Conflict between two management committees at Batadrava Than:
মহাপুৰুষ শ্ৰীমন্ত শংকৰদেৱৰ পবিত্ৰ জন্মস্থান বটদ্ৰৱাৰ ইতিহাস প্রসিদ্ধ শ্রীশ্রী বটদ্ৰৱা থানৰ পৰিচালনা সমিতি কেন্দ্রিক সংঘাত অব্যাহত আছে। দুখনকৈ পৰিচালনা সমিতিয়ে নিজকে বৈধ বুলি ঘোষণা কৰি পৰস্পৰে পৰস্পৰৰ বিৰুদ্ধে সোচ্ছাৰ হৈ থকাত থানখনৰ প্ৰকৃত উন্নয়নত ব্যাঘাত জন্মা পৰিলক্ষিত হৈছে।
দুয়োখন সমিতিয়ে সমান্তৰালকৈ তৎপৰতা অব্যাহত ৰখাত থানখনত কৰ্মৰত সেৱক সকলো চৰম বিভ্রান্ত হৈ পৰা পৰিলক্ষিত হৈছে। থান পৰিচালনাকেন্দ্ৰিক সংঘাতৰ পৰিপ্ৰেক্ষিতত থানখনৰ উন্নয়ন মূলক আঁচনিসমূহৰ কাম সম্পূৰ্ণৰূপে স্থৱিৰ হৈ পৰিছে। তদুপৰি এই পৰিচালনা সমিতিকেন্দ্রিক সংঘাতৰ দুর্ভোগ ভুগিব লগা হৈছে বটদ্ৰৱা থানত নিযুক্ত হৈ সেৱা আগবঢ়াই থকা ২৫জনকৈ সেৱকে।
এই খেলিমেলিৰ বাবেই ২৫জনকৈ সেৱকে ন্যূনতম মাননিৰ ধনৰ পৰা যোৱা এপ্ৰিলৰ পৰাই বঞ্চিত হৈ থাকিব লগা হৈছে। ফলত থানৰ এই কৰ্মচাৰীসকলৰ পানীত হাঁহ নচৰা অৱস্থাৰ সৃষ্টি হৈছে। উল্লেখ্য যে বটদ্ৰৱা থানত নিয়োজিত অধিকাংশ কৰ্মচাৰীৰ ঘৰৰ অৱস্থা অতিশয় শোচনীয়। ন্যূনতম তিনি চাৰি হেজাৰ টকাৰ মাননিৰ বিনিময়ত দিনটোৰ ১০-১২ ঘণ্টাৰ অধিক সময় থানত সেৱা আগবঢ়াব লাগে তেওঁলোকে।
যোৱা মার্চলৈকে পূৰ্বৰ সমিতিয়ে দৰমহাৰ ধন মোকলাই দি আহিছিল যদিও যোৱা এক মে’ত এখন তদর্থ সমিতিয়ে বটদ্ৰৱা থান পৰিচালনা সমিতিৰ দায়িত্বভাৰ গ্ৰহণ কৰাৰ পাছৰে পৰা এই পর্যন্ত এই কর্মচাৰী (সেৱক) সকলে প্রাপ্য মাননিৰ পৰা বঞ্চিত হৈ থাকিব লগা হৈছে বুলি জানিব পৰা গৈছে।
স্মর্তব্য যে শ্ৰীশ্ৰী বটদ্ৰৱা থানৰ পৰিচালনা সমিতিকেন্দ্রিক সংঘাত সুদীর্ঘ দিন ধৰি অব্যাহত আছে। এখন তদর্থ সমিতি আনখন নির্বাচিত সমিতি। কিন্তু তদর্থ সমিতিক ন্যায়ালয়ে বৈধতা প্রদান কৰাত সেই সমিতিখনে কাৰ্যনিৰ্বাহ কৰি আছে যদিও আনখন সমিতিয়ে ও নিজকে বৈধ বুলি দাবী কৰি আহিছে। দুর্ভাগ্যজনক কথাটো হ’ল বটদ্ৰৱা থান পৰিচালনা সমিতিৰ সাধাৰণ সভা অনুষ্ঠিত কৰাৰ সময় কাহানিবাই পাৰ হৈছে যদিও এই পর্যন্ত সাধাৰণ সভা অনুষ্ঠিত কৰি এখন সর্বসম্মত পূর্ণাংগ সমিতি গঠনৰ প্ৰক্ৰিয়া এতিয়াও আৰম্ভহোৱা নাই।
ইতিহাস প্রসিদ্ধ থান খনিত পৰিচালনা সমিতি কেন্দ্রিক সংঘাতৰ অন্ত পেলোৱাৰ ক্ষেত্ৰত স্থানীয় বিধায়ক ৰূপক শৰ্মা আৰু জিলা আযুক্ত দেৱাশীষ শর্মাক বিশেষ পদক্ষেপ গ্রহণ কৰিবলৈ ভক্তপ্ৰাণ ৰাইজে আহ্বান জনাইছে।
শ্ৰীশ্ৰী বটদ্ৰৱা থান পৰিচালনা (তদর্থ) সমিতিখনে অহা ২৭জুলাইত এখন সাধাৰণ সভা আহ্বান কৰিছে। ইপিনে, ইয়াৰ মাজতে নিজকে বৈধ বুলি দাবী কৰি অহা আনখন সমিতি শ্ৰীশ্ৰী বটদ্ৰৱা থান পৰিচালনা সমিতিৰ সভাপতি যোগেন্দ্ৰ নাৰায়ণ দেৱ মহন্তই শ্রীশ্রী বটদ্ৰৱা থান পৰিচালনা সমিতিৰ সাধাৰণ সম্পাদক টিকেন্দ্রজিৎ দেৱ গোস্বামীৰ বিৰুদ্ধে বটদ্ৰৱা আৰক্ষী থানাত গোচৰ তৰা কাৰ্যই থান পৰিচালনা সমিতিৰ বিতৰ্কই নতুন মোৰ লৈছে।
সভাপতিজনে বটদ্ৰৱা আৰক্ষী থানাত সাধাৰণ সম্পাদক গোস্বামীৰ বিৰুদ্ধে দিয়া এজাহাৰত বিত্তীয় খেলিমেলি, নিয়ম অনুসৰি কাৰ্যনিৰ্বাহকৰ সভা অনুষ্ঠিত নকৰা আদি বিষয়সমূহ উল্লেখ কৰিছে। সম্প্রতি তেওঁ থান পৰিচালনা সমিতিৰ সভাপতি আদিৰ লগত কোনো ধৰণৰ যোগাযোগ ৰখা নাই। তেওঁলৈ কে’বাখনো পত্ৰ দিয়াৰ পাছতো থান পৰিচালনা সমিতিৰ ওচৰত হিচাপ দাখিলৰ কোনো ব্যৱস্থা নকৰিলে।
এজাহাৰত উল্লেখ কৰা হৈছে যে সাধাৰণ সম্পাদক গোস্বামীয়ে থান পৰিচালনা সমিতিৰ সংবিধান উলংঘা কৰি কাম কৰি আছে। সেয়ে সমগ্র বিষয়টো তদন্ত কৰি আইনী ব্যৱস্থা ল’বলৈ বটদ্ৰৱা আৰক্ষী থানাৰ আৰক্ষীক আহ্বান জনাইছে।