Cherrapunji:
বিশ্বৰে অন্যতম ভিজা বা সর্বাধিক হোৱা বৰষুণ স্থানৰ স্বীকৃতি হেৰুওৱাৰ উপক্রম ঘটিছে মেঘালয়ৰ চেৰাপুঞ্জীৰ। এইবাৰৰ বাৰিষাত একপ্রকাৰ ইতিহাসৰ ভিতৰতে কম বৰষুণ হয় চেৰাপুঞ্জীত। ভাৰতীয় বতৰ বিজ্ঞান বিভাগৰ তথ্য অনুসৰি, চলিত বর্ষব পহিলা জুনৰ পৰা ২০ আগষ্টৰ ভিতৰত চেৰাপুঞ্জীত হোৱা বৰষুণৰ পৰিমাণ আছিল প্রায় ৩,৫০০ মিলিমিটাৰ। অর্থাৎ স্বাভাৱিকতকৈ এইবাৰ প্রায় ৫০ শতাংশ কম বৰষুণ হয় চেৰাপুঞ্জীত। ইয়াৰ বিপৰীতে চলিত বর্ষত কর্ণাটক আৰু মহাৰাষ্ট্ৰৰ কেতবোৰ স্থানত চেৰাপুঞ্জীতকৈ অধিক পৰিমাণৰ বৰষুণ হয়। উদাহৰণ স্বৰূপে যোৱা ১৮ আগলৈকে কর্ণাটকৰ কড়াগু জিলাৰ সোমাৰপেটৰ ছুর্লাব্বিত প্রায় ৭,৩০০ মিলিমিটাৰ বৰষুণ হয় ।
এই অঞ্চলত সাধাৰণতে বাৰিষা ৫,৯১৫ মিলিমিটাবহে বৰষুণ হয়। এই তথ্য প্রকাশ কৰিছে ববি কীর্তি নামৰ এজন স্বতন্ত্র বতৰ বিশ্লেষকে। আনহাতে, তামিলনাডুৰ আৰ প্রদীপ জ’ন নামৰ এজন স্বতন্ত্র বতৰ বিশ্লেষকে সামাজিক মাধ্যম এক্সত প্ৰকাশ কৰা অনুসৰি, যোৱা পহিলা জুনৰ পৰা ৩১ জুলাইলৈ চেৰাপুঞ্জীত ২,০৪৭ মিলিমিটাৰ বৰষুণ হয়। ইয়াৰ বিপৰীতে উক্ত সময়ছেৱাত ছুর্লাব্বিত হোৱা বৰষুণৰ পৰিমাণ আছিল ৪,৯৩১ মিলিমিটাৰ। একেদৰে চলিত বর্ষাৰ প্রথম দুটা মাহত মহাৰাষ্ট্ৰৰ টামহিনিত দেশৰ ভিতৰতে সর্বাধিক ৫.৭৮৮ মিলিমিটাৰ বৰষুণ হয়।
একাংশই বিশ্লেষণ কৰা তথ্য অনুসবি, চলিত বাৰিষাত পহিলা জুনৰ পৰা ৩১ জুলাইৰ ভিতৰত চেৰাপুঞ্জীতকৈ দেশৰ কমেও ৩২টা স্থানত অধিক পৰিমাণৰ বৰষুণ হয়। গতিকে প্রশ্নৰ উদয় হৈছে যে মেঘালয় তথা উত্তৰ-পূবৰ অন্যতম পর্যটকৰ আকর্ষণস্থলী চেৰাপুঞ্জীয়ে বিশ্বৰ অন্যতম সিক্ত স্থানৰ স্বীকৃতি হেৰুৱাব নেকি?
উল্লেখ্য যে ইয়াৰ পূর্বে ১৯৬২ৰ বর্ষত চেৰাপুঞ্জীত সবাতোতকৈ কম বৰষুণ হৈছিল। উক্ত বছৰ জুন-ছেপ্টেম্বৰৰ সময়ছোৱাত চেৰাপুঞ্জীত হোৱা বৰষুণৰ পৰিমাণ ৫.৪০১ মিলিমিটাৰ আছিল বুলি শুভম নামৰ এজন স্বতন্ত্র বতৰ বিশ্লেষকে প্রকাশ কৰিছে। যদি এইবাৰৰ ২০ আগষ্ট পৰা অহা ৩০ ছেপ্টেম্বৰলৈ চেৰাপুঞ্জীত ১,৯০০ মিলিমিটাৰতকৈ কম বৰষুণ হয়, তেতিয়া সেইবাৰৰ বর্ষত অঞ্চলটেৰ বাবে সবাতোতকৈ শুকান বর্ষত পৰিণত হ’ব।
উল্লেখ্য যে চেৰাপুঞ্জীত বাৰিষাত স্বাভাৱিক বৰষুণৰ পৰিমাণ হৈছে ৮.১৩১.৯ মিলিমিটাৰ। অৱশ্যে কেৱল চেৰাপুঞ্জীয়েই নহয়, এইবাৰৰ বাৰিষাত মেঘালয়ৰ আন অঞ্চলসমূহতো উদ্বেগজনকভাৱে কম বৰষুণ হয়। মুঠতে ৰাজ্যখনত এইবাৰ ৪৩ শতাংশ বৰষুণৰ ঘাটিয়ে দেখা দিয়ে। এই ঘাটিৰ পৰিমাণ দেশৰ ভিতৰতে সর্বাধিক। পাহাৰীয়া ৰাজ্যখনৰ ১১ খন জিলাৰ দুখনত এইবাৰৰ বাৰিষাত বৰষুণৰ পৰিমাণ স্বাভাৱিকতকৈ ২০ৰ পৰা ৫৯ শতাংশ কম হয় ইয়াৰে দুখন জিলাত বৰষুণৰ পৰিমাণ ৬০ৰ পৰা ৯৯ শতাংশ পর্যন্ত কম হয়। এই ক্ষেত্রত সবাতোতকৈ ক্ষতিগ্রস্ত হোৱা জিলাখন হৈছে পশ্চিম জয়ন্তীয়া পাহাৰ জিলা। ২৬ আগষ্টলৈকে জিলাখনত বৰষুণৰ ঘাটিৰ পৰিমাণ ৭৫ শতাংশ আছিল। চেৰাপুঞ্জী আৰু মৌচিনৰামক সামৰি গঠিত পূৱ খাচী পাহাৰ জিলাতো এইবাৰৰ বাৰিষাত স্বাভাৱিকতকৈ ২৯ শতাংশ কম বৰষুণ হয়।
ADVERTISEMENT
