Udalguri:
ওদালগুৰি চহৰৰ নাগৰিকৰ বিভিন্ন সমস্যা সমাধানৰ বাবে মাত মতাৰ উদ্দেশ্যে গঠন হোৱা নাগৰিক অধিকাৰ দাবী সমিতিয়ে ওদালগুৰি পৌৰসভাৰ বৰ্ধিত পৌৰ সম্পত্তি-কৰৰ বিষয়ত ন্যায়ালয়ৰ ৰায়ক লৈ আজি এখনি সংবাদমেল সম্বোধন কৰে।
স্থানীয় বিষ্ণু ৰাভা কৃষ্টি সংঘত অনুষ্ঠিত সংবাদমেলত ওদালগুৰি পৌৰসভাই অগণতান্ত্রিক আৰু একপক্ষীয়তাৰে বৰ্ধিত ভাৱে পৌৰকৰ বঢ়োৱাই নহয়, অসমৰ অন্য পৌৰসভা সমূহত ১ এপ্রিল ২০২৩ ৰ পৰা নতুন পৌৰকৰ প্ৰযোজ্য কৰাৰ বিপৰীতে ওদালগুৰি পৌৰসভা ই ১ এপ্রিল ২০২২ ৰ পৰা এটা বছৰ অতিৰিক্তকৈ বর্ধিত পৌৰকৰ সংগ্ৰহ কৰি দুই ধৰণে ওদালগুৰি নগৰবাসীক অন্যায় কৰিছিল বুলি সমিতিৰ সম্পাদক দীপক শর্মাই ল্লেখ কৰে।
শৰ্মাই উল্লেখ কৰি কয় যে ওদালগুৰি পৌৰসভাক গণতান্ত্রিকভাৱে প্রথমে আবেদন-নিৱেদন কৰি বিষয়টো উত্থাপন কৰাত কোনো গুৰুত্ব আৰোপ নকৰিলে। শেষত প্রতিবাদী কৰ্য্যসূচীৰে এই অন্যায় বন্ধৰ দাবী জনোৱা স্বত্বেও পৌৰকৰ ন্যায়সন্মত বহনক্ষম কৰাৰ ক্ষেত্ৰত ওদালগুৰি পৌৰসভাই কোনো ধৰণৰ পদক্ষেপ নোলোৱাত সমিতিয়ে ন্যায়ালয়ৰ আশ্ৰয় লব লগা হয়।
ওদালগুৰি জিলা সত্ৰ ন্যায়াধীশৰ দেৱানী আদালতত বিষয়টো সন্দৰ্ভত ২০২৩ বৰ্ষৰ ২ চেপ্তেম্বৰত এক গোচৰ দিয়া হৈছিল। উক্ত গোচৰ সন্দৰ্ভত আদালতে চলিত বৰ্ষৰ ১২ মার্চ তাৰিখে বিষয়টিৰ এক সমাধান উলিয়াই ৰায় প্ৰদান কৰে। উক্ত ৰায়ত আদালতে নির্দেশ দিয়ে যে ওদালগুৰি পৌৰসভাই চেপ্তেম্বৰৰ পৰাহে নতুন নিৰিখত পৌৰকৰ সংগ্ৰহ কৰিব পাৰিব।
উক্ত তাৰিখৰ আগলৈ পূৰ্ৱৰ নিৰিখতে পৌৰকৰ সংগ্ৰহ কৰিব লাগিব। ২০২৩ বৰ্ষৰ ২ চেপ্তেম্বৰৰ পৰা বলৱৎ কৰিবলৈ কোৱা নতুন পৌৰকৰ সন্দৰ্ভত অসম চৰকাৰৰ যুটীয়া সচিৱ তথা গৃহ নিৰ্মাণ আৰু নগৰ পৰিক্ৰমা বিভাগ পৌৰ সংস্কাৰ কোষৰ ভাৰপ্ৰাপ্ত বিষয়া স্বাক্ষৰিত ২০২৩ চনৰ ১০ মাৰ্চ তাৰিখৰ ডিএমএ.১৬২/২০২২/১৪৩ নম্বৰৰ পত্ৰৰ ভিত্তিত সংগ্ৰহৰ নিৰ্দেশ দিয়ে।
উল্লেখ্য যে উক্ত পত্ৰত স্পষ্টকৈ উল্লেখ আছে যে নতুন পৌৰকৰ পূৰ্বৰ কৰৰ সতে ২৫%কৈ অধিক বৃদ্ধি হব নোৱাৰিব। আৰম্ভণিৰে পৰা এই দাৱীকে নাগৰিক অধিকাৰ দাবী সমিতিয়ে জনাই আহিছিল বুলি সম্পাদক গৰাকীয়ে আজিৰ সংবাদমেলত উল্লেখ কৰে। ওদালগুৰি জিলা সত্ৰ ন্যায়াধীশৰ দেৱানী আদালতৰ এই নিৰ্দেশৰ কাৰ্য্যকাৰিতা কৰিলে ওদালগুৰি পৌৰসভাই নাগৰিকৰ বাবে বহনক্ষম পৌৰকৰ হ’ব বুলি সম্পাদক দীপক শর্মাই ব্যক্ত কৰে।
আদালতৰ আইনী যুঁজযোগে ওদালগুৰি পৌৰসভাৰ নাগৰিকে ১ বছৰ ৫ মাহ পুৰণি নিৰিখত পৌৰকৰ দিয়াৰ সুযোগ পোৱাৰ লগতে নতুন পৌৰকৰো বহনক্ষমভাবে দিয়াৰ সুযোগ পোৱাতো ন্যায়সন্মত বিজয় বুলি উল্লেখ কৰে। পৌৰসভা এক স্বতন্ত্ৰ অনুষ্ঠান হিচাপে নাগৰকিৰ সতে মত বিনিময় কৰি গ্রহণযোগ্য মতক প্রাধান্য দি পৌৰসভাখনক সকলো দিশ তে উন্নয়ন আগুৱাই নিয়াতো যুগুত বুলিও শৰ্মাই প্ৰকাশ কৰে।
বিটিচিত পৌৰসভাৰ নিৰ্বাচন হ লে এনে অগণতান্ত্ৰিক-স্বৈৰাচ্চাৰ কমিব বুলি তেওঁ উল্লেখ কৰি সংবাদমেলৰ শেষত উক্ত আইনী যুজত ভুক্তভোগী এজন সচেতন নাগৰিক হিচাপে স্বেচ্ছাই সহযোগ আগবঢ়োৱা ওদালগুৰিৰ বিশিষ্ট অধিবক্তা মাধৱ নাৰ্জাৰী আৰু তেখেতৰ সহযোগী বৃন্দৰ প্রতি কৃতজ্ঞতা প্রকাশ কৰে।
মন কৰিবলগীয়া বিষয় যে এই পৌৰকৰ তথা আন কেইৱাটাও বিষয় সন্দৰ্ভত অহা শনিবাৰে এক ৰাজহুৱা সভা আহ্বান কৰিছে ওদালগুৰি পৌৰসভাই। এটা অঞ্চলৰ নাগৰিকৰ সা-সুবিধাৰ বাবে গঠিত এই পৌৰসভাখনে ৰাইজৰ এই জলন্ত পৌৰকৰ সন্দৰ্ভত কি ব্যৱস্থা গ্ৰহণ কৰে সেয়া হ’ব লক্ষণীয়।
