Cherrapunji আপুনি জীৱনত হয়তো বহু যাদুঘৰ দেখিছে; কিন্তু বৰষুণৰ পানীৰ যাদুঘৰৰ নাম সম্ভৱতঃ শুনা নাই। এক অভিনৱ চিন্তা-ধাৰাৰে মেঘালয় চৰকাৰে মুকলিৰ যো-জা চলাইছে এটা বৰষুণৰ সংগ্ৰহালয়ৰ। ইয়াৰ লগে লগে বৰষুণক লৈ থকা মানুহৰ ধাৰণাও সলনি হোৱাৰ আশা কৰা হৈছে।
লক্ষ্যণীয় যে বৰষুণৰ পানী কৰ্ষণৰ কথা বিগত বহু বছৰ ধৰি চৰ্চা হৈ আহিছে। এনে চৰ্চাৰ মাজতে মেঘালয় চৰকাৰৰ মেঘালয় অৱবাহিকা উন্নয়ন কৃর্তপক্ষ (এমবিডিএ) ই বিশ্বৰে অন্যতম সর্বাধিক বৰষুণ হোৱা অঞ্চল চেৰাপুঞ্জীত এটা বৰষুণৰ যাদুঘৰ মুকলিৰ যো-জা চলাইছে।
আপাতত এই যাদুঘৰ পৰ্যটকক আকৰ্ষণৰ উদ্দেশ্যে মুকলি কৰা হ’ব যদিও ইয়ে আন এক গভীৰ অৰ্থও বহন কৰিছে। দৰাচলতে এই অভিলাষী প্রকল্পৰ জৰিয়তে বিজ্ঞান, সংস্কৃতি, ইতিহাস আৰু মানুহৰ চিৰন্তন অভিজ্ঞতাৰ সংমিশ্রণ ঘটোৱা হ’ব।
এই যাদুঘৰৰ দৰ্শনাৰ্থীসকলে কেৱল বৰষুণেই পর্যবেক্ষণ নকৰে, তেওঁলোকে বৰষুণ অনুভৱো কৰিব, লগতে তেওঁলোকে ৰাজ্যখনৰ এক জনগোষ্ঠী আৰু ইয়াৰ সংস্কৃতিৰ বিষয়েও সম্যক ধাৰণা অর্জন কৰিব। লক্ষ্যণীয় যে চেৰাপুঞ্জীত মেঘালয় চৰকাৰে বৰষুণৰ যাদুঘৰ মুকলিৰ যো-জা চলোৱাৰ কাৰণো আছে।
ইয়াৰ মূল কাৰণ হৈছে শেহতীয়াভাবে চেৰাপুঞ্জীব গাতে লাগি মৌচিনবামে বিশ্ববে সর্বাধিক বৰষুণ হোৱা স্থানৰ স্বীকৃতি অর্জন কৰিছে। মৌচিনৰামৰ লগতে চেৰাপুঞ্জীয়েও বিজ্ঞানীসকলক আকর্ষণ কৰি আহিছে।
ইয়াৰ কাৰণ হৈছে এই অঞ্চল দুটাত ভৌগোলিক অবস্থান বিৰল। মহাসাগৰৰ পৰা বহু দূৰৈত অবস্থিত হোৱা সত্ত্বেও মৌচিনৰাম আৰু চেৰাপুঞ্জীত পৃথিৱীৰ ভিতৰতে সর্বাধিক বৃষ্টিপাত হয়।
এনে বিৰল ভৌগোলিক পৰিঘটনাৰ বাবে মেঘালয় চৰকাৰে চেৰাপুঞ্জীত এটা বৰষুণৰ যাদুঘৰ মুকলিৰ যো-জা চলাইছে। উল্লেখ্য যে বিশ্বৰ ভিতৰতে সৰ্বাধিক বৰষুণ হোৱা স্থান যেনে হাবাই আদি মহাসাগৰে ঘেৰি আছে।
ঘূর্ণী বতাহৰ ফলত এনে অঞ্চলসমূহত বিশ্বৰ ভিতৰতে আগৰণুৱা সর্বাধিক বৰষুণ হয়। ইয়াৰ বিপৰীতে চেৰাপুঞ্জী বা মৌচিনৰাম সাগৰ-মহাসাগৰৰ পৰা বহু দূৰৈত পাহাৰীয়া অঞ্চলত অৱস্থিত।
তৎসত্ত্বেও এই অঞ্চল দুটাত পৃথিবীৰ ভিতৰত অধিক বৃষ্টিপাত হয়। সেয়েহে বিজ্ঞানীসকলে এই অঞ্চল দুটাৰ প্রতি সর্বদা আকর্ষণ অনুভৱ কৰি আহিছে।
বিজ্ঞানীসকলৰ মতে, বংগোপসাগৰৰ পৰা সৃষ্ট সেমেকা ডাৱৰৰ প্ৰভাৱত চেৰাপুঞ্জীত প্ৰবল বৰষুণ হয়।
আনহাতে, মেঘালয়ৰ এই বৰষুণৰ যাদুঘৰ ভিতৰে বাহিৰে আকর্ষণীয় কৰি তোলাৰ লক্ষ্য লোৱা হৈছে। দর্শনার্থীসকলে যাদুঘৰত ভৰি থ’লেই বিজ্ঞানৰ গভীৰ দিশো অনুধাৱন কৰিবলৈ সক্ষম হ’ব। যাদুঘৰত মত বিনিময় প্রদর্শনীৰো ব্যৱস্থা থাকিব।
এনে প্রদর্শনীত ডাৱৰ কেনেদৰে সৃষ্টি হয়, মৌচুমী বায়ুৰ আচৰণ আদিৰ বিষয়ে ব্যাখ্যা কৰা হ’ব। লগতে চেৰাপুঞ্জীত বিশ্বৰ ভিতৰত কিয় সর্বাধিক বৰষুণ হয়, সেই বিষয়েও ব্যাখ্যা কৰা হ’ব।
বংগোপসাগৰৰ আকাশৰ পৰা খাচী পাহাৰলৈ ডাৱৰৰ যাত্রাও এই যাদুঘৰত দেখিবলৈ পোৱা যাব। এনে প্রদর্শনী নিৰস নহ’ব, কাৰণ এনে প্রদর্শনীয়ে বৃষ্টিপাত আৰু ভূগোলক সামৰি গতিশীল ৰূপ ল’ব।
এই যাদুঘৰত এটা অত্যাধুনিক বৰষুণ গৱেষণা কেন্দ্ৰও থাকিব। এই গৱেষণা কেন্দ্র মহাবালেশ্বৰৰ হাই এলটিটিউড ক্লাউড ফিজিক্স লেব’ৰটেৰীৰ দৰে বিখ্যাত প্রতিষ্ঠান সদৃশ হ’ব।
কাৰণ এই গৱেষণা কেন্দ্ৰত শেহতীয়া প্ৰযুক্তিৰ বতৰ বিজ্ঞানগত আহিলা, এটা উৎসর্গিত ডাটা কেন্দ্রও থাকিব। এই ক্ষেত্রত মেঘালয় চৰকাৰে আশা প্রকাশ কৰিছে যে উক্ত কেন্দ্ৰৰ প্ৰতি ভাৰতীয় বতৰ বিজ্ঞান কেন্দ্ৰ আৰু ইছৰ’ৰ দৰে প্ৰতিষ্ঠানৰ পৰা ইতিবাচক সঁহাৰি লাভ কৰিব।
উল্লেখ্য যে এই অভিনৱ যাদুঘৰ নির্মাণত মেঘালয় চৰকাৰে ২৫ কোটি টকা ব্যয় কৰিছে। ইয়ে ৰাজ্যখনলৈ অধিক পর্যটক আকৰ্ষণ কৰিব বুলিও চৰকাৰে আশা প্রকাশ কৰিছে।
এই সম্পর্কত বিধায়ক ওলান সিং ছুইনে সংবাদ মাধ্যমৰ আগত কয় যে এই বৰষুণৰ যাদুঘৰত প্ৰৱেশ কৰা পর্যটকসকলে বৰষুণ আৰু জলবায়ু বিজ্ঞানৰ এক সুকীয়া সংমিশ্রণ অনুভৱ কৰিব।
