Nagaon:
দৈনিক অগ্ৰদূত ডিজিটেল ডেস্ক:মছজিদত নির্বাচনী সভা অনুষ্ঠিত কৰি নির্বাচনী আচৰণ বিধি উলংঘা কৰাৰ অভিযোগ উঠিছে নগাঁও লোকসভা সমষ্টিৰ উপ-নিৰ্বাচনৰ বিজেপি প্রার্থী দেবাশীষ শৰ্মাৰ বিৰুদ্ধে।
সমষ্টিটোৰ আৰচিপিআইৰ প্রার্থী অধিবক্তা ইনামুল হুদাই বিজেপি প্রার্থীজনে লোকসভা কেন্দ্ৰৰ অধীনৰ কদমনিস্থিত এটা মছজিদৰ চৌহদত গৈ নির্বাচনী সভা অনুষ্ঠিত কৰা বুলি অভিযোগ উত্থাপন কৰি নগাঁও জিলা আযুক্ত তথা জিলা ৰিটার্নিং বিষয়াৰ ওচৰত লিখিত অভিযোগ দাখিল কৰিছে। হুদাই একেখন অভিযোগপত্র দেশৰ মুখ্য নির্বাচন আয়ুক্তলৈও প্ৰেৰণ কৰা বুলি সদৰী কৰিছে।
অভিযোগপত্রত নির্বাচনী আচৰণ বিধিৰ কথা উল্লেখ কৰি কোৱা হয় যে ভাৰতীয় নির্বাচন আয়োগৰ আদৰ্শ আচৰণ বিধিৰ পাৰ্ট-১, ক্লজ-৩ অনুসৰি ভোেট লাভৰ উদ্দেশ্যে জাতি বা সাম্প্রদায়িক অনুভূতিৰ প্ৰশ্ৰয় ল’ব নোৱাৰে। একেদৰে মছজিদ, গির্জা, মন্দিৰ বা অন্যান্য উপাসনাস্থলীত নির্বাচনী প্ৰচাৰ মঞ্চৰূপে ব্যৱহাৰ কৰিব নোৱাৰিব বুলিও উল্লেখ আছে। ইয়াৰ উপৰি অভিযোগ পত্ৰত ধর্মীয় অনুষ্ঠানৰ ১৯৮৮ৰ তিনি আৰু ছয় নম্বৰ ধাৰাৰ কথাও উল্লেখ কৰা হৈছে। তিনি নম্বৰ ধাৰা অনুসৰি ধৰ্মীয় প্রতিষ্ঠানৰ মালিকানাধীন বা নিয়ন্ত্রণাধীন স্থান ৰাজনৈতিক কাৰ্যকলাপৰ প্ৰচাৰ বা প্ৰসাৰৰ বাবে ব্যৱহাৰত নিষেধাজ্ঞা আছে।
আনহাতে, ছয় নম্বৰ ধাৰা অনুসৰি, ধৰ্মীয় প্রতিষ্ঠানৰ পৃষ্ঠপোষকতাত অনুষ্ঠিত ধর্মীয় সভা বা সমাৱেশক ৰাজনৈতিক কাৰ্যকলাপৰ বাবে ব্যৱহাৰ কৰিব নোৱাৰি। এই ঘটনাৰ ক্ষেত্ৰত নিৰ্বাচনী আচৰণ বিধি তথা সংশ্লিষ্ট আইন উলংঘন হৈছে নেকি সেযাও তদন্ত কৰি প্ৰয়োজনীয় ব্যৱস্থা গ্ৰহণৰ বাবে অভিযোগকাৰীয়ে নিৰ্বাচনী বিষয়াৰ ওচৰত আবেদন জনাইছে।
ADVERTISEMENT
