ দল থকাৰ কথা আছে। আন এখন বিলাসবহুল ক্লেৰিজেছ হোটেলত ফৰাচী ৰাষ্ট্ৰপতি ইমানুৱেল মেক্ৰ’ থকাৰ কথা। ইপিনে, অষ্ট্ৰেলিয়াৰ প্ৰধানমন্ত্রী এন্টনি আলবেনিজ থাকিব ইম্পেৰিয়েল হোটেলত । তুৰস্কৰ ৰাষ্ট্ৰপতি ৰিচেপ তায়েপ এডোগান থকাৰ সম্ভাৱনা আছে অ’বেৰয় হোটেলত।
ইপিনে, ৰাছিয়াৰ বৈদেশিক মন্ত্রী ছাগেই লাভৰ’ত অ’বেয় হোটেলতে থাকিব। জে ডব্লিউ মেৰিয়ট আৰু হায়াট ৰিজেন্সিত দুটা প্রতিনিধি দল থকাৰ কথা। আনহাতে, দিল্লীৰ লা মেৰিডিয়ান হোটেলত থাকিব নেডাৰলেণ্ড, নাইজেৰিয়া আৰু ইউৰোপৰ প্ৰতিনিধিসকল। কানাডা আৰু জাপানৰ প্রতিনিধিসকল থাকিব ললিত হোটেলত ।
ইপিনে, গুৰুগ্ৰামৰ অ’বেৰয় হোটেলত দক্ষিণ কোৰিয়াৰ প্ৰতিনিধি দল থকাৰ ব্যৱস্থা কৰা হৈছে আৰু ছৌদি আৰবৰ প্ৰতিনিধি দল গুৰুগ্ৰামৰ লীলা হোটেলত থকাৰ কথা।
শেহতীয়া খবৰ অনুসৰি ইতিমধ্যে আহিছে বহুৰাষ্ট্ৰৰ মুৰব্বী৷ সন্ধিয়া উপস্থিত হ’বহি আমেৰিকাৰ ৰাষ্ট্ৰপতি জ’ বাইডেন ৷ ৰাষ্ট্ৰপতি গৰাকী এয়াৰপৰ্টৰ পৰা পোনে পোনে ৰাওনা হ’ব মৌৰ্য চেৰাটন হোটেললৈ ৷ ইয়াতে থাকিব মাৰ্কিন ৰাষ্ট্ৰপতি গৰাকী ৷
আনহাতে দিল্লীত উপস্থিত হৈছে বৃটিছ প্ৰধানমন্ত্ৰী ঋষি ছুনাক ৷