Bishanath Eviction Drive:
বিশ্বনাথত দ্বিতীয় দিনাও প্ৰশাসনৰ উচ্ছেদ অভিযান পুৱাৰে পৰা আৰম্ভ হয় ৷ ননকে জাপৰিগুৰিত ১৭৫ বিঘা চৰকাৰী ভূমি বেদখলমুক্ত কৰাৰ লক্ষ্যৰে প্ৰশাসনৰ বুলড’জাৰে পুৱাৰে ইটোৰ পিছত সিটোকৈ বাসগৃহ এফালৰ ভাঙি যায় ৷ চৰকাৰী ভূমিত থকা ৩০৯টা পৰিয়ালৰ ঘৰ উচ্ছেদ কৰিছিল দেওবাৰে।
আনহাতে একাংশ বেদখলকাৰীয়ে নিজেই খালী কৰিলে ঘৰ ৷ মনকৰিবলগীয়া যে আজি দ্বিতীয় দিনাৰ উচ্ছেদ অভিযান চলি থকাৰ মাজতে উচ্ছেদথলীত এক উত্তপ্ত পৰিস্থিতিৰ সৃষ্টি হয় ৷ একাংশ বেদখলকাৰীয়ে বৈদ্যুতিন মাধ্যমৰ সাংবাদিকে বাতৰি সংগ্ৰহ কৰি থকাৰ সময়তে সাংবাদিকলৈ চোচা হয় ৷ বিশেষকৈসাংবাদিকক টার্গেট কৰি আমছুৰ বিশ্বনাথ জিলাৰ প্ৰাক্তন সভাপতি ছাইফুদ্দিন আহমেদে বিভিন্ন কটু বাক্যবান নিক্ষেপ কৰে ৷ উদ্থাপিত অভিযোগ অনুসৰি সাংবাদিকৰ বিৰুদ্ধে স্থানীয় ৰাইজক উচটনি দিয়ে ছাইফুদ্দিনে ৷ অৱশ্যে আৰক্ষীৰ হস্তক্ষেপত পৰিস্থিতি নিয়ন্ত্ৰণ হয় যদিও চেপা উত্তেজনা অব্যাহত আছে ৷
উল্লেখ্য যে দেওবাৰৰ পৰা বিশ্বনাথৰ ননকে জাপৰিগুৰিৰ বেদখলীকৃত ১৭৫ বিঘা গোচৰণীয়া সংৰক্ষিত ভূমি (ভিজিআৰ)ত প্রশাসনে বেদখল উচ্ছেদ অভিযান আৰম্ভ কৰিছিল। ননকে জাপৰিগুৰি গাঁৱৰ ৩০৯ টা বেদখলীকৃত পৰিয়ালৰ ঘৰ-দুৱাৰক সামৰি এই উচ্ছেদ অভিযান আৰম্ভ হয়। দুজন অতিৰিক্ত আযুক্ত আৰু ছজনকৈ দণ্ডাধীশৰ তদাৰকীত তথা সহস্রাধিক আবক্ষ লোকৰ উপস্থিতিত পুৱা এই উচ্ছেদ অভিযান আৰম্ভ হয়। ২০ খন এক্সকেভেটৰ আৰু ১০ খন ট্রেক্টৰৰ সহায়ত প্ৰশাসনৰ উচ্ছেদকাৰ বাহিনীয়ে বেদখলকাৰীসকলৰ ঘৰ-দুৱাৰ এফালৰ পৰা ভাঙি পেলায়। তদুপৰি ৪০ বিঘা ভূমি আগুৰি থকা এখন চাহ বাগিচাতো উচ্ছেদ অভিযান চলে। অৱশ্যে উচ্ছেদিত স্থানত থকা এখন বিদ্যালয়, এটা মছজিদ আৰু এখন শ্মশানত বাতবি লিখা পৰলৈ উচ্ছেদ চলা নাই। ইপিনে, বেদখল্কাৰীসকললৈ প্রশাসনে উচ্ছেদৰ জাননী জাৰি কৰাৰ পাছতে একাংশ বেদখলকাৰীয়ে স্বেচ্ছাই বেদখলীকৃত ভূমিত নির্মাণ কৰা ঘৰ-দুৱাৰ ভাঙি বিভিন্ন বয়-বস্তু নিৰাপদ স্থানলৈ স্থানান্তৰ কৰিছে।
দেওবাৰে পুৱা লোকাৰণ্য পৰিৱেশত প্রশাসনে উচ্ছেদ অভিযান আৰম্ভ কৰাৰ সময়ত বহু বেদখলকাৰী কান্দোনত ভাঙিও পৰে। একাংশ বেদখলকাৰীয়ে দাবী কৰা অনুসৰি, বান আৰু খহনীয়াৰ কবলত পৰি তেওঁলোকে ননকে জাপৰিগুৰিক্ত আনে বেদখল কৰা ভূমি কম দামত ক্রয় কৰে। ৪০-৪৫ বছৰ ধৰি এই ভূমিত বসবাস কৰাৰ পাছত উচ্ছেদৰ সন্মুখীন হ’ব লগা হয় বুলি একাংশ বেদখলকাৰীয়ে জানিবলৈ দিছে। চৰকাৰী এই উচ্ছেদ অভিযানলৈ সহযোগিতা আগবঢ়াই একাংশ বেদখলকাৰীয়ে পুনৰ সংস্থাপনৰ দাবী উত্থাপন কৰিছে। পুনৰ সংস্থাপন নোপোৱা পর্যন্ত ননকে জাপৰিগুৰিৰ ভূমিতে তিৰপাল তৰি অস্থায়ীভারে থাকিব বুলিও একাংশ বেদখলকাৰীয়ে হুংকাৰ দিছে।
আনহাতে, উচ্ছেদিত স্থানত অসম সংখ্যালঘু সংগ্ৰাম পৰিষদৰ সাধাৰণ সম্পাদক নাজিৰ আহমেদে দাবী কৰে যে খহনীয়াত ক্ষতিগ্রস্ত হৈ এই লোকসকলে কাৰোবাৰ পৰা মাটি ক্রয় কৰে। এই লোকসকলক পুনৰ সংস্থাপিত কৰিবলৈও সংখ্যালঘু সংগ্রাম পৰিষদৰ নেতাজনে দাবী জনায়। একেদৰে একাংশ উচ্ছেদিত লোকে হুংকাৰ দি কয়, ‘আমাক গুলীয়াই দিয়ক। তথাপিও আমি এই স্থান এৰি নিদিওঁ। দিনত উচ্ছেদ চলালে যদিও সন্ধিয়া পুনৰ আমি ইয়াতে তিৰপাল তৰি থাকিম।’ পূৰ্বৰ জনতা দলৰ চৰকাৰে তেওঁলোকক এই ভূমি দিয়া বুলি দাবী কবি এই উচ্ছেদিতসকলে লগতে কয়, ‘আমাৰ থাকিবলৈ আৰু আন স্থান নাই। আমাক এই ভূমি জনতা চৰকাৰে দিছিল। চৰকাৰে আমি থাকিবলৈ আন ব্যৱস্থা কৰক। অন্যথা আমাক গুলীয়াই মাৰক। কিন্তু আমি কোনো কাৰণতে এই স্থান নেবো।’ স্বাভাৱিকতে একাংশ উচ্ছেদিত্তৰ এনে হুংকাৰক কেন্দ্ৰ কৰি উচ্ছেদস্থলীত চেপা উত্তেজনা বিৰাজ কৰে। অৱশ্যে উচ্ছেদ অভিযান শান্তিপূর্ণভাৱে অন্ত পৰিছিল দেওবাৰে ৷
