BTC Election Final Result: বিটিআৰত যাদু চলিল হাগ্ৰামাৰ

৫ বছৰতে বিজেপি-ইউ পিপিএলক প্ৰত্যাখান বিটিআৰবাসীৰ ৷ ৰাজকীয় উদ্থান বিপিএফৰ ৷ শাসকীয় বিজেপি-ইউ পিপিএল তচনচ কৰি বিটিআৰৰ শাসনলৈ উভতিল হাগ্ৰামা মহিলাৰী ৷ ২০২০ত ৯খন আসন পোৱা বিজেপিয়ে এইবাৰ মাত্ৰ ৬ খন আসনতে সীমাবদ্ধ থাকিল Iআনহাতে বিটিচিত বিজেপিৰ বোকোচাত উঠি প্ৰথমবাৰৰ বাবে শাসনৰ সোৱাদ পোৱা ইউ পিপিএলে লাভ কৰে মাত্ৰ সাত খন ৷

প্ৰমোদ বড়ো নেতৃত্বাধীন দলটোৰ কে’বাজনো বিধায়ক শোচনীয় পৰাজয় হয় ৷ বিজেপিৰ বিজনীৰ বিধায়ক অজয় কুমাৰ ৰায়ো পৰাজিত হয় ৷ বিশেষকৈ একালৰ হাগ্ৰামাৰ সহযোগী তথা ইউ পিপিএলৰ প্ৰাৰ্থী প্ৰাক্তন মন্ত্ৰী চন্দন ব্ৰক্ষ্মৰ শোচনীয় পৰাজয় হয় ৷ অৰ্থাৎ বিজেপি-ইউ পিপিএলৰ হেভিয়েট প্ৰাৰ্থী ৰণত পৰে ৷

ফকিৰগ্ৰামত বিজেপিৰ প্ৰাৰ্থী তথা বিটিচিৰ স্বাস্থ্য বিভাগৰ কাৰ্যবাহী সদস্য অৰূপ কুমাৰ দে পৰাজিত হয় । কিন্ত আচৰিতজনক ভাবে বিটিআৰত চমক সৃষ্টিৰে একক সংখ্যাগৰিষ্ঠতাৰে বিপিএফে লাভ কৰে ২৭ খন আসন ২০২০ৰ নিৰ্বাচনতো বিপিএফে ১৭ খন আসন লাভ কৰি সৰ্ববৃহৎ দল হিচাপে পৰিগণিত হৈছিল ৷

উল্লেখ্য যে,ৰাজকীয় প্ৰচাৰ চলায়ো শাসকীয় বিজেপিয়ে এইবাৰৰ বিটিচি নিৰ্বাচনত সাফল্য লাভত সফল নহ’ল। বড়ো ভূমিৰ দুই আঞ্চলিক দল বিপিএফ আৰু ইউপিপিএলৰ শাসনত ভিচিডিচি দুর্নীতি-অনিয়মত ডুব যোৱাৰ অভিযোগ উত্থাপন কৰিও গৰিষ্ঠসংখ্যক ভোটাৰৰ মন আকর্ষণত ব্যর্থ হয় বিজেপি।

আনকি বিপিএফ আৰু ইউপিপিএলক লগত লৈ পৰিষদ গঠন কৰাৰ প্ৰতিশ্ৰুতি ঘোষণা কৰিও ভোটাৰৰ উপযুক্ত সঁহাৰি নাপালে দলে। তাৰ পৰিৱৰ্তে হাগ্রামা মহিলাৰী নেতৃত্বাধীন বিপিএফক গৰিষ্ঠসংখ্যক ভোটাৰে আদৰি ল’লে। প্রত্যাখ্যান কৰিলে কেন্দ্ৰ-ৰাজ্যৰ শাসনাধিষ্ঠিত বিজেপি নেতৃত্বাধীন এনডিএৰ অন্যতম অংশীদাৰ প্রমোদ বড়ো নেতৃত্বাধীন ইউপিপিএলকো। অর্থাৎ পাঁচ বছৰৰ বিৰতিৰ মূৰত পুনৰ বিপিএফৰ হাতত ক্ষমতা অর্পণ কৰিলে বড়ো ভূমিৰ ৰাইজে।