India’s women win first Cricket World Cup title:এদিনীয়া ক্রিকেটত বিশ্বজয়ী ভাৰতীয় মহিলা

পুৰুষ দলৰ সমানে বিশ্ব ক্রিকেটত নিজৰ আধিপত্য প্ৰমাণ কৰিলে ভাৰতৰ মহিলা ক্রিকেট দলে। আজি দক্ষিণ আফ্রিকাক ৫৮ ৰাণত পৰাস্ত কৰি ভাৰতে মহিলাৰ এদিনীয়া বিশ্বকাপৰ প্ৰথম খিতাপ অর্জন কৰে। ভাৰতে সাত উইকেটত ২৯৮ ৰাণ কৰাৰ প্ৰত্যুত্তৰত দক্ষিণ আফ্ৰিকাৰ ইনিংছ২৪০ ৰাণত সমাপ্ত হয়। দক্ষিণ আফ্ৰিকাৰ অপেনাৰ লৰা উলভার্টে দুর্দান্ত শতৰাণেৰে সম্ভাৱনা সজীৱ কৰি ৰাখিছিল। যদিও ব্যক্তিগত ১০১ ৰাণত উলভার্টত অনমোলপ্রীত কৌৰে এটা অসাধাৰণ কেচ ধৰি বিদায় দিয়াৰ লগে লগে ভাৰতৰ জয় কাষ চাপি আহে। ভাৰতৰ শেফালী বাৰ্মা আৰু দীপ্তি শর্মাই আজি দুর্দান্ত অলৰাউণ্ড প্রদর্শন আগবঢ়ায়।

অর্ধশতৰাণৰ উপৰি দীপ্তিয়ে পাঁচটা আৰু শেফালীয়ে দুটা উইকেট দখল কৰে। ইয়াৰ পূৰ্বে ভাৰতৰ লৈ সর্বাধিক ৮৭ ৰাণ কৰে শেফালীয়ে। তেওঁ স্মৃতি মন্ধানা (৪৫)ৰ স’তে প্ৰাৰম্ভিক উইকেটত ১০৪ ৰাণ যোগ দি দলৰ বৃহৎ স্ক’ৰৰ ভেটি স্থাপন কৰিছিল। ছেমি ফাইনেলৰ দুই নায়িকা জেমাইমা ৰড্রিগেজ (২৪) আৰু অধিনায়ক হৰমনপ্রীত কৌৰ (২০) ৰ ইনিংছ দীর্ঘস্থায়ী নহ’ল যদিও শেষৰফাৱে দীপ্তিয়ে ৫৮টা বলত ৫৮ ৰাণ কৰে। তেওঁলৈ যোগ্য সহযোগ আগবঢ়াই ৰিচা ঘোষে ২৪টা বলত ৩৪ ৰাণৰ বৰঙণি যোগায়।

এক বিশেষ অভিলেখ স্থাপন কৰিলে ভাৰতীয় মহিলা ক্রিকেট দলৰ অপেনাৰ স্মৃতি মন্ধানাই। এখন মহিলা এদিনীয়া বিশ্বকাপত ভাৰতৰ হৈ সৰ্বাধিক ৰাণ সংগ্ৰহৰ অভিলেখ ভাঙিলে মন্ধানাই। আজি তেওঁ ভাৰতৰ প্ৰাক্তন অধিনায়ক মিতালী ৰাজৰ অভিলেখ ভংগ কৰে।

দেওবাৰৰ ফাইনেলত মন্ধানাই ৪৫ ৰাণ কৰাৰ লগতে শেফালী বাৰ্মাৰ স’তে প্ৰাৰম্ভিক উইকেটত ১০৪ ৰাণৰ যুটি গড়ে। চলিত বিশ্বকাপত নটা ইনিংছত মন্ধানাৰ সংগ্ৰহ মুঠ ৪৩৪ ৰাণ। ইয়াত আছে এটা শতৰাণ আৰু দুটা অর্ধশতৰাণ। মহিলাৰ এদিনীয়া বিশ্বকাপত ভাৰতৰ হৈ সৰ্বাধিক ৰাণৰ অভিলেখ পূর্বে আছিল মিতালীৰ। তেওঁ ২০১৭ৰ বিশ্বকাপত এটা শতৰাণ আৰু তিনিটা অর্ধশতৰাণৰ সহায়ত ৪০৯ সংগ্ৰহ কৰিছিল। উল্লেখ্য যে চলিত বর্ষত মন্ধানা দুর্দান্ত ফর্মত আছে। এই বছৰ এদিনীয়া আন্তর্জাতিক মেচত তেওঁ পাঁচটা শতৰাণসহ ২৩টা ইনিংছত ১৩৬২ ৰাণ সংগ্ৰহ কৰিছে। সম্প্রতি তেওঁ মহিলাৰ এদিনীয়া ক্রিকেটত বিশ্বৰ এক নম্বৰ বেটাৰ I