Gujarat:
চৰকাৰী কিছুসংখ্যক যানবাহনক আবদ্ধ কৰিয়েই গুজৰাটৰ বডোডৰা জিলা প্রশাসনে ততাতৈয়াকৈ নির্মাণ কৰিলে এখন প্রকাণ্ড পকী দেৱাল। উল্লেখ্য যে অলপতে বডোডৰা জিলাৰ মহীসাগৰ নৈৰ ওপৰত থকা এখন দলঙৰ একাংশ খহি কমেও ২০ জন লোকৰ প্রাণহানি ঘটে। দলংখন খহি পৰাত ব্যস্ত দলংখনৰে যাত্রা কৰি থকা একাংশ যানবাহন নৈত বাগৰি পৰি এই শোকাৱহ দুর্ঘটনা সংঘটিত হয়।
আন যানবাহন যাতে অজ্ঞাতবশতঃ দলংখনৰে যাত্রা নকৰে তাৰ বাবে জিলা প্রশাসনে দলংখনৰ দুয়ো মূৰত পকী দেৱাল নিৰ্মাণৰ সিদ্ধান্ত লয় তেতিয়ালৈ সকলো ঠিকে আছিল যদিও এটা মুৰত দেৱাল নিৰ্মাণ সম্পূৰ্ণ কৰাৰ লগে লগে নিমিলা অংকৰ সৃষ্টি হয়। কাৰণ ততাতৈয়াকৈ দেবাল নিৰ্মাণ কৰিবলৈ লৈ প্রশাসনে এটা ডাঙৰ ভুল কৰে। এই দেৱাল খৰধৰকৈ নিৰ্মাণ কৰাত প্রশাসনৰে একাংশ যানবাহন দলংখনৰ সেইটো মুৰত আবদ্ধ হৈ পৰে।
এই যানবাহনসমূহ দুর্ঘটনাগ্রস্ত লোকসকলৰ উদ্ধাৰ কাৰ্যত ব্যৱহাৰ কৰা যানবাহন আছিল। উদ্ধাৰ কাৰ্য চলি থকাৰ সময়তে ৰাজ্যিক পথ আৰু অট্টালিকা বিভাগৰ নিৰ্দেশত দলংখনৰ মূৰত পকী দেৱাল নিৰ্মাণ কৰা হয়। দেৱাল নির্মাণ সম্পূৰ্ণ হোৱাৰ পাছতহে সংশ্লিষ্টসকলে লক্ষ্য কৰে যে এই দেৱাল নিৰ্মাণৰ ফলত দলংখনৰ মূৰত উদ্ধাৰ কার্যত ব্যবহৃত যানবাহনসমূহ আবদ্ধ হৈ পৰে। এই কথা প্ৰচাৰ হোৱাত স্থানীয় লোকসকল ক্ষুব্ধ হৈ উঠে। এনেদৰে পৰিকল্পনাহীন কাম কৰি প্ৰশাসনৰ একাংশই ৰাজহুৱা ধন অপচয় কৰি অহা বুলি স্থানীয় একাংশ লোকে ক্ষোভ প্রকাশ কৰিছে।
উপযুক্ত পৰিকল্পনাৰ অভাৱত চৰকাৰী যানবাহন আবদ্ধ হ’বলগীয়া হ’ল বুলি স্থানীয় লোকে মন্তব্য কৰিছে। প্ৰশাসনৰ কাম-কাজৰ ই এটা নমুনা বুলি মন্তব্য কৰি স্থানীয় এজন লোকে কয়, ‘আমাৰ প্রশাসনে কেনেদৰে কাৰ্য সম্পাদন কৰে ই হৈছে তাৰ এটা উদাহৰণ। এটা ডাঙৰ কৰণ ঘটনাৰ পাছতো প্রশাসনে অবিবেচকতাৰ পৰিচয় দিলে।’ লক্ষ্যণীয়ভাবে আবদ্ধ হৈ পৰা যানবাহনসমূহ মোকলাই নিয়াৰ বাবে নৱনির্মিত দেৱাল ভঙাৰ বাহিৰে প্ৰশাসনৰ ওচৰত আন একো উপায় নাই।