Polling Will be Held in 95 Constituencies in 12 States Tomorrow:
দেওবাৰে নির্বাচনী প্ৰচাৰ অভিযানৰ অন্ত পৰাৰ পাছতে মঙলবাৰে সমগ্র দেশজুৰি মুঠ ১২খন ৰাজ্যৰ ৯৫টা সমষ্টিক সামৰি অনুষ্ঠিত হ’ব তৃতীয় পৰ্যায়ৰ ভোটগ্রহণ পর্ব। লক্ষ্যণীয় যে অহা মঙলবাৰে অনুষ্ঠিত হ’বলগীয়া ভোটগ্রহণক লৈ সমগ্র দেশবাসীৰ দৃষ্টি নিবদ্ধ হৈছে ৷
কিয়নো নিৰ্বাচনী ৰণত অৱতীৰ্ণ হোৱা কে’বা গৰাকী হাই প্ৰফাইল জ্যেষ্ঠ ৰাজনীতিকে নিয়ন্ত্ৰণ কৰি আহিছে দেশৰ ৰাজনীতি ৷ এই সকল ৰাজনীতিকৰে সাত মে’ত
ভাগ্য নিৰ্ণয় কৰিব ১২খন ৰাজ্যৰ ৯৫টা সমষ্টিৰ ভোটাৰে ৷তৃতীয় পৰ্যায়ৰ ভোটগ্রহণ পর্বক লৈ উৎকণ্ঠাৰ মূলতেই হ’ল মঙলবাৰে ইভিএমত বন্দী হ’ব কেন্দ্রীয় গৃহমন্ত্রী অমিত শ্বাহৰ ৰাজনৈতিক ভবিষ্যৎ। একেদৰেই তৃতীয় পৰ্যায়ৰ নিৰ্বাচনতে যুঁজত অৱতীর্ণ হ’ব মধ্যপ্ৰদেশৰ প্ৰাক্তন মুখ্যমন্ত্রী শিৱৰাজ সিং চৌহান, প্রাক্তন মুখ্যমন্ত্রী দিগ্বিজয় সিং, কেন্দ্রীয় মন্ত্রী প্রহ্লাদ যোশী, ডিম্পল যাদৱ, সুপ্রিয়া ছুলেকে ধৰি কে’বাগৰাকীও জ্যেষ্ঠ ৰাজনীতিবিদ।
উল্লেখ্য যে তৃতীয় পৰ্যায়ৰ ভোটগ্ৰহণৰ অন্তত ১৩ মে’ত চতুর্থ পর্যায়, ২০ মে’ত পঞ্চম পর্যায়, ২৫ মে’ত ষষ্ঠ পর্যায় আৰু এক জুনত সপ্তম পৰ্যায়ৰ ভোটগ্রহণ অনুষ্ঠিত হ’ব। তাৰ পাছতে চাৰি জুনত ভোট গণনা কৰা হ’ব।
তৃতীয় পর্যায়ৰ নিৰ্বাচনৰ বাবে প্রস্তুতি সম্পূৰ্ণ হোৱা ৯৫টা সমষ্টিৰ বাবে নির্বাচন অনুষ্ঠিত হ’ব ক্রমে অসম, কর্ণাটক, মধ্যপ্রদেশ, বিহাৰ, চত্তিছগড়, গোৱা, গুজৰাট, মহাৰাষ্ট্ৰ, উত্তৰ প্ৰদেশ, পশ্চিমবংগ, দাদৰা আৰু নগৰ হাভেলি/দমনডিউ।
উল্লেখ্য যে গুজৰাটৰ গান্ধীনগৰ সমষ্টিত প্রতিদ্বন্দ্বিতা কৰা কেন্দ্রীয় গৃহমন্ত্রী অমিত শ্বাহৰ অহা সাত মে’ত ৰাজনৈতিক ভাগ্য নির্ণিত হ’ব। উল্লেখ্য যে ক্রমাগতভাবে দ্বিতীয়বাৰলৈ গান্ধী নগৰত নিৰ্বাচনী যুঁজত অৱতীৰ্ণ হোৱা অমিত শ্বাহৰ বিৰুদ্ধে কংগ্রেছে সমষ্টিটোত প্রার্থিত্ব দিছে সোণাল পেটেলক। ২০১৯ৰ নিৰ্বাচনত কেন্দ্রীয় গৃহমন্ত্রীজনে কংগ্রেছ প্রার্থী চি জে ছাব্রাক ৫.৫৫ লাখ ভোটৰ ব্যৱধানত পৰাস্ত কৰিছিল।
ইফালে, মধ্যপ্ৰদেশৰ বিদিশা সমষ্টিত শিৱৰাজ সিং চৌহান, গুণা-শিৱপুৰী সমষ্টিত জ্যোতিৰাদিত্য সিন্ধিয়া আৰু ৰাজগড় সমষ্টিত ভাগ্য নির্ণয় হ’ব জ্যেষ্ঠ কংগ্রেছ নেতা দিগ্বিজয় সিঙৰ। আকৌ উত্তৰ প্ৰদেশত অনুষ্ঠিত হ’বলগীয়া নির্বাচনত নির্ণিত হ’ব মুলায়ম সিং যাদৱ পৰিয়ালৰ সদস্য ডিম্পল যাদৱ, আদিত্য যাদৱ আৰু অক্ষয় যাদৱৰ ভাগ্য। আকৌ মহাৰাষ্ট্ৰৰ বাৰামতি সমষ্টিত প্রতিদ্বন্দ্বিতা কৰা এনচিপিৰ মুৰব্বী শাৰদ পাৱাৰৰ কন্যা সুপ্রিয়া ছুলে আৰু অজিত পাৱাৰৰ পত্নী সুনেত্রা পাৱাৰৰ ভাগ্য বন্দী হ’ব ইভিএমত।