Twice the national rate as Assam:
অসমত শিক্ষানুষ্ঠান আধাতে ত্যাগ কৰা ছাত্ৰ-ছাত্ৰীৰ বিষয়টোৱে অতি গুৰুতৰ ৰূপ গ্ৰহণ কৰিছে। বিনামূলীয়া পাঠ্যপুথি-বিনামূলীয়া গণবেশ যোগান, মধ্যাহ্ন ভোজন আদিয়েও জটিল সমস্যাটো সমাধানত ব্যর্থ হৈছে। বিশেষকৈ মাধ্যমিক স্তৰত সমস্যাটো অতি গভীৰ বুলি বিবেচিত হৈছে। আকৌ ছাত্ৰীৰ মাজত এই সমস্যাটো অধিক জটিল বুলিও পৰিগণিত হৈছে। ইয়াৰ পৰিপ্ৰেক্ষিতত নিযুত মইনা, স্কুটী যোগানৰ দৰে আঁচনি অসম চৰকাৰে ৰূপায়ণ কৰিছে।
অসমত আধাতে শিক্ষানুষ্ঠান ত্যাগ কৰা ছাত্ৰ-ছাত্ৰীৰ হাৰ ৰাষ্ট্ৰীয় হাৰৰ তুলনাত যথেষ্ট বেছি। সেয়েহে কেন্দ্ৰীয় চৰকাৰৰ শিক্ষা মন্ত্রণালয়ে এই হাৰ হ্ৰাস কৰিবলৈ অসম চৰকাৰক বাৰম্বাৰ নিৰ্দেশনা দি আহিছে।জটিল হৈ পৰা সমস্যাটোৰ প্ৰকৃত কাৰণ নিৰ্ধাৰণ আৰু তাৰ ভিত্তিত ল’বলগীয়া ব্যৱস্থাৰ পৰামৰ্শ বিচাৰি অৱশেষত ৰাজ্য চৰকাৰৰ বিদ্যালয় শিক্ষা বিভাগে এখন উচ্চস্তৰীয় সমিতি শেহতীয়াকৈ গঠন কৰে। বিদ্যালয় শিক্ষা বিভাগৰ অতিৰিক্ত সচিব কৃষ্ণা বৰুৱাৰ অধ্যক্ষতাত গঠিত সমিতিৰ সদস্য আহ্বায়ক হ’ল সমগ্র শিক্ষা অসমৰ অ’এছডি খনীন্দ্র দাস।
সমিতিৰ সদস্যসকল হ’ল মাধ্যমিক শিক্ষা সঞ্চালকালয়ৰ উপ-সঞ্চালক দীপিকা চৌধুৰী, এছচিইআৰটি অসমৰ উপ-সঞ্চালক পিয়ানু বৰুৱা, ইউনিছেফৰ অপৰাজিত চৌধুৰী আৰু চেন্ট্রেল স্কুৱেৰ ফাউণ্ডেছনৰ ষ্টেষ্ট লীড ইন্দ্ৰনাথ চেটার্জী। মুখ্যমন্ত্ৰীৰ তৎপৰতাত গঠন কৰা এই সমিতিয়ে অহা ১৫ আগষ্টৰ ভিতৰত তেওঁলোকৰ প্ৰতিবেদন দাখিল কৰিব লাগিব।
উল্লেখ্য যে ইউডাইচ প্লাছৰ তথ্য অনুসৰি, ২০১৯-২০ত মাধ্যমিক স্তৰত অসমত আধাতে শিক্ষানুষ্ঠান এৰা শিক্ষাৰ্থীৰ হাব আছিল ৩২.৯ শতাংশ। ইয়াৰ বিপৰীতে ৰাষ্ট্ৰীয় হাৰ আছিল ১৫.১ শতাংশ। ২০২০-২১ত অসমৰ এই হাৰ আছিল ২০.৭ শতাংশ আৰু ৰাষ্ট্ৰীয় হাৰ আছিল ১২.৩ শতাংশ। ইউডাইচ প্লাছৰ শেহতীয়া ২০২৩-২৪ৰ প্ৰতিবেদন মতে, অসমত মাধ্যমিক স্তৰত আধাতে শিক্ষানুষ্ঠান ত্যাগ কৰা ছাত্ৰীৰ হাৰ হ’ল ১৯.৫ শতাংশ। ইয়াৰ বিপৰীতে ৰাষ্ট্ৰীয় হাৰ হ’ল ৯.৪ শতাংশ। অর্থাৎ ৰাষ্ট্ৰীয় হাৰৰ দুগুণ ছাত্ৰীয়ে অসমত আধাতে শিক্ষানুষ্ঠান ত্যাগ কৰি আহিছে। ছাত্রীয়ে আধাতে শিক্ষা জীবন ত্যাগ কৰা বিষয়টো ৰাজ্যিক আৰু ৰাষ্ট্ৰীয় স্তৰত বিশেষ গুৰুত্বসহকাৰে লৈ অহা হৈছে।
ছাত্রীসকলক শৈক্ষিক জীৱনত ধৰি ৰখাৰ বাবেই অসম চৰকাৰে নিযুত মইনা আঁচনিখন ৰূপায়ণ কৰিছে। এইখন আঁচনিৰ আধাৰতে অষ্টমৰ পৰা দশম শ্রেণীলৈ অধ্যয়ন কৰি অহা ছাত্রসকলকলৈও আন এখন আঁচনিৰ পৰিকল্পনা অসম চৰকাৰে কৰিছে। সমস্যাটোৰ বিতং প্রতিবেদন প্রস্তুতৰ বাবে গঠন কৰা সমিতিখনৰ পৰামৰ্শৰ ভিত্তিতে তেনে আঁচনি ৰাজ্য চৰকাৰে গ্ৰহণৰ সম্ভাৱনাও আছে।
চৰকাৰৰ বাল্যবিবাহ বিৰোধী অভিযানৰ অন্যতম এটা উদ্দেশ্য হ’ল ছোৱালীসকলক শৈক্ষিক জীৱনত ধৰি ৰখা। বাল্যবিবাহ প্ৰতিৰোধৰ ফলত সমস্যাটোৰ কিমান সমাধান হৈছে তাৰো উল্লেখ এই প্রতিবেদনত কৰা হ’ব।