DGP talks to child victims of sexual abuse:
শিশু দিৱসৰ দিনটোত মহানগৰীৰ উলুবাৰীস্থ অসম আৰক্ষী মুখ্য কাৰ্যালয়ত আয়োজন কৰা হয় এক বিশেষ অনুষ্ঠানৰ ৷ অনুষ্ঠানত অংশ লয় ডিজিপি জিপি সিঙে ৷
যৌন নির্যাতনৰ ভুক্তভোগী শিশু সকলৰ লগত আৰক্ষী সঞ্চালক প্রধান গৰাকীয়ে বিভিন্ন বিষয়ৰ ওপৰত মত বিনিময় কৰে ৷ আৰক্ষী সঞ্চালকে সিঙে এই শিশু সকল আৰক্ষী ব্যৱস্থাৰ সংস্পর্শত অহা সময়ত তেওঁলোকে অনুভৱ কৰা অভিজ্ঞতা ন্যায় ব্যৱস্থাৰ বিভিন্ন প্ৰক্ৰিয়াৰ সময়ত সম্মুখীন হোৱা প্ৰত্যাহ্বান সমূহৰ বিষযে আৰু লগতে শিশু সকলৰ শিক্ষা আৰু মানসিক স্বাস্থ্যৰ বিভিন্ন বিষয়ৰ ওপৰত আলোচনা কৰে ৷ যৌন নির্যাতনৰ ভুক্তভোগী শিশুসকল অসুৰক্ষিত আৰু দুৰ্বল আৰু তেওঁলোকে ন্যায় প্রদান ব্যৱস্থা প্ৰণালীৰ জটিল প্রক্রিয়া সমূহৰ সন্মুখীন হব লগা হয়। নিয়মীয়াকৈ শিশুসকলৰ সৈতে এনেধৰনৰ মত বিনিময় অনুষ্ঠান অনুষ্ঠিত কৰা আৰু আলোচনা কৰা খুবেই প্রয়োজনীয় যাৰ দ্বাৰা শিশু সকলৰ বিভিন্ন বিষয়ত তেওঁলোকৰ মনোভাৱ আৰু বিভিন্ন বিষয় সম্পর্কে তেওলোকৰ দক্ষতা প্রকাশ পায় আৰু সেইমৰ্মে আৰক্ষী ব্যৱস্থা প্ৰণালীৰ বিভিন্ন দিশ শিশু বন্ধুত্বপূর্ণ কৰিব পৰা যায়।
উল্লেখ্য যে ,অসম আৰক্ষীয়ে উদযাপন কৰা সপ্তাহজোৰা (১৪ নৱেম্বৰ ২০২৪ ৰ পৰা ২০ নৱেম্বৰ ২০২৪) শিশু অধিকাৰ সপ্তাহৰ এই মত বিনিময় অনুষ্ঠানটি এটি অন্যতম কাৰ্য্যসূচী।
প্রত্যেক বছৰে আয়োজিত শিশু অধিকাৰ সপ্তাহত অসম আৰক্ষীৰ সঞ্চালক প্রধানে শিশু সকলৰ সৈতে শিশু সকলে সম্মুখীন হোৱা বিভিন্ন প্ৰত্যাহ্বান সমূহৰ বিষয়ে মত বিনিময় কৰে৷
ইউনিচেফ আৰু উৎসাহ সংস্থাৰ সহযোগিতাত চলোৱা অসম আৰক্ষীৰ শিশু মিত্ৰ প্ৰকল্পৰ এই নিয়মীয়া মত বিনিময় অনুষ্ঠান এটি অন্যতম আৰু গুৰুত্বপূৰ্ণ প্রচেষ্টা যিয়ে শিশু সকলক অংশগ্রহণ কৰাৰ অধিকাৰ সুনিশ্চিত কৰাৰ ক্ষেত্ৰত সুবিধা দিয়ে আৰু এখন মঞ্চ প্ৰদান কৰে।
গুৱাহাটী মহানগৰী স্থিত শিশু গৃহসমূহ আৰু মহানগৰীৰ আন আন ঠাইৰ পৰা যৌন অপৰাধৰ ভুক্তভোগী শিশু সকলে এই অনুষ্ঠানত অংশগ্ৰহণ কৰে।
এই মতবিনিময় অনুষ্ঠানত অংশ লয় অসম আৰক্ষী শিশু মিত্ৰ প্ৰকল্পৰ আহ্বায়ক তথা অসম আৰক্ষীৰ বিশেষ আৰক্ষী সঞ্চালক প্রধান হৰমীত সিঙে ৷ তেওঁ শিশু সকলৰে মতবিনিময় অনুষ্ঠানত উল্লেখ কৰে যে শিশুসকলৰ পৰা সময়ে সময়ে পাই অহা নিয়মিয়া পৰামৰ্শ সমূহে শিশু সকলক সাহসী আৰু সৱল কৰে আৰু তেওঁলোকৰ মতামত সমূহ আমাৰ লগত বিনিময় কৰাৰ বাবে এখন মঞ্চ প্ৰদান কৰে আৰু সেই মর্মে ব্যৱস্থা প্রণালী সমূহত প্রয়োজনীয় সিদ্ধান্ত আৰু পাৰ্থক্য অনাৰ বাবে যথেষ্ট অৰিহণা যোগায়।
