ED Raid :
প্রাক্তন তাৰকা ক্রিকেটাৰৰ পৰা আৰম্ভকৰি জনপ্রিয় অভিনেতা-অভিনেত্রী তথা ৰাজনীতিকলৈ, বহুজনে সাঙোৰ খাইছে অনলাইন জুৱা এপৰ লুণ্ঠনৰ গোচৰত। সমগ্র দেশবাসীয়ে গৌৰৱবোধ কৰা প্ৰাক্তন ক্রিকেট খেলুৱৈ সুৰেশ ৰাইনা আৰু শিখৰ ধাৱনৰ স্বৰূপ ইতিমধ্যে ফাদিল হৈছে। অনলাইনত জুৱাৰ পোহাৰ মেলি অনেক ভাৰতীয় লোকক লুণ্ঠন চলোৱাত বিদেশী এপক সহায় কৰাৰ অভিযোগত প্ৰৱৰ্তক সঞ্চালকালয় (ইডি)-এ এই দুই প্রাক্তন ক্রিকেটাৰৰ পৰা ১১ কোটি টকাৰ সম্পত্তি জব্দ কৰিছে।
তদুপৰি ২০১১ৰ বিশ্বকাপ জয়ী ভাৰতীয় দলৰ অন্যতম সদস্য যুৱৰাজ সিঙকো এই গোচৰত ইডিয়ে তলব কৰিছে। এই অবৈধ কার্যকলাপত ৰবীন উত্থাপা, অভিনেতা ছনু সুদ, উর্বশী ৰৌতেলা, তৃণমূল কংগ্ৰেছৰ প্ৰাক্তন সাংসদ তথা অভিনেত্রী মিমি চক্রবর্তী আৰু অভিনেতা অংকুশ হাজৰাও জড়িত থকাৰ অভিযোগ উত্থাপন হৈছে। ইতিমধ্যে ইডিয়ে তলব কৰি আনি হাজৰাক সংস্থাটোৰ দিল্লীস্থিত মুখ্য কার্যালয়ত জেৰাও কৰিছে। ইডিৰ সূত্ৰই প্ৰকাশ কৰা অনুসৰি, বিদেশৰ পৰা একাংশই অনলাইন জুৱাৰ এপৰে ভাৰতীয় লোকক লুণ্ঠন চলাই আহিছে।
এই এপসমূহৰ অন্যতম হ’ল 1xBat আৰু 1xBat স্প’র্টিং লাইন্ছ। ইয়াৰে 1xBatৰ ভাৰতীয় ব্ৰেণ্ড এম্বেছাদৰ আছিল উর্বশী ৰৌতেলা। শেহতীয়াভারে বিভিন্ন ৰাজ্যৰ আৰক্ষীৰ ওচৰত এই এপসমূহৰ বিৰুদ্ধে বহু গোচৰ ৰুজু হয়। ইয়াৰ ভিত্তিত ইডিয়ে অনুসন্ধান কৰি প্ৰাক্তন ক্রিকেটাৰ ৰাইনা আৰু ধাৱন অনলাইন জুৱাৰ এপৰ স’তে জড়িত থকাৰ তথ্য উদ্ঘাটন কৰে। এই তথ্য উদ্ধাৰৰ পাছতে তদন্তকাৰী সংস্থাটোৱে ৰাইনাৰ নামত মিউচুৱেল ফাণ্ডত বিনিয়োগ কৰা ৬.৬৪ কোটি টকা আৰু ধাৱনৰ ৪.৫ কোটি টকা মূল্যৰ এক স্থাৱৰ সম্পত্তি জব্দ কৰে। এনেদৰে দুয়োজন প্রাক্তন ক্রিকেটাৰৰ পৰা ইডিয়ে মুঠতে ১১.১৪ কোটি টকাৰ সম্পত্তি জব্দ কৰিছে।
ইডিয়ে প্রকাশ কৰা অনুসৰি, ৰাইনা আৰু ধাৱনৰ স’তে বিদেশৰ পৰা পৰিচালিত 1xBat আৰু 1xBat স্প’র্টিং লাইন্ছ এপ দুটাৰ স’তে বুজাবুজি আছে। সেই অনুসৰি জুৱাৰ এপ দুটাই দুয়োলৈ বিদেশৰ পৰা কে’বাতৰপীয়া গোপন পথেৰে পইচা প্ৰেৰণ কৰে। তেওঁলোকে লাভ কৰা এই ধনৰ উৎস গোপন হৈ থাকে। ইডিৰ অনুসন্ধানত লগতে পোহৰলৈ অহা অনুসৰি 1xBat এপৰ ভাৰতত জুৱাৰ বিস্তৃত নেটৱৰ্ক আছে। ছহেজাৰৰো অধিক মিউল একাউন্ট (আনৰ একাউণ্টৰ জৰিয়তে ধন সংগ্ৰহ বা হস্তান্তৰ কৰা একাউণ্ট)ৰ জৰিয়তে বিদেশী এপটোৱে ভাৰতত এক বিশাল নেটৱৰ্ক গঢ়ি তুলিছে। পুঁজিৰ প্রকৃত উৎস গোপনে ৰাখি এপটোরে এই মিউল একাউণ্টসমূহৰ জৰিয়তে বিভিন্নজনক ধন আদায় দিয়ে।
এই একাউণ্টসমূহৰ কে ৱাই চিৰ উপযুক্ত পৰীক্ষণ কৰা নহয়। ইডিয়ে বাইনা আৰু ধাৱনৰ এই বিপুল অংকৰ সম্পত্তি জব্দ কৰাৰ উপৰি আন কেতবোৰ স্থানতো তালাচী চলায়। এই তালাচীৰ সময়ত সংস্থাটোরে কিছুসংখ্যক আপত্তিজনক সামগ্রী আৰু ৬০ টা বেংক একাউণ্টত থকা চাৰি কোটি টকা উলিয়াই নিব নোৱাৰাৰ ব্যৱস্থা কৰে। এই অভিযানৰ সময়ত ইডিয়ে অনলাইন জুৱাৰ এপে মিউল একাউণ্টৰ জৰিয়তে এহেজাৰৰো অধিক কোটি টকা সৰবৰাহ কৰাৰ তথ্যও উদ্ধাৰ কৰে। সম্প্রতি সংস্থাটোরে অনলাইন জুৱা আৰু বাজিৰ এপসমূহক লৈ সাধাৰণ লোকক সাৱধান হ’বলৈও আহ্বান জনাইছে।
সংস্থাটোৱে পৰামৰ্শ দিছে যে এই অপৰিচিত সত্তাৰ স’তে বেংক একাউণ্টৰ স্পৰ্শকাতৰ তথ্য আদান-প্রদান কৰা উচিত নহয়। কাৰণ নিজৰ অজানিতে এনে ধন সৰবৰাহৰ গোচৰত গ্ৰেপ্তাৰ হ’লে অবৈধ উৎসৰ পৰা ধন আহৰণ কৰি বৈধ ব্যৱসায়ত পঠোৱা বা বিদেশলৈ প্রেৰণ প্ৰতিৰোধ আইনৰ অধীনত সাত বছৰ পৰ্যন্ত কাৰাদণ্ড হয়। ইডিয়ে লগতে এই বুলি দোহাৰিছে যে অনলাইন জুৱাৰ এপবোৰ কেৱল বিত্তীয় প্রবঞ্চনাতে জড়িত থকা নাই, এইসমূহ অবৈধভাৱে ধনৰ সৰবৰাহ আৰু অন্যান্য বেআইনী কাম-কাজতো জড়িত আছে। সম্প্রতি সংস্থাটোরে 1xBat আৰু 1xBat স্প’র্টিং লাইন্দু আৰু এই এপ দুটাৰ স’তে জড়িত ব্যক্তিসকলৰ বিৰুদ্ধে অভিযান অব্যাহত ৰাখিছে।
