Accident:✒️ৰাজস্থানৰ জয়পুৰত ভয়ংকৰ পথ দুৰ্ঘটনা। শুক্ৰবাৰে নিশা পথচাৰীৰ ভিৰত সুৰামত্ত চালকে গাড়ী চলাই সোমাই পৰাত এজন লোকৰ ঘটনাস্থলীতেই মৃত্যু হয়। গাড়ী খুন্দাত আহত হয় আন ১৪ জন। আহতসকলক উদ্ধাৰ কৰি তৎক্ষণাৎ চিকিৎসালয়ত ভৰ্তি কৰোৱা হৈছে।তথ্য অনুসৰি তেওঁলোকৰ ভিতৰত চাৰিজনৰ অৱস্থা সংকটজনক ।
পুলিচ সূত্ৰে জনোৱা অনুসৰি, এখন অডি গাড়ি নিয়ন্ত্ৰণ হেৰুৱাই প্ৰথমে ডিভাইডাৰত খুন্দা মাৰে। তাৰ পাছত গাড়িখন ফুটপাথত উঠি ইজনৰ পাছত সিজন পথচাৰীক খুন্দা মাৰি আগবাঢ়ে। পাছত ৰাস্তাৰ কাষত থকা এখন দোকানত খুন্দা মাৰি প্ৰায় ৩০ মিটাৰলৈকে দোকানখন টানি লৈ যায়।
এই দুৰ্ঘটনাত ৰাস্তাৰ কাষত থোৱা কেবাখনো বাহনো ক্ষতিগ্ৰস্ত হয়। অৱশেষত গাড়ীখন এজোপা গছত খুন্দা মাৰি থমকি ৰয়।
স্থানীয় লোকসকলে প্ৰথমে আহতসকলক উদ্ধাৰ কৰে আৰু পুলিচক খবৰ দিয়ে। পুলিচে ঘটনাস্থলীত উপস্থিত হৈ আহতসকলক চিকিৎসালয়লৈ প্ৰেৰণ কৰে। পুলিচে জানিবলৈ দিয়ে যে, এই দুৰ্ঘটনাত ৰমেশ বৈৰোৱা নামৰ এজন ব্যক্তিৰ মৃত্যু হৈছে।
প্ৰাথমিক তদন্তত পুলিচে জানিব পাৰিছে যে গাড়িখনত চাৰি জন লোক আছিল আৰু সকলো সুৰামত্ত অৱস্থাত আছিল। দুৰ্ঘটনাৰ পাছত তিনিজনে পলায়ন কৰে । স্থানীয় লোকসকলে দীনেশ ৰনৱান নামৰ এজনক ধৰিবলৈ সক্ষম হয় আৰু পুলিচৰ হাতত গতাই দিয়ে।
উল্লেখ্য যে,দীনেশেই গাড়ীখন চলাই আছিল বুলি পুলিচে নিশ্চিত কৰিছে। গাড়িখন জব্দ কৰা হৈছে আৰু পলাই যোৱা আন তিনিজনৰ সন্ধানত অভিযান চলি আছে।
এই দুৰ্ঘটনাত মুখ্যমন্ত্ৰী ভজনলাল শৰ্মাই মৃতৰ পৰিয়ালৰ প্ৰতি গভীৰ সমবেদনা জনাইছে। আহতসকলৰ চিকিৎসাৰ সকলো ব্যৱস্থা কৰিবলৈ জিলা প্ৰশাসনক নিৰ্দেশ দিয়া হৈছে। ৰাজ্যৰ স্বাস্থ্য মন্ত্ৰী গজেন্দ্ৰ সিং খিমসাৰে চিকিৎসালয়ত গৈ আহতসকলৰ খবৰ লয়।