Ex Klo welfare and Development society:
অসম আৰু পশ্চিম বংগত কমতাপুৰ লিবাৰেচন অৰ্গেনাইজেচন চমুকৈ কেএলঅৰ নেতৃত্বক আৱদ্ধ কৰি ৰাখি শাসকীয় চৰকাৰে আলোচনাৰ নামত প্ৰতাৰণা কৰাৰ অভিযোগ কৰিছে প্ৰাক্তন কেএলঅ কল্যাণ আৰু উন্নয়ন সমাজে ৷
আজি বঙাইগাঁও প্ৰেছ ক্লাবত এক সংবাদ মেলৰ আয়োজন কৰি সংগঠনৰ নেতৃবৰ্গই আলোচনাৰ নামত শাসকীয় চৰকাৰে চৰম প্ৰতাৰণা কৰা বুলি অভিযোগ কৰে । সংবাদ মেলত সংগঠনটোৰ নেতৃত্বই আলোচনা প্ৰক্ৰিয়াৰ মন্থৰ গতিক লৈ অসন্তুষ্টি ব্যক্ত কৰি কয় যে চৰকাৰে আলোচনাৰ প্ৰতিশ্ৰুতিৰে ম্যানমাৰৰ পৰা কেএলঅৰ কেন্দ্ৰীয় নেতৃত্বক অসমত আনি তিনি বছৰে আৱদ্ধ কৰি ৰখা হৈছে ৷ দীৰ্ঘ দিন ধৰি গুৱাহাটীত অসম আৰক্ষীৰ বিশেষ শাখাৰ জিন্মাত কেএলঅ নেতৃত্বক আৱদ্ধ কৰি ৰাখি চৰকাৰে আলোচনাৰ নামত চৰম ভেকোভাওনা কৰিছে ৷
একে সময়তে কেএলঅৰ সাধাৰণ সম্পাদক কৈলাশ কোঁচক পশ্চিম বংগ চৰকাৰে চুবুৰীয়া ৰাজ্যখনত প্ৰায় চাৰি বছৰ ধৰি আৱদ্ধ কৰি ৰাখিছে । বৰ্তমান সময়ত কেন্দ্ৰীয় চৰকাৰৰ লগতে অসম আৰু পশ্চিম বংগ চৰকাৰে কেএলঅৰ সৈতে আলোচনা আৰু কোচ ৰাজবংশী সমস্যা সমাধানত গুৰুত্ব আৰোপ কৰা নাই ৷ চৰকাৰে কেএলঅৰ সৈতে আলোচনাৰ নাটক কৰি ৰাজনৈতিক লুনাফা লাভত ব্যস্ততা হৈ পৰিছে । ইফালে পশ্চিম বংগ আৰক্ষীয়ে আৱদ্ধ কৰি ৰখা কেএলঅ নেতৃত্বক অসমলৈ আনি সংগঠনটোৰ সৈতে আলোচনা প্ৰক্ৰিয়া সম্পূৰ্ণ কৰি শীঘ্ৰে শান্তি চুক্তিৰ জৰিয়তে কোচ ৰাজবংশী সকলোৰ সমস্যা সমাধানৰ ব্যৱস্থা কৰিবলৈ সংবাদ মেলত দাবী জনায় সংগঠনটোৱে ৷
আনহাতে কেএলঅৰ সৈতে আলোচনাৰ নামত নতুনকৈ সংগঠন জন্ম দি দালালী কৰা সকলোক প্ৰাক্তন কেএলঅ সদস্য সকলে সকিয়নি প্ৰদান কৰে ৷ আনহাতে আক্ৰাছুকে ধৰি বহুধাবিভক্ত কোচ ৰাজবংশী দল সংগঠনসমুহক ঐক্যৱদ্ধ হোৱাৰ বাবে সংবাদ মেলত উপস্থিত নেতৃবৰ্গই আহ্বান জনায় । ইফালে বিটিআৰ অঞ্চলত বাসবাস কৰা কোচ ৰাজবংশী লোকসকলৰ সম উন্নয়নৰ দাবী উত্থাপন কৰি সংবাদ মেলত উপস্থিত নেতৃত্বই কয় যে বিটিআৰ অঞ্চলত কোচ ৰাজবংশীসকল উন্নয়ণৰ পৰা বঞ্চিত হৈ আহিছে ৷
জনগোষ্ঠীটোৰ লোকসকল শৈক্ষিক সামাজিক আৰু ৰাজনৈতিকভাৱে পিছ পৰি আছে ৷ সমগ্ৰ অঞ্চলত কোচ ৰাজবংশী লোক সকল মৌলিক অধিকাৰৰ অধিকাৰৰ পৰা বঞ্চিত হৈ আহিছে ৷ অঞ্চলটোত গৰিষ্ঠসংখ্যক কোচ ৰাজবংশী লোক থকাৰ পিছতো সাংবিধানিক সংৰক্ষণ নীতিৰ বাবে জনগোষ্ঠীটোৱে ৰাজনৈতিক অধিকাৰৰ পৰা বঞ্চিত হৈ আহিছে ।
এনে ক্ষেত্ৰত বিটিচিৰ সংৰক্ষণ মুক্ত ( মুকলি ) সমষ্টিসমুহত প্ৰত্যেক ৰাজনৈতিক দলে প্ৰাৰ্থীত্ব প্ৰদানৰ ক্ষেত্ৰত কোচ ৰাজবংশীসকলক প্ৰাধান্য প্ৰদান কৰা উচিত। সংগঠনটোৱে গুমা , ফকিৰাগ্ৰাম আৰু থুৰীবাৰী সমষ্টিত জনগোষ্ঠীটোৰ লোকক প্ৰাৰ্থীত্ব দিয়াৰ বাবে প্ৰতিটো ৰাজনৈতিক দলক আহ্বান জনায় ।
সংবাদ মেলত কোচ ৰাজবংশীসকলৰ উন্নয়ণৰ স্বাৰ্থত পৃথক কমতাপুৰ ৰাজ্য গঠন আৰু জনজাতিকৰণৰ দাবী জনায়। জনগোষ্ঠীটোৰ দীৰ্ঘ দিনীয়া সমস্যা সমাধানৰ স্বাৰ্থত মুখ্যমন্ত্ৰী ড: হিমন্ত বিশ্ব শৰ্মাৰ হস্তক্ষেপ বিচাৰি শীঘ্ৰে আলোচনাৰ বাবে উপযুক্ত পদক্ষেপ গ্ৰহণৰ দাবী জনায় সংবাদ মেলত উপস্থিত প্ৰাক্তন কেএলঅ নেতৃবৰ্গই ।
সংবাদ মেলত উপস্থিত থাকে প্রাক্তন কে এল অ কল্যাণ আৰু উন্নয়ন সমাজৰ উপদেষ্টা বিমল ৰায়,সভাপতি মৃদুল ৰায়,সম্পাদক ৰাহুল ৰায়,কায্যকৰী সভাপতি ৰিবুৰাম ৰায়,সহ-সম্পাদক প্রদিপ ৰায়,উপ-সভাপতি ধননজ্ঞয় ৰায়,চিৰাং জিলা সভাপতি নিভাস বর্মন,কোকৰাঝাৰ জিলা উপ-সভাপতি হিতেশ বর্মন, আদি উপস্থিত থাকে ৷
