Piyanka Gandhi Election Rally in Nazira:
দৈনিক অগ্ৰদূত ডিজিটেল ডেক্স:–ৰাজ্যৰ বিধানসভাৰ নিৰ্বাচনৰ দিন চমু চাপি অহাৰ লগে লগে অসমলৈ সোঁত বৈছে শাসক – বিৰোধীৰ ষ্টাৰ কেম্পেইনাৰ সকল। বুধবাৰে উত্তৰ অসমত প্ৰধানমন্ত্ৰী নৰেন্দ্ৰ মোদীয়ে বিজেপিৰ প্ৰাৰ্থীৰ হৈ জনসভা কৰাৰ বিপৰীতে উজনি অসমৰ নাজিৰা,খোৱাঙত কংগ্ৰেছ মিত্ৰজোঁটৰ প্ৰাৰ্থীৰ হৈ ৰণডংকা বজালেহি কংগ্ৰেছৰ শীৰ্ষ নেত্ৰী প্ৰিয়ংকা গান্ধীয়ে ।
উল্লেখ্য যে,কংগ্ৰেছ নেত্ৰী গৰাকীয়ে দুপৰীয়াভাগত ডিব্ৰুগড় বিমানবন্দৰত উপস্থিত হোৱাৰ পিছতে উষ্ম আদৰণি জনাই এপিচিচিৰ সভাপতি গৌৰৱ গগৈ,জীতেন্দ্ৰ সিং আৰু বিৰোধী দলপতি দেৱব্ৰত শইকীয়াই ৷
কংগ্ৰেছ নেত্ৰী গৰাকীয়ে নাজিৰা, টিংখং আৰু খোৱাঙত কংগ্ৰেছ নেতৃত্বাধেন মিত্ৰজোঁটৰ প্ৰাৰ্থীৰ হৈ নিৰ্বাচনী প্ৰচাৰ চলাব প্ৰিয়ংকা গান্ধীয়ে ।
ডিব্ৰুগড়ত উপস্থিত হোৱা কংগ্ৰেছ নেত্ৰী গৰাকীয়ে নাজিৰা সমষ্টিত বিৰোধী দলপতি দেৱব্ৰত শইকীয়াৰ হৈ নিৰ্বাচনী প্ৰচাৰ সভাত অংশ লোৱাৰ উদ্দেশ্যৰে স্থলপথেৰে বৃহৎ কনভয়ত নাজিৰাৰ মেকিপুৰ পূজা ফিল্ডলৈ ৰাওনা হয় ৷
মেকিপুৰ পূজা ফিল্ডত উপস্থিত হৈ কে’বা সহস্ৰাধিক জনতাৰ সন্মুখত বিজেপিৰ বিৰুদ্ধে সৰৱ হৈ কয়,অসমৰ উন্নয়ন হোৱা নাই ৷ উন্নয়ন যদি হৈছে এটা পৰিয়ালৰ হৈছে । যিটো পৰিয়ালৰ অলেখ মাটি আৰু স্থাবৰ – অস্থাৱৰ সম্পতি পৰ্বতসম হৈছে। খাটি খোৱা শ্ৰমজীৱী লোকৰ মাটি কাঢ়ি দিয়া হৈছে পুঁজিপতি উদ্যোগপতিক ৷ বিভিন্ন আঁচনিৰ প্ৰলোভনৰে হিতাধিকাৰী সৃষ্টি কৰি ,হিতাধিকাৰী সকলক বিজেপিৰ সভাপতি আঁচনিৰ পৰা নাম কটোৱাৰ ভয়-ভাবুকিৰে সভাত অংশ ল’বলৈ একপ্ৰকাৰ বাধ্য কৰাইছে ৷
ৰাজ্যৰ চৌদিশে বিজেপি চৰকাৰে এক সন্ত্ৰাসময় পৰিস্থিতি সৃষ্টি কৰিছে ৷ এটা নিদিষ্ট সম্প্ৰদায়ক টাৰ্গেট কৰি তেওঁলোকক ভূমি কাঢ়ি দিয়া হৈছে আদানী- আম্বাণীক ৷ হিমন্ত বিশ্বশৰ্মা চৰকাৰৰ দিনত ৰাজ্য খনত সকলো বস্তুৰ কেৱল দাম বাঢ়িছে ৷একেদৰে বৃদ্ধি পাইছে দুর্নীতি ৷ তদুপৰি চাহ শ্ৰমিকসকলৰ মজুৰি আজিলৈকে বৃদ্ধি হোৱা নাই ৷ কিন্ত বাগিচাৰ ৰাইজৰ বহু উন্নতি কৰিছো বুলি জয়ঢোল কোৱাই ৷
৷সেয়েহে আগন্তুক নিৰ্বাচনত দিছপুৰৰ পৰা বিজেপিক উৎখাত কৰি কংগ্ৰেছ মিত্ৰজোঁটৰ চৰকাৰৰ অনাৰ বাবে ৰাইজে বিজেপি বিৰোধী স্থিতি গ্ৰহণ কৰক । জনস্বাৰ্থৰ খাটিৰত কংগ্ৰেছ মিত্ৰজোঁটৰ প্ৰাৰ্থীক ভোট দি জয়যুক্ত কৰাওক। বিশাল জনসভা খনত গৌৰৱ গগৈ,জীতেন্দ্ৰ সিং আৰু বিৰোধী দলপতি দেৱব্ৰত শইকীয়া সহ কে’বা গৰাকী নেতা উপস্থিত থাকে।
উল্লেখ্য যে প্ৰিয়ংকা গান্ধীয়ে টিংখঙত বিপুল গগৈৰ হৈ নিৰ্বাচনী প্ৰচাৰ চলোৱাৰ বিপৰীতে খোৱাঙত অজাপৰ প্ৰাৰ্থী লুৰীণজ্যোতি গগৈৰ হৈ নিৰ্বাচনী প্ৰচাৰ চলাব ।
