মুখ্যমন্ত্রী হিমন্ত বিশ্ব শৰ্মাৰ পৰিয়ালৰ সম্পত্তিৰ পৰিমাণ অভাৱনীয় হাৰত বৃদ্ধি হোৱা বুলি আঙুলিয়াই দি ইয়াৰ কৌশল অসমৰ যুৱ সমাজকো শিকাবলৈ নিখিল ভাৰত কংগ্ৰেছ কমিটী (এআইচিচিচি) ৰ সামাজিক মাধ্যম আৰু তথ্য প্রযুক্তি বিভাগৰ অধ্যক্ষ সুপ্রিয়া শ্রীনেটেই মুখ্যমন্ত্রীক আহ্বান জনাইছে।
সোমবাৰে এক সংবাদমেলত নেত্ৰীগৰাকীয়ে কয় যে মুখ্যমন্ত্রীয়ে মনোনয়নপত্ৰৰ লগত দাখিল কৰা সম্পত্তিৰ শপতনামাৰ তালিকাৰ ভিত্তিতে তেওঁ এই আহ্বান জনাইছে। কাৰণ অসমৰ যুৱ সমাজে এটা সংস্থাপন বিচাৰি, উপাৰ্জনৰ পথ বিচাৰি কৰ্ণাটক, কেৰালালৈ যাবলৈ বাধ্য হৈছে। শ্রীনেটে কয়, ‘যোৱা পাঁচ বছৰত অসমৰ মুখ্যমন্ত্ৰীৰ পৰিয়ালৰ সম্পত্তি ৬৬৫ শতাংশ বৃদ্ধি হৈছে। ২০১৬ত অসমৰ মুখ্যমন্ত্ৰীৰ সম্পত্তিৰ পৰিমাণ আছিল এক কোটি ৭৭ লাখ টকা। মুখ্যমন্ত্রীয়ে মনোনয়নপত্ৰৰ লগত দাখিল কৰা শপতনামাৰ পৰা দেখা গৈছে যে তেওঁৰ সম্পত্তি ১৩১ শতাংশলৈ বৃদ্ধি হৈছে। এক কোটি ৭৭ লাখৰ পৰা এতিয়া তেওঁৰ সম্পত্তি বাঢ়িছে ১৩.৫৯ কোটি টকালৈ। দেখা গৈছে যে মুখ্যমন্ত্রী মালামাল হোৱা নাই। মালামাল হৈছে মুখ্যমন্ত্ৰীৰ পত্নী। ইয়াৰ ফলত মুখ্যমন্ত্ৰীৰ পৰিয়ালৰ সম্পত্তিৰ পৰিমাণ একেবাৰে ৬৬৫ শতাংশলৈ জাঁপ মাৰি বৃদ্ধি হৈছে। আজি অসমত এনে কোনো ক্ষেত্র নাই য’ত মুখ্যমন্ত্ৰীৰ পৰিয়ালৰ দখল নাই। ৰিয়েল ইষ্টেট, আন্তঃৰাষ্ট্ৰীয় স্কুল, মেকড’নাল্ড, ৰিজ’ৰ্ট, চাহ বাগিচা, টিভি চেনেল, পৰিবহণ সকলোতে মুখ্যমন্ত্ৰীৰ পৰিয়ালে দখল কৰিছে। সেইকাৰণে মুখ্যমন্ত্ৰীৰ পৰিয়ালৰ সম্পত্তিৰ হাৰ ৬৬৫ শতাংশলৈ বাঢ়িছে। ২০১৬ত মুখ্যমন্ত্ৰীৰ স্থাৱৰ সম্পত্তিৰ মূল্য আছিল চাৰে তিনি কোটি টকা। ২০২৬৩ ২০ কোটি টকালৈ বৃদ্ধি হৈছে। অসমত ৰিয়েল ইষ্টেটৰ ব্যৱসায় ৩৫০ শতাংশ বৃদ্ধি পাবলৈ হ’লে প্রতি বছৰে ৩৫ শতাংশলৈ বৃদ্ধি পাব লাগে। অসমৰ সাধাৰণ লোকৰ তিনি কোটি টকাৰ সম্পত্তি ২০ কোটি টকালৈ এই সময়ছোৱাত বৃদ্ধি পাইছেনে? সেইকাৰণে মই মুখ্যমন্ত্রীক আহ্বান জনাওঁ যে সম্পত্তি কিদৰে বৃদ্ধি পাৰি তাৰ কৌশল তেওঁ অসমৰ ৰাইজক জনাব লাগে।’
মুখ্যমন্ত্রীক ‘বিনিয়োগ গুৰু’ হ’বলৈও আহ্বান জনায় কংগ্ৰেছ নেত্ৰীগৰাকীয়ে। হিমন্ত বিশ্ব শৰ্মাৰ সম্পত্তিৰ পৰিমাণৰ লগত প্রাক্তন মুখ্যমন্ত্রী প্রয়াত তরুণ গগৈ আৰু পুত্ৰ গৌৰৱ গগৈৰ সম্পত্তিৰ তুলনাও শ্রীনেটে কৰে। তেওঁ উল্লেখ কৰে যে ১৫ বছৰ মুখ্যমন্ত্ৰীৰ পদত থকাৰ পাছতো তেওঁলোকৰ সম্পত্তি পাঁচ লাখ আৰু পত্নীৰ ১০ হেজাৰ টকা আছিল। গৌৰৱ গগৈৰ ২০১৩-১৪৩ ১৪ লাখ টকাৰ সম্পত্তি আছিল। পত্নীৰ আছিল ৪০ৰ পৰা ৪৫ লাখ টকা।
অসমৰ মুখ্যমন্ত্ৰীৰ বিৰুদ্ধে ছিণ্ডিকেট চলোৱাৰ অভিযোগ কৰি শ্রীনেটে প্রশ্ন কৰে এনেদৰে, ‘চাহ, কয়লা, ধপাত, চুপাৰি, পাণ সকলোৰে পৰা ছিণ্ডিকেটযোগে ধন সংগ্ৰহ কৰি থকা হৈছে। অবৈধ কৰ সংগ্ৰহ কৰি থকা হৈছে। সেইবোৰ মুখ্যমন্ত্ৰীৰ পকেটলৈ আহি আছে। মুখ্যমন্ত্রী আৰু মুখ্যমন্ত্ৰীৰ পৰিয়ালৰ সম্পত্তি এনেদৰেই বৃদ্ধি হৈছে নেকি?’
অসমৰ যুৱ সমাজক উপাৰ্জনৰ পদ দেখুৱাবলৈ মুখ্যমন্ত্ৰীক পুনৰ আহ্বান জনাই শ্রীনেটে এইবুলিও কয় যে অসমত ২৫ লাখ পঞ্জীয়নভুক্ত নিবনুৱা আছে। তাৰে মাত্র ০.১ শতাংশইহে নিযুক্তি লাভ কৰিছে। অসম চৰকাৰে দুই লাখ কোটি টকাতকৈ অধিক ঋণ লৈছে। এই বৃহৎ ঋণৰ বোজা আজি জন্ম হোৱা শিশুটিৰ পৰা একেবাৰে বয়োবৃদ্ধজনলৈ মূৰত পৰিছে। জনমূৰি ঋণৰ পৰিমাণ ৫৪ হেজাৰ টকালৈ বৃদ্ধি হৈছে।
তেওঁ এই বুলিও কয় যে কংগ্ৰেছ চৰকাৰৰ দিনত অসম দ্রুত উন্নয়নৰ ৰাজ্যৰ তালিকাত আছিল। তাৰ বিপৰীতে এতিয়া অসম নিটি আয়োগৰ তথ্য অনুসৰি ২৮ খন ৰাজ্যৰ তালিকাৰ ১৩ নম্বৰতহে আছে। মুঠতে সকলো দিশৰে সাধাৰণ জনতাক মুখ্যমন্ত্রী আৰু তেওঁৰ পৰিয়ালে মাধমাৰ দিয়া বুলি মন্তব্য কৰি শ্রীনেটে কয়, ‘অসমত এতিয়া যিটো ক্ষেত্রতে উন্নয়ন হৈছে সেইটোতে হিমন্ত বিশ্ব শৰ্মাৰ কোম্পানী আছে। আজি অসমত আঠ হেজাৰ চৰকাৰী শিক্ষানুষ্ঠান বন্ধ কৰি দিয়া হৈছে। তাৰ বিপৰীতে মুখ্যমন্ত্ৰীৰ পৰিয়ালৰ আন্তঃৰাষ্ট্ৰীয় শিক্ষানুষ্ঠান গঢ়ি উঠিছে। বিজেপিৰ ১০ বছৰীয়া শাসন কালত মুখ্যমন্ত্রী, মুখ্যমন্ত্ৰীৰ পৰিয়াল আৰু মুখ্যমন্ত্ৰীৰ ঘনিষ্ঠ ছিণ্ডিকেটৰ কাণ্ডাৰীসকল মালামাল হ’ল আৰু কাঙাল হৈছে অসমৰ জনতা। মই এই দাবী কৰো যে অসমৰ কোনো লোকৰে সম্পত্তি ৬৫০ শতাংশলৈ বৃদ্ধি হোৱা নাই। বৃদ্ধি হৈছে কেৱল মাত্র এটা পৰিয়ালৰ।’