Ajit Pawar’s Funeral:
বৃহস্পতিবাৰে মহাৰাষ্ট্ৰৰ বাৰামতীত ৰাষ্ট্ৰীয় মৰ্যাদাৰে মহাৰাষ্ট্ৰৰ উপ-মুখ্যমন্ত্ৰী অজিত পাৱাৰৰ অন্তিম সৎকাৰ সম্পন্ন হয়। বিদ্যা প্ৰতিষ্ঠান মহাবিদ্যালয়ৰ খেলপথাৰত অনুষ্ঠিত হয় শেষকৃত্য অনুষ্ঠান।
মহাৰাষ্ট্ৰত এক নতুন ৰাজনৈতিক সমীকৰণ গঢ় লোৱাৰ সম্ভাৱনা প্রৱল হোৱাৰ সময়তে ৰাজ্যখনৰ ৰাজনীতিৰ ‘দাদা’ চিৰদিনলৈ হেৰাল। বুধবাৰে পুৱা এক ভয়াৱহ বিমান দুর্ঘটনাত ৰাজ্যখনৰ অন্যতম উপ-মুখ্যমন্ত্রী তথা এনচিপিৰ মুৰব্বী অজিত পাৱাৰসহ পাঁচজন ব্যক্তিৰ মৃত্যু হয়। মহাৰাষ্ট্ৰৰ বহুতে সমীহ কৰি ‘দাদা’ বুলি সম্বোধন কৰা উপ-মুখ্যমন্ত্রী পাৱাৰে গৃহ সমষ্টি বাৰামতীলৈ জিলা পৰিষদৰ নিৰ্বাচনৰ প্ৰচাৰ চলাবলৈ যাওতে বিমান দুর্ঘটনাত প্রাণ হেৰুৱায়। পাৱাৰে লিয়াৰজেট-৪৫ সংস্থাৰ এখন ক্ষুদ্র চার্টার্ড বিমানেৰে যাত্ৰা কৰোতে এই ভয়াৱহ দুর্ঘটনাত পতিত হয়।
আজি অজিত পাৱাৰৰ অন্ত্যেষ্টিক্ৰিয়াত প্ৰায় পাঁচ লক্ষাধিক সংখ্যক লোক উপস্থিত থাকে। সমগ্ৰ মহাৰাষ্ট্ৰৰ পৰা তেওঁৰ প্ৰশংসকসকল পুৱা ভাগাে পৰা বাৰামতীলৈ সোঁত বয় । অজিত পাৱাৰৰ অন্ত্যেষ্টিক্ৰিয়াত উপস্থিত আছিল কেন্দ্ৰীয় গৃহমন্ত্ৰী অমিত শ্বাহ, মহাৰাষ্ট্ৰৰ মুখ্যমন্ত্ৰী দেৱেন্দ্ৰ ফড়নবীছ,উপ- মুখ্যমন্ত্ৰী একনাথ শিণ্ডে,কেন্দ্ৰীয় পৰিবহণ মন্ত্ৰী নীতিন গাডকাৰী, বিজেপিৰ ৰাষ্ট্ৰীয় সভাপতি নীতিন নবীন, কংগ্ৰেছৰ জ্যেষ্ঠ নেতা সুশীল কুমাৰ শিণ্ডে, মহাৰাষ্ট্ৰৰ মন্ত্ৰী চন্দ্ৰকান্ত পাটিল, ছগন ভুজবাল, আৰু এন চি পিৰ সাংসদ প্ৰফুল্ল পেটেলে অংশগ্ৰহণ কৰে। এই আটাইকেইজন নেতাই অজিত পাৱাৰক শেষ শ্ৰদ্ধাঞ্জলি জ্ঞাপন কৰে। একেদৰে গোৱাৰ মুখ্যমন্ত্ৰী প্ৰমোদ সাৱন্ত আৰু মহাৰাষ্ট্ৰ নৱনিৰ্মান সেনাৰ মুৰব্বী ৰাজ থাকৰেও অজিত পাৱাৰৰ অন্ত্যেষ্টিক্ৰিয়াত অংশগ্ৰহণ কৰে। অজিত পাৱাৰৰ খুড়ায়েক তথা এনচিপিএছপিৰ মুৰব্বী শাৰদ পাৱাৰক সকলোৱে সাক্ষাৎ কৰি সান্ত্বনা দিয়ে। অজিত পাৱাৰৰ ভগ্নী সাংসদ সুপ্ৰিয়া চুলে ভাতৃৰ শেষকৃত্য অনুষ্ঠানত আগভাগ লয় ৷
উল্লেখ্য যে ইয়াৰ পূৰ্বে মহাৰাষ্ট্ৰৰ মুখ্যমন্ত্ৰী দেৱেন্দ্ৰ ফড়নবীছ আৰু ৰাজ্যৰ ৰাজ্যপাল আচাৰ্য দেৱব্ৰতে অজিত পাৱাৰৰ পত্নী সুনেত্ৰ পাৱাৰৰ সৈতে সাক্ষাৎ কৰি এই শোকৰ সময়ত সমবেদনা জ্ঞাপন কৰে। উদ্ধৱ থাকৰে আৰু আদিত্য থাকৰেও অজিত পাৱাৰৰ পৰিয়ালৰ লোকৰ সৈতে সাক্ষাৎ কৰি তেওঁৰ মৃত্যুত শোক প্ৰকাশ কৰে।
