Crow:✒️কাউৰীৰ মাত শুনিলে বহুতৰে খং উঠে। আনকি নগৰ-চহৰসমূহত পুৱাই জাক জাক কাউৰীৰ মাত শুনি বহুতে বিৰক্তি অনুভৱ কৰে। কাউৰীৰ মাত বহুতে হুটা বুলি আখ্যা দিয়ে। সেয়া যিয়েই নহওক, বিশেষজ্ঞসকলৰ মতে ভাৰতীয় কাউৰী হৈছে বিশ্বৰ অন্যতম বুদ্ধিমান পক্ষী।
ডাঃ দেবেন্দ্ৰ কুমাৰ গুপ্তা নামৰ বিশেষজ্ঞ পশু চিকিৎসকজনৰ মতে, কাউৰীৰ এনে কেতবোৰ সাৰস্বত সামর্থ আছে যিসমূহ কেতবোৰ স্তন্যপায়ী প্ৰাণীৰ ক্ষেত্ৰতহে দেখা যায়। এনে গুণৰ বলত কাউৰী প্ৰকৃতিৰ জগতৰ অন্যতম বুদ্ধিমান পক্ষীত পৰিণত হৈছে। বিশেষজ্ঞসকলৰ মতে কাউৰীৰ দৈনন্দিন সমস্যা সমাধানৰ দক্ষতা উন্নত মানৰ।
তদুপৰি এই পক্ষীবিধৰ স্মৃতিও শক্তিশালী আৰু যিকোনো পৰিৱেশৰ স’তে কাউৰী অভিযোজিত হ’ব পাৰে। উল্লেখ্য যে এন্টার্কটিকাৰ বাহিৰে পৃথিৱীৰ সকলো মহাদেশত কাউৰী পোৱা যায়। সেয়েহে ইয়াৰ যিকোনো পৰিৱেশৰ স’তে অভিযোজিত হোৱাৰ ক্ষমতা থকা বুলি কোৱা হয়।
ভাৰতত দেখা যায় যে কাউৰীয়ে ঘন অৰণ্যৰ পৰা আৰম্ভকৰি পকী ঘৰ-দুৱাৰেৰে পৰিবেষ্টিত মহানগৰতো অনায়াসে বাস কৰিব পাৰে। উচ্চ সাৰস্বত গুণৰ বলতে যে কাউৰীয়ে মানুহ অধ্যুষিত ভূমিতো সহজে বাস কৰিব পাৰে সেয়া স্পষ্ট বুলি বিশেষজ্ঞই মন্তব্য কৰে।
কাউৰীৰ স্বভাৱজাত বুদ্ধিমত্তাৰ অন্যতম সবাতোকৈ আকর্ষণীয় দিশটো হ’ল যে এই পক্ষীবিধে আহিলা ব্যৱহাৰেই নহয়, তৈয়াৰো কৰিব পাৰে। গবেষণাত দেখা গৈছে যে কাউৰীয়ে গছৰ পাত, তাঁৰ আদি ব্যৱহাৰ কৰি ঠোটৰে সংগ্ৰহ কৰিব নোৱাৰা স্থানৰ পৰাও খাদ্য সংগ্ৰহ কৰিব পাৰে।
আহিলাৰ ব্যৱহাৰ কৰিব পৰাটো উন্নত সাৰস্বত গুণৰ মূল বুলি ডাঃ গুপ্তাই মন্তব্য কৰিছে। কাউৰীয়ে এই সামৰ্থৰ উল্লেখনীয়ভাবে প্রদর্শন কৰে বুলিও বিশেষজ্ঞজনে কয়। বিশেষজ্ঞসকলৰ মতে, দৈনন্দিন চলা-ফুৰাৰ ক্ষেত্ৰত সম্মুখীন হোৱাৰ সমস্যা কাউৰীয়ে ক্ষিপ্ৰতাৰে সমাধান কৰিব পাৰে। এই কার্য প্রবৃত্তি বা সাধাৰণ পৰীক্ষা-ভুলতকৈ উন্নত।
ডাঃ গুপ্তাই আঙুলিয়াই দিছে যে কাউৰীয়ে টান খোলাযুক্ত ফলবোৰ ব্যস্ত পথলৈ পেলাই দিয়ে যাতে গাড়ী-মটৰৰ চকাৰ তলত পৰি এনে ফল-মূলৰ খোলা ভাঙি পৰে। এনেদৰে গাড়ী-মটৰৰ চকাৰ চেপাত ভাঙি পৰা ফল-মূলৰ খোলা দূৰৈৰ পৰা প্ৰত্যক্ষ কৰি থকা কাউৰীয়ে পাছত ভক্ষণ কৰে। গতিকে এইবিধ পক্ষীয়ে সহজে ঘন জনবসতিৰ নগৰ-চহৰতো বাস কৰিব পাৰে।
বিশেষজ্ঞসকলৰ মতে, এনে বুদ্ধিমত্তা কেৱল স্তন্যপায়ী প্রাণীসমূহৰ ক্ষেত্ৰতহে দেখা যায়। তাৰ মাজতে কাউৰীও এনে গুণৰ অধিকাৰী হৈছে। কেৱল সেয়াই নহয়, কাউৰীয়ে পাক লগা সমস্যাও সমাধান কৰিব পাৰে। এবাৰ এনে এটা সমস্যা সমাধান কৰাৰ পাছত পক্ষীবিধৰ সেই কথা মনত ৰৈ যায়।
এনে গুণক সাৰস্বত নমনীয়তা বুলি কোৱা হয়। ডাঃ গুপ্তাৰ মতে, ভাৰতীয় কাউৰীসমূহ বিশেষকৈ ঘৰ কাউৰীয়ে সহজে নগৰ-চহৰতো বাস কৰিব পাৰে। ইয়াৰ কাৰণ হৈছে কাউৰীয়ে জন্মগতভাৱে লাভকৰা বুদ্ধিমত্তা। কাউৰীয়ে মানুহৰ দৈনন্দিন জীৱন সূচীৰ পৰাও কথা শিকে। খাদ্য ক’ত পোৱা যাব সেয়া সহজে চিনাক্ত কৰিব পাৰে আৰু অভিজ্ঞতাৰ ভিত্তিত নিজৰ আচৰণৰ সংশোধন কৰে।
কাউৰীৰ ক্ষেত্ৰত দেখা পোৱা এনে বুদ্ধিমত্তা আন সাধাৰণ পক্ষীৰ ক্ষেত্ৰত দেখা পোৱা নাযায়। বিশেষজ্ঞসকলৰ মতে কাউৰীয়ে পৰিৱেশ তন্ত্রগত গুৰুত্বপূৰ্ণ ভূমিকাও পালন কৰে।
