Delhi দিল্লীয়ে পালে চতুৰ্থ গৰাকী মহিলা মুখ্যমন্ত্ৰী
অৱশেষত বহুতো জল্পনা কল্পনাৰ অন্ত পেলায় দিল্লীত আজি ঘোষণা কৰা হ’ল নতুন মুখ্যমন্ত্ৰীৰ নাম ।দিল্লীৰ নতুন মূখ্যমন্ত্ৰী হিচাপে বাছনি কৰা হৈছে শালিমাৰ বাগৰ বিধায়ক ৰেখা গুপ্তা ।
আজি সন্ধিয়া নৱনিৰ্বাচিত বিধায়কসকলৰ সন্মুখত সংসদীয় দলৰ মুৰব্বী হিচাপে তেওঁৰ নাম ঘোষণা কৰা হয়।
বৃহস্পতিবাৰে দুপৰীয়া ১২ বজাত ৰামলীলা ময়দানত শপত গ্ৰহণ কৰিব নৱনিৰ্বাচিত মুখ্যমন্ত্ৰী ৰেখাৰ লগতে নতুন মন্ত্ৰীসভাৰ সদস্যসকলে ।
ব্যৱসায়ী সমাজৰ প্ৰতিনিধি ৰেখা এসময়ত সংঘৰ ছাত্ৰ সংগঠন এবিভিপিৰ নেত্ৰী আছিল। তেওঁ দিল্লী বিশ্ববিদ্যালয় ছাত্ৰ সন্থাৰ সভাপতি পদৰ বাবেও নিৰ্বাচন জয়ী হৈছিল।
অৱশ্যে, তেওঁ এইবাৰ প্ৰথমবাৰৰ বাবে বিধায়ক হ’বলৈ সক্ষম হৈছে । নতুন দিল্লীৰ আসনত আম আদমি পাৰ্টিৰ মুৰব্বী অৰবিন্দ কেজৰিৱালক পৰাস্ত কৰা প্ৰবেশ বাৰ্মাই আজি সংসদীয় দলৰ বৈঠকত ৰেখাৰ নাম প্ৰস্তাৱ কৰে।
বুধবাৰে পুৱা বিজেপিৰ সৰ্বোচ্চ নীতি নিৰ্ধাৰক মঞ্চ ‘সংসদীয় ব’ৰ্ড’ৰ বৈঠকত মুখ্যমন্ত্ৰীৰ নাম চূড়ান্ত কৰিবলৈ বৈঠকত মিলিত হয়।
অৱশ্যে, নৰেন্দ্ৰ মোডী-অমিত শ্বাহৰ দলে সেই বৈঠকত কি সিদ্ধান্ত লোৱা হৈছিল সেই বিষয়ে একো কোৱা নাছিল।
তাত ‘কেন্দ্ৰীয় পৰ্যবেক্ষক’ হিচাপে ৰবি শংকৰ প্ৰসাদ আৰু ওম প্ৰকাশ ধনখৰৰ নাম ঘোষণা কৰা হয় । সন্ধিয়া বিধায়িনী দলৰ বৈঠকত নৱ নিৰ্বাচিত বিধায়কসকলৰ সন্মুখত দুয়োজন কেন্দ্ৰীয় পৰ্যবেক্ষকে আনুষ্ঠানিকভাৱে নামবোৰ ঘোষণা কৰে ।
প্ৰসংগত ২৭ বছৰৰ পাছত দিল্লীত বিজেপি পুনৰ ক্ষমতালৈ আহিছে। দিল্লীৰ ৭০ খন বিধানসভা আসনৰ ভিতৰত বিজেপিয়ে ৪৮ খন আসন লাভ কৰে।
আনহাতে, অৰবিন্দ কেজৰিৱালৰ আম আদমী পাৰ্টি (আপ) ১০ বছৰ শাসনত থকাৰ পাছত পৰাজিত হয়। উল্লেখ্য যে তেওঁলোকে মাত্ৰ ২২ খন আসনহে লাভ কৰে।
অৱশেষত বহু জল্পনা কল্পনাৰ অন্ত পেলায় আজি ঘোষণা কৰা হ’ল বিজেপিৰ নৱনিৰ্বাচিত মুখ্যখ্যমন্ত্ৰীৰ নাম । সুষমা, শীলা দীক্ষিত , আতিশী মাৰ্লেনাৰ পাছত দিল্লীয়ে পালে চতুৰ্থ গৰাকী মহিলা মুখ্যমন্ত্ৰী ।
