Assembly itself, which makes laws, has become the epicenter of irregularities:
অসম বিধানসভাক বাহ্যিকভাৱে চমকৰ ওপৰত চমক দিয়াত কার্পণ্য কৰা নাই অধ্যক্ষ বিশ্বজিৎ দৈমাৰীয়ে। তাৰ বিপৰীতে অভ্যন্তৰত চলিছে লুণ্ঠনৰ মাৰাথন দৌৰ। ইয়াৰ সমানেই অন্যান্য নানা অনিয়মৰ পাহাৰো গঢ়ি উঠিছে বিধানসভাৰ দৰে পবিত্র এক অনুষ্ঠানত।
নিযুক্তি, পদোন্নতি, বাহ্যিক সৌন্দর্যবর্ধন, নির্মাণ কার্য আদি সকলো ক্ষেত্রতে বিধানসভাত যি কেলেংকাৰি সংঘটিত হোৱাৰ অভিযোগ উঠি আহিছে, তেনে অভিযোগ পূর্বে কেতিয়াও উঠা নাছিল বুলি এতিয়া বিধানসভা সচিবালয়ত মুকলি চর্চা চলিছে।
এনে অনিয়মবোৰক লৈ কোনোবাই মাত মাতিলেই অধ্যক্ষই শাস্তিমূলক ব্যৱস্থা গ্রহণৰো মৌখিক নির্দেশনা দিয়া বুলি বিধানসভা সচিবালয়ৰ সূত্ৰই ‘দৈনিক অগ্রদূত’ক সদৰী কৰে। তদুপৰি সন্দেহৰ ভিত্তিত একাধিক বিষয়া- কৰ্মচাৰীৰ বিৰুদ্ধে গ্ৰহণ কৰা হৈছে শাস্তিমূলক ব্যৱস্থা। বিধানসভাত সংঘটিত বিভিন্ন অনিয়মৰ প্ৰতিবেদন ‘দৈনিক অগ্রদূত’ত সঘনে প্রকাশ পাই আহিছে। এনে প্রতিবেদনৰ তথ্য যোগান ধৰাৰ সন্দেহত এজন বিষয়াৰ বিৰুদ্ধে ব্যৱস্থা গ্ৰহণৰ অংশ হিচাপে তেওঁৰ কাৰ্যকাল বৃদ্ধি কৰা নহ’ল।
শেহতীয়াকৈ দুজন বিষয়াক বেআইনীভাবে যুটীয়া সচিবলৈ পদোন্নতি দিয়া হয়। সম্পূর্ণ আইন বিৰুদ্ধভাৱে অধ্যক্ষই এই পদোন্নতি দিয়ে। পদোন্নতিৰ বিষয়টোত উপাধ্যক্ষৰ কর্তৃত্ব থাকে। অথচ উপাধ্যক্ষ ডাঃ নোমল মমিনে তাৰ ভুকে নাপালে। তাকে লৈ অধ্যক্ষ আৰু উপাধ্যক্ষৰ মাজত শীতল যুঁজ অব্যাহত আছে।
বিধানসভাই আইন প্রণয়ন কৰে। সেই আইন মতে ৰাজ্যৰ প্ৰশাসন চলে। অথচ বিধানসভাকে বেআইনী কাৰ্যকলাপৰ অভিকেন্দ্ৰৰূপে গঢ়ি তোলাটো অতি ভয়ংকৰ ৰূপে বিবেচিত হৈছে। এই বিষয়টোক লৈ বিধানসভাৰ একাংশ কৰ্মচাৰীয়ে আজি গভীৰ আক্ষেপ প্রকাশ কৰে।
উল্লেখ্য যে অসম বিধানসভাৰ কে’বাটাও নতুন প্রকল্প বৃহস্পতিবাৰে মুখ্যমন্ত্রী ড: হিমন্ত বিশ্ব শর্মাই উদ্বোধন কৰে। এই কাৰ্যসূচীৰ প্ৰসংগতে বিধানসভাত বাহাল থকা পৰিস্থিতিক লৈ আক্ষেপ কৰি একাধিক বিষয়া-কর্মচাৰীয়ে মন্তব্য কৰে যে বাহিৰে ৰং-চং, ভিতৰে কোৱাভাতুৰীৰ দৰে চলিছে অসম বিধানসভা। ৰাজহুৱা ধনৰ চৰম অপচয়ৰো কেন্দ্ৰভূমি হৈ পৰিছে এই বিধানসভা। কেৱল চমকৰ পাছত অসম বিধানসভাক দৌৰাই ফুৰিছে অধ্যক্ষ দৈমাৰীয়ে।