Jal Jeevan Mission:✒️ৰাজ্য চৰকাৰে নগাঁও জিলাৰ কামপুৰ ৰাজহ চক্ৰৰ অন্তর্গত কচুৱাৰ লুটুমাৰী সংৰক্ষিত বনাঞ্চলত বেদখলকাৰীক উচ্ছেদ কৰি বনাঞ্চল বেদখলমুক্ত কৰিলেও ইয়াৰ ভিতৰত নির্মাণ প্রায় সম্পূর্ণ হোৱা এখন পানী যোগান আঁচনি এতিয়া এক গুৰুতৰ প্ৰশ্নৰ বিষয় হৈছে।
বেদখলকাৰীক বিশুদ্ধ খোৱাপানী যোগান ধৰাৰ বাবেই হিমন্ত বিশ্ব শৰ্মাৰ চৰকাৰৰ জনস্বাস্থ্য কাৰিকৰী বিভাগে বনাঞ্চলৰ ভিতৰত কোটি টকাৰো অধিক ধন ব্যয় কৰি নিৰ্মাণ কৰিছিল এখন খোৱাপানী যোগান আঁচনি।
জল জীৱন মিছন আঁচনিৰ অধীনত নিৰ্মাণ কৰা এই পানী যোগান আঁচনিখনৰ নিৰ্মাণ কাৰ্য সম্পূৰ্ণ হোৱাৰ পথত। ইপিনে, লুটুমাৰী অঞ্চলটো সংৰক্ষিত বনাঞ্চলৰ ভিতৰৰ বাবে তাত কে’বাটাও দশকজুৰি বাস কৰা সত্ত্বেও শ শ পৰিয়ালক উচ্ছেদ কৰি বেদখলমুক্ত কৰা বুলি প্রশাসনে সদৰী কৰিছে।
অথচ সেই বেদখলকাৰীকে বিশুদ্ধ খোৱাপানী যোগান ধৰাৰ বাবে জনস্বাস্থ্য কাৰিকৰী বিভাগে বনাঞ্চলৰ ভিতৰতে কোটি কোটি টকা ব্যয় কৰি নিৰ্মাণ কৰে পানী যোগান আঁচনিখন।
এতিয়া সেই অঞ্চল সংৰক্ষিত আৰু জনশূন্য হোৱাৰ পাছত জল জীৱন আঁচনিৰ এই কোটিটকীয়া পানী যোগান আঁচনিখনৰ বিশুদ্ধ খোৱাপানী কোনে সেৱন কৰিব তাকে লৈ ৰাইজৰ মাজত চৰ্চা আৰম্ভ হৈছে। প্রশ্ন উঠিছে যে সংৰক্ষিত বনাঞ্চলৰ ভিতৰত কিদৰে পানী যোগান আঁচনি নিৰ্মাণৰ অনুমোদন জনোৱা হ’ল।
বৃহৎ পৰিমাণৰ ধন ব্যয় কৰি নিৰ্মাণ কৰা আঁচনিৰ ধন এতিয়া পানীত পেলোৱাৰ বাবে দায়ী কোন। এই সংশ্লিষ্ট বিষয়াক জবাবদিহি কৰা হ’ব নে নাই সেই প্রশ্ন উত্থাপন হৈছে।
এই সন্দর্ভত তীব্র প্রতিক্রিয়া প্রকাশ কৰি নগাঁও নাগৰিক সভাৰ সম্পাদক বিৰিঞ্চি বৰাই কয়, ‘এই পানী যোগান আঁচনিখন হৈছে চৰকাৰী বিকাশৰ নমুনা। বনাঞ্চলৰ ভিতৰত জল জীৱন মিছন আঁচনিৰ অধীনত কোটি কোটি টকা ৰাজহুৱা ধনৰ শৰাধ কৰি পানী যোগান আঁচনি নিৰ্মাণ কৰিলে।
এই পানী যোগান আঁচনিখন লুটুমাৰী সংৰক্ষিত বনাঞ্চলৰ ভিতৰত বেদখলকাৰীৰ বাবে কিয় নিৰ্মাণ কৰা হৈছিল, তাৰ উত্তৰ লাগে মন্ত্রী জয়ন্ত মল্ল বৰুৱাৰ পৰা। চৰকাৰে যি স্থানক লুটুমাৰী বনাঞ্চলৰ ভূমি বুলি কৈ তাৰ পৰা শ শ পৰিয়ালক উচ্ছেদ কৰিলে তাতেই কোটি টকা ব্যয় কৰি জল জীৱনৰ পানী যোগান আঁচনি নিৰ্মাণ কৰাৰ ৰহস্য কি?
এয়া কমিছনৰ অংক মাত্র।’ নগাঁও নাগৰিক সভাৰ সম্পাদকজনে চৰকাৰক কটাক্ষ কৰি লগতে কয়, ‘লুটুমাৰী সংৰক্ষিত বনাঞ্চলৰ ভিতৰত নিৰ্মাণ কৰা জল জীৱনৰ পানী যোগান আঁচনিখনৰ পাইপেৰে ওলাবলগীয়া পৰিশোধিত পানী কোনে সেৱন কৰিব। ওচৰৰ পাহাৰৰ বনৰীয়া জীৱ-জন্তু নে চৰণীয়া গৰু-ম’হে? নে এই আঁচনিৰ পৰিশোধিত পানী সেৱন কৰিবলৈ তালৈ জনস্বাস্থ্য কাৰিকৰী বিভাগৰ মন্ত্ৰী জয়ন্ত মল্ল বৰুৱা নিজে যাব?’
স্মৰ্তব্য যে লুটুমাৰী সংৰক্ষিত বনাঞ্চলৰ উচ্ছেদিত অঞ্চলৰ ভিতৰত কে’বাখনো চৰকাৰী খণ্ডৰ প্ৰাথমিক বিদ্যালয়, বহুকেইটা অংগনৱাড়ী কেন্দ্রও আছিল। আনকি তাৰ ভিতৰত বৈদ্যুতিক লাইন, পঞ্চায়তৰ চিচি ব্লকৰ পকী পথো আছিল।
বনাঞ্চলৰ ভিতৰত চৰকাৰী আঁচনি ৰূপায়ণ কৰা, চৰকাৰী শিক্ষানুষ্ঠান চলাই থকা, জল জীবন আঁচনিৰ পানী যোগান আঁচনি নিৰ্মাণ কৰা আদি বেআইনী কার্য আখ্যা দি এই সন্দর্ভত এক তদন্ত আৰম্ভ কৰিবলৈকো বিভিন্ন দল-সংগঠনে দাবী জনাইছে।