Hindenburg Research shut down:
ভাৰতীয় উদ্যোগপতি গৌতম আদানী মালিকানাধীন আদানী গ্ৰুপৰ বৃহৎ কেলেংকাৰি ফাদিল কৰি তোলপাৰ লগোৱা আমেৰিকাৰ হিণ্ডেনবাৰ্গ ৰিচাৰ্ছ প্রতিষ্ঠান অচিৰেই বন্ধ হ’ব। বিশ্বজুৰি চৰ্চিত প্রতিষ্ঠানটো বন্ধ কৰা হ’ব বুলি ঘোষণা কৰিছে স্বয়ং প্রতিষ্ঠানটোৰ প্ৰতিষ্ঠাপক নাথান এণ্ডাৰছনে। হিন্ডেনবাৰ্গৰ ৱেবছাইটত তেওঁ আকস্মিকভাবে এই কথা ঘোষণা কৰি কয়, ‘মই হিন্ডেনবার্গ গৱেষণা (প্রতিষ্ঠান) বন্ধ কৰাৰ সিদ্ধান্ত লৈছো।
আমাৰ হাতত থকা কাম শেষ হোৱাৰ পাছতে প্রতিষ্ঠানটো বন্ধ কৰা হ’ব।’ লক্ষ্যণীয় যে নব-নির্বাচিত মার্কিন ৰাষ্ট্ৰপতি ড’নাল্ড ট্রাম্পে কাৰ্যভাৰ গ্ৰহণ কৰিবলৈ কিছুদিন বাকী থকা অৱস্থাত এণ্ডাৰছনে হিন্ডেনবার্গ বন্ধ কৰিবলৈ লোৱা সিদ্ধান্তত বহুতে ৰহস্যৰ গোন্ধ পাইছে।
কাৰণ অলপতে দেশখনৰ এজন প্ৰভাৱশালী ৰিপাব্লিকান সাংসদ লেন্স গুডেনে আদানী গ্ৰুপৰ বিৰুদ্ধে তদন্তৰ প্ৰয়োজনীয়তাক লৈ প্রশ্ন কৰি মার্কিন মহাধিবক্তা মেৰিক বি গার্লেণ্ডলৈ পত্ৰ প্ৰেৰণ কৰে। মহাধিবক্তালৈ প্ৰেৰণ কৰা এই পত্ৰত ৰিপাব্লিকান সাংসদজনে আশংকা কৰে যে আদানী গ্ৰুপৰ বিৰুদ্ধে তদন্ত কৰাৰ দৰে কাৰ্যই আমেৰিকা যুক্তৰাষ্ট্ৰৰ স’তে সহযোগী দেশসমূহৰ সম্পৰ্কত ব্যাঘাত জন্মাব।
দলৰে সাংসদজনে এনে আশংকা কৰাৰ সময়তে নব-নির্বাচিত ৰাষ্ট্ৰপতি ট্রাম্পে শপত গ্ৰহণৰ প্ৰস্তুতি অব্যাহত ৰাখিছে। অহা ২০ জানুৱাৰীত তেওঁ বিশ্বৰ বহুকেইখন ৰাষ্ট্ৰৰ ৰাষ্ট্ৰপ্ৰধান সকলৰ উপস্থিতিত শপত গ্ৰহণ কৰিব। অৱশ্যে হিন্ডেনবার্গ প্রতিষ্ঠান বন্ধৰ সিদ্ধান্ত গ্রহণ কৰাৰ স’তে কোনো নির্দিষ্ট ভাবুকি বা ব্যক্তিগত সমস্যা জড়িত নাই বুলি এণ্ডাৰছনে সদৰী কৰিছে।
উল্লেখ্য যে ২০২২ত প্ৰথমবাৰৰ বাবে হিন্ডেনবার্গে আদানী গ্রুপক লক্ষ্য কৰি লয়। ভাৰতীয় প্রতিষ্ঠানটো বিভিন্ন অনিয়মত জড়িত থকা বুলি মার্কিন প্রতিষ্ঠানটোৱে অভিযোগ উত্থাপন কৰে। অৱশ্যে হিন্ডেনবাৰ্গৰ অভিযোগ কেৱল মিথ্যাচাৰ আৰু ভাৰতৰ ওপৰত গণনাকৃতভাৱে কৰা আক্রমণ আখ্যা দি আহিছে আদানী গ্রুপে। এনে অৱস্থাতে যোৱা বছৰৰ আগষ্টত পুনৰ আদানী গ্ৰুপৰ ‘অনিয়ম’ ফাদিল কৰি তীব্ৰ জোঁকাৰণিৰ সৃষ্টি কৰে হিন্ডেনবার্গে।
আনকি প্রতিষ্ঠানটোৱে ভাৰতৰ শ্বেয়াৰ বজাৰৰ অধ্যক্ষ মাধৱী পুৰীকো লক্ষ্য কৰি লয়। আনহাতে, হিন্ডেনবার্গে লক্ষ্য কৰি লোৱা সম্পৰ্কত উদ্যোগপতি আদানীয়ে কয়, ‘বিদেশৰ পৰা হোৱা এই আক্রমণ সচৰাচৰ বিত্তীয় আঘাতসদৃশ নহয়। ই আছিল আমাৰ বিত্তীয় সুস্থিৰতা নাশ কৰা আৰু দেশক ৰাজনৈতিকভাৱে অস্থিৰ কৰিবলৈ কৰা এক দ্বৈত আক্রমণ।’
উল্লেখ্য যে,২০১৭ত প্ৰতিষ্ঠা কৰি বিশ্বজুৰি আলোড়ন তোলে হিন্ডেনবার্গ ৰিচাৰ্ছ প্রতিষ্ঠান ৷ হিন্ডেনবার্গ হৈছে এটা ফৰেনচিক আর্থিক গৱেষণা সংস্থা। সংস্থাটোৱে বিভিন্ন কোম্পানীৰ শ্বেয়াৰ, ঋণ আদি বিশ্লেষণ কৰে। ২০১৭ত নাথান এণ্ডাৰছনে হিন্ডেনবার্গ ৰিচাৰ্ছ প্রতিষ্ঠা কৰে।
সংস্থাটোৰ ৱেবছাইটত নিজৰ কৰ্ম-পৰিচয় উল্লেখ কৰি লিখা আছে, ‘অর্থনীতিত মানৱসৃষ্ট বিপৰ্যয় ৰোধ কৰাৰ উদ্দেশ্যে বিভিন্ন কোম্পানীৰ দুর্নীতি, অনিয়ম, অব্যৱস্থাপনা আৰু গোপন লেনদেনৰ ওপৰত আমি দৃষ্টি ৰাখো।’ এনে ঘোষণাৰে কাৰ্যকলাপ আৰম্ভ কৰা প্ৰতিষ্ঠানটোৱে কেৱল আদানী গ্রুপ বা ‘ছেবি’ৰ অধ্যক্ষাৰ বিৰুদ্ধে অনিয়মৰ অভিযোগ উত্থাপন কৰাই নহয়, আন কেতবোৰ ব্যক্তিগত প্রতিষ্ঠানৰ বিৰুদ্ধেও বিগত সময়ত গুৰুতৰ অভিযোগ উত্থাপন কৰে।
প্ৰতিষ্ঠানটোৰ ‘কোপদৃষ্টি’ত পৰা এনে আন এটা প্রতিষ্ঠান হ’ল বৈদ্যুতিক ট্রাক তৈয়াৰকাৰী নিকোলা কৰ্প’ৰেছন। প্রতিষ্ঠানটোৰ নাম ১৯৩৭ৰ ছয় মে’ত নিউ জাৰ্ছিৰ আকাশমার্গত জ্বলি ধ্বংস হোৱা এখন বিমানৰ পৰা লোৱা হৈছে। ‘হিন্ডেনবার্গ এয়াৰশ্বিপ’ নামৰ সেই ধ্বংসপ্রাপ্ত বিমানখন আছিল জার্মানীৰ এখন বিলাসী বিমান। ভয়াৱহ দুর্ঘটনাটোত যাত্রী আৰু বিমান কর্মচাৰীসহ ৩৬ জন লোকৰ প্ৰাণহানি ঘটে।
এই অভিশপ্ত বিমানখনৰ নামৰে হিন্ডেনবাৰ্গ ৰিচাৰ্ছৰ নামকৰণ কৰে এণ্ডাৰছনে। সংস্থাটো পৰিচালনাত তেওঁ নিজা আর্জিত ধন ব্যয় কৰে বুলি প্রকাশ কৰি আহিছে। নাথান কানেক্টিকা বিশ্ববিদ্যালয়ৰ পৰা আন্তর্জাতিক ব্যৱসায়ৰ স্নাতক ডিগ্রীধাৰী। এই ডিগ্রী গ্ৰহণ কৰাৰ পাছত তেওঁ ফেক্টছেট ৰিচাৰ্ছ ছিষ্টেমছ ইনকৰ্প’ৰেট নামৰ তথ্য-প্রযুক্তি প্রতিষ্ঠানৰ বিত্তীয় শাখাত যোগদান কৰে। অৱশ্যে এটা সংবাদ সংস্থাৰ বাতৰি মতে, এণ্ডাৰছনে একালত ইজৰাইলত গাড়ীচালকৰূপে নিয়োজিত আছিল।