MGNREGA scheme irregularities in Nagaon:
নগাঁও জিলাৰ লাওখোৱা উন্নয়ন খণ্ডৰ কাঠপাৰা গাঁও পঞ্চায়তত এমজি এনৰেগা আঁচনি ৰূপায়ণৰ নামত ব্যাপক দুর্নীতি-অনিয়ম সংঘটিত হোৱাৰ অভিযোগ উত্থাপিত হৈছে। পঞ্চায়তখনৰ অঞ্চলাধীন কাঠপাৰা বজাৰৰ পাছফালে এমজি এনেৰেগাৰ ২০২৩-২৪ বিত্তীয় বৰ্ষৰ এখন আঁচনিৰ কামৰ বিৱৰণিৰ ফলক স্থাপন কৰা হ’ল যদিও আজি পর্যন্ত বিশেষ কোনো কামেই কৰা পৰিলক্ষিত নহ’ল। ইয়াকে লৈ অঞ্চলটোৰ ৰাইজৰ মাজত তীব্র প্রতিক্রিয়াৰ সৃষ্টি হৈছে।
উল্লেখ্য যে নগাঁও জিলা পঞ্চায়ত আৰু গ্রামোন্নয়ন বিভাগৰ লাওখোৱা উন্নয়ন খণ্ডৰ কাঠপাৰা গাঁও পঞ্চায়তে ইয়াৰ অঞ্চলাধীন কাঠপাৰা বজাৰৰ পাছফালে থকা এটা পৰিত্যক্ত পথকে বজাৰ ক্ষেত্ৰ (ফিল্ড) ৰূপে দেখুৱাই ফিল্ডখনৰ উন্নয়নৰ নামত মহাত্মা গান্ধী এনৰেগা আঁচনিৰ অধীনত বিগত ২০২৩-২৪ বিত্তীয় বর্ষত আঠ লাখ ১৩ হেজাৰ ৬৭৪ টকা প্রকল্প ব্যয়ৰে এক আঁচনি গ্রহণ কৰা হৈছিল। বর্ক আইডি ০৪২৩০৬৬০০৮/এলডি/ ৯০১০৩২৪৪৭১ৰ এমজি এনৰেগাৰ কামটোত শ্রমিকৰ মজুৰিৰ শিতানত ছয় লাখ ৮৫ হেজাৰ ৪৪১ টকা আৰু সামগ্ৰীৰ শিতানত এক লাখ ২৮ হেজাৰ ২৩৩ টকা ধার্য কৰা হৈছিল ৷
এমজি এনৰেগা আঁচনিৰ এই কামটোৰ এখন ফলক কাঠপাৰা বজাৰৰ পাছফালে এখন দোকানৰ পিছফালৰ পকীবেৰতে লগাই স্থাপন কৰা হৈছিল। পৰিতাপৰ বিষয় যে বিত্তীয় বর্ষ ২০২৩-২৪ কাহানিবাই উকলিল তৎসত্ত্বেও এনৰেগাৰ এই আঁচনিখনৰ কামে আজি পর্যন্ত বিশেষ ধৰণে অগ্রগতি লাভ নকৰিলে। এমজি এনৰেগাৰ এই আঁচনিখন ‘কাঠপাৰা বজাৰৰ ভূমি উন্নয়ন’ বুলি উল্লেখ কৰা হৈছে যদিও স্থানীয় ৰাইজে জনোৱা মতে, এইটো বজাৰ ক্ষেত্ৰ নহয়, বজাৰৰ পাছফালৰ এটা পৰিত্যক্ত পথহে। সেই পথটোকে বজাৰৰ ফিল্ড উন্নয়নৰ নামৰ আঁচনিখনৰ ধনৰে নিৰ্মাণ কৰাৰ কথা আছিল।
স্থানীয় ৰাইজে অভিযোগ কৰা অনুসৰি, কেইমাহমানৰ আগতে পৰিত্যক্ত পথটোত তিনি ট্রাকমান মাটি পেলাইছিল যদিও তাৰ পাছত আৰু কোনো ধৰণৰ কাম নকৰিলে। সেই আঁচনিখনৰ নামত আবণ্টিত টকা কাম নকৰাকৈয়ে ভুৱা শ্রমিক আৰু ভুৱা জৱকাৰ্ডৰ জৰিয়তে লাওখোৱা উন্নয়ন খণ্ড আৰু কাঠপাৰা গাঁও পঞ্চায়তৰ বিষয়া-কৰ্মচাৰীৰ লগতে পঞ্চায়ত প্রতিনিধিয়ে আত্মসাৎ কৰা বুলিও ৰাইজে সন্দেহ প্রকাশ কৰিছে। যিহেতু এই আঁচনিৰ কামৰ দায়িত্বত থকা পঞ্চায়ত প্রতিনিধিসকল এতিয়া কৰ্মৰত অৱস্থাত নাই। তেওঁলোকৰ কাৰ্যকাল কাহানিবাই উকলি গৈছে।
সেয়েহে ৰাইজে এই দুর্নীতিৰ বাবে জবাবদিহি কৰিবলৈ তেওঁলোকক পঞ্চায়ত কার্যালয়তো বিচাৰি নাপায়। কাঠপাৰাৰ এই এনৰেগাৰ আঁচনিখনৰ ধন আবণ্টন দিয়াৰ পাছতো কিয় কোনো কাম কৰা নহ’ল, সেই আঁচনিৰ ধন কাম নকৰাকৈয়ে আত্মসাৎ কৰা হ’ল নেকি এই সন্দর্ভত এক তদন্তৰ ব্যৱস্থা কৰিবলৈ স্থানীয় ৰাইজে জিলা আয়ুক্ত নৰেন্দ্ৰ কুমাৰ শ্বাহক ৰাইজে দাবী জনাইছে।