দীৰ্ঘদিনীয়া চৰ্চিত মালেগাঁও বিস্ফোৰণ কাণ্ডত অৱশিষ্ট চাৰি অভিযুক্তকো দোষমুক্ত প্ৰদান কৰিলে বোম্বে উচ্চ ন্যায়ালয়ে। ইয়াৰ পূৰ্বে বিশেষ ৰাষ্ট্ৰীয় তদন্ত সংস্থা(National Investigation Agency )(NIA) আদালতে প্ৰজ্ঞা সিং ঠাকুৰ(Pragya Singh Thakur)সহ সাতজন অভিযুক্তক নিৰ্দোষ ঘোষণা কৰিছিল।
বুধবাৰে প্ৰমাণৰ অভাৱত সকলো অভিযুক্তৰ বিৰুদ্ধে থকা অভিযোগ বাতিল কৰি আদালতে এই ৰায় প্ৰদান কৰে।
বিচাৰপতি চন্দ্ৰশেখৰ আৰু বিচাৰপতি শ্যাম চন্দকৰ দ্বৈত বেঞ্চত এই গোচৰৰ শুনানি অনুষ্ঠিত হৈছিল।
অভিযুক্তসকলে এনআইএৰ অভিযোগপত্ৰৰ পৰা মুক্তি বিচাৰি দাখিল কৰা আবেদনত সঁহাৰি জনাই আদালতে কয় যে অভিযোগসমূহ সমৰ্থন কৰিব পৰা পৰ্যাপ্ত প্ৰমাণ উপস্থাপন কৰিব পৰা হোৱা নাই।
এই ৰায়ৰ জৰিয়তে মনোহৰ নাৰৱাৰিয়া, ৰাজেন্দ্ৰ চৌধুৰী, ধান সিং আৰু লোকেশ শৰ্মাক বেকসুৰ খালাস দিয়া হয়। ফলত, এনআইএৰ দ্বাৰা আৰম্ভ কৰা এই গোচৰটোৰ আইনী প্ৰক্ৰিয়া বৰ্তমান অন্ত পৰিল বুলি ধৰা হৈছে, যদিও আদালতৰ বিস্তৃত লিখিত আদেশ এতিয়াও প্ৰকাশ পোৱা নাই।
উল্লেখযোগ্য যে, ২০০৬ চনৰ ২৯ ছেপ্টেম্বৰৰ নিশা মালেগাঁও চহৰত সংঘটিত এক ভয়ংকৰ বিস্ফোৰণত ৩৭ জন লোকৰ মৃত্যু হৈছিল আৰু ৩০০তকৈ অধিক লোক আহত হৈছিল। তদন্তত পোহৰলৈ আহিছিল যে মছজিদ সংলগ্ন কবৰস্থানত এখন মটৰচাইকেলত সংস্থাপিত বিস্ফোৰক ব্যৱহাৰ কৰি এই আক্ৰমণ সংঘটিত কৰা হৈছিল।
প্ৰথমতে মহাৰাষ্ট্ৰৰ সন্ত্রাস দমন শাখাই (ATS) ঘটনাৰ তদন্ত আৰম্ভ কৰিছিল। পাছত ২০১১ চনত এই গোচৰটো এনআইএৰ হাতলৈ হস্তান্তৰ কৰা হয়।
২০১৮ চনত আনুষ্ঠানিকভাৱে বিচাৰ প্ৰক্ৰিয়া আৰম্ভ হয় আৰু আদালতে ৩২৩ জন সাক্ষীৰ বক্তব্য বিশ্লেষণ কৰে।
ইফালে, এই কাণ্ডত অভিযুক্ত হিচাপে গ্ৰেপ্তাৰ হোৱা Pragya Singh Thakur ২০১৯ চনত ভূপাল লোকসভা সমষ্টিৰ পৰা নিৰ্বাচিত হৈছিল। অৱশ্যে ২০২৪ চনৰ নিৰ্বাচনত তেওঁক পুনৰ প্ৰাৰ্থিত্ব দিয়া হোৱা নাছিল।
এই ৰায়ৰ স’তে দীৰ্ঘদিনীয়া এই সংবেদনশীল আৰু বিতৰ্কিত গোচৰটোৰ এক গুৰুত্বপূৰ্ণ পৰ্যায়ত সমাপ্তি ঘটিল।