Amit Shah Election Rally in Missa:
দৈনিক অগ্ৰদূত ডিজিটেল ডেক্স:–ৰাজ্যৰ বিধানসভা নিৰ্বাচনৰ প্ৰচাৰাভিযান অন্ত পৰিবলৈ মাজত মাত্ৰ পাঁচটা দিন থকা অৱস্থাত শাসক- বিৰোধীৰ হাই প্ৰফাইল ৰথী- মহাৰথীৰ আগমন ঘটিছে অসমলৈ ৷ সকলো নেতা নিজ নিজ প্ৰাৰ্থীৰ সমৰ্থনত ইখনৰ পিছত সিখনকৈ প্ৰচাৰ সভাত অংশ ৰাজনীতিৰ বতাহ গৰম কৰি তুলিছে।
৪৮ ঘণ্টাৰ বিৰতিত পুনৰ অসমত বৃহস্পতিবাৰে দ্বিতীয় বাৰৰ বাবে অসমত উপস্থিত হয় গৃহমন্ত্ৰী অমিত শ্বাহ ৷ কলিয়াবৰত অগপৰ প্ৰাৰ্থী কেশৱ মহন্তৰ হৈ প্ৰচাৰ চলোৱা উদ্দেশ্যৰে বিএছএফৰ বিশেষ বিমানেৰে গুৱাহাটী বিমান বন্দৰত উপস্থিত হৈ তাৰ পৰা হেলিকপ্টাৰে বিয়লি উপস্থিত হয় মিছাত ৷ এই সভাত অংশ লৈ গুৱাহাটীলৈ উভতি গৈ নিশাটো মহানগৰীৰ খানাপাৰাস্থিত কইনাধৰাৰ ৰাজ্যিক অতিথি শালাত ন নৈশ যাপন কৰি শুক্ৰবাৰে অংশ ল’ব বিজেপিৰ মিত্ৰজোঁটা তিনিখন জনসভাত ।
বৃহস্পতিবাৰে কলিয়াবৰৰ মিচা হাইস্কুল খেলপথাৰত ‘বিজয় সংকল্প সমাৰোহ’ত উপস্থিত থাকি বিজেপি মিত্ৰজোঁটৰ প্ৰাৰ্থী কেশৱ মহন্তৰ হৈ নিৰ্বাচনী প্ৰচাৰ চলাই কেন্দ্রীয় গৃহমন্ত্রী অমিত শ্বাহ কংগ্ৰেছৰ বিৰুদ্ধে সৰৱ হৈ পৰে ৷কংগ্ৰেছৰ শাসন কালত বিশ্ব ঐতিহ্যক্ষেত্ৰ কাজিৰঙাত এশিঙিয়া গড়ৰ হত্যালীলা আৰম্ভ হৈছিল ৷প্ৰায়ে দৈনিক নিধন হৈছিল অসম গৌৰৱ এশিঙিয়া গড় ৷ আনকি অভয়াৰণ্য খনৰ অধিকাংশ অঞ্চল সন্দেহযুক্ত লোকৰ দখলত আছিল ৷ কিন্ত বিজেপি মিত্ৰজোঁটৰ চৰকাৰ অহাৰ পিছতে কঠোৰভাৱে বেদখলকাৰীক উচ্ছেদ কৰা হয়। যাৰ ফলস্বৰূপে গড় হত্যা বন্ধ হ’ল ৷ কাজিৰঙাৰ সুৰক্ষা আৰুকলিয়াবৰক উন্নয়নৰ গতি তৰাম্বিত কৰাৰ স্বাৰ্থত কেশৱ মহন্তক বিজয়ী কৰিবলৈ আহবান জনাই গৃহমন্ত্ৰী গৰাকীয়ে ৷
আনহাতে ৰাহুল গান্ধীক তীব্ৰ কটাক্ষ কৰি অমিত শ্বাহে কয়, ৰাহুল বাবাই ১৫ বছৰ চৰকাৰত থাকি অসমৰ বাবে কি কৰিলে? কেন্দ্ৰ আৰু ৰাজ্যত চৰকাৰ থকাৰ পাছতো কংগ্রেছে অসমৰ বাবে একো নকৰিলে। আনকি অসমে ইউপিএ চৰকাৰক প্ৰধানমন্ত্ৰী দিয়াৰ পাছতো অসমক কংগ্ৰেছে একো নিদিলে। ইয়াৰ বিপৰীতে প্রধানমন্ত্রী নৰেন্দ্ৰ মোদী আৰু ড:হিমন্ত বিশ্ব শৰ্মাৰ ডবল ইঞ্জিনৰ চৰকাৰে অসমত ব্যাপক উন্নয়ন সাধিলে ৷
অসমৰ খিলঞ্জীয়া মুছলমান সকলৰ বিৰুদ্ধে বিজেপিয়ে কেতিয়াও অৱস্থান নকৰে বুলি মন্তব্য কৰি গৃহমন্ত্ৰী গৰাকীয়ে কয়,খিলঞ্জীয়া মুছলমান সকলৰ উন্নয়নৰ বাবে কেতবোৰ আঁচনি প্ৰস্তুত কৰাৰ প্ৰতিশ্ৰুতি দিয়ে ৷ইয়ে খিলঞ্জীয়া মুছলমানৰ উন্নয়নৰ গতি উচ্চ শিখৰলৈ নিব ৷
আনহাতে বিজেপি চৰকাৰে শ্বহীদক প্রকৃত সন্মান দিছে বুলি উল্লেখ কৰি শ্বাহে কয়, হিমালয়ৰ পৰা কন্যাকুমাৰীলৈ সকলোতে বীৰ লাচিত বৰফুকনৰ বাৰ্তা আমাৰ চৰকাৰে দিছে। লোকপ্ৰিয় গোপীনাথ বৰদলৈক প্ৰকৃত সন্মান আমাৰ চৰকাৰে দিলে। ভূপেন দাক ভাৰতৰত্ন আমাৰ প্ৰধানমন্ত্ৰী নৰেন্দ্ৰ মোদীৰ কার্যকালতে প্রদান কৰা হ’ল। এনেক্ষেত্ৰত ৰাহুল গান্ধীয়ে সপোন দেখা বন্ধ কৰক।
এইবাৰ পুনৰ দিছপুৰত বিজেপি- অগপৰ চৰকাৰ হোৱাটো খাটাং ৷ নিৰ্বাচনৰ পাছতে বিজেপি- অগপই একেলগে উদযাপন কৰিব বিহু ৷ সভাত কলিয়াবৰৰ অগপ প্ৰাৰ্থী কেশৱ মহন্তই কলিয়াবৰত অগপ আৰু বিজেপিৰ শক্তিশালী বন্ধুত্ব আছে বুলি উল্লেখ কৰি বিজেপিৰ পৰা নিলম্বিত হৈ নিৰ্দলীয় হিচাপে প্ৰতিদ্বন্দ্বিতা কৰাজনৰ মিছা কথাত ভোল নাযাবলৈ আহ্বান জনাই ৷ দিছপুৰৰ মচনদ পুনৰ তৃতীয়বাৰ বাবে দখল কৰিবৰ বাবে অগপক ভোট দিবলৈ বিনম্ৰ আহ্বান জনায় অগপ প্ৰাৰ্থী গৰাকীয়ে ৷
