PM Election Rally in Gogamukh:
দৈনিক অগ্ৰদূত ডিজিটেল ডেক্স:–ৰাজ্যৰ বিধানসভা নিৰ্বাচনৰ প্ৰচাৰাভিযান অন্ত পৰিব ৭ মাৰ্চ ৷ক্ৰমাৎ ডিব্ৰুগড়ৰ নিৰ্বাচনী জ্বৰৰ উত্তাপ বৃদ্ধি পাইছে ইতিমধ্যে নিজ নিজ দলীয় প্ৰাৰ্থীৰ সমৰ্থনত প্ৰচাৰ সভাত অংশ ল’বৰ বাবে আগমন ঘটিছে ৰথী- মহাৰথীৰ ৷ শাসকীয় বিজেপিৰ মিত্ৰজোঁটৰ সমান্তৰালভাৱে কংগ্ৰেছ মিত্ৰজোঁটৰ হাই প্ৰফাইল তাৰকা প্ৰচাৰকৰ আগমণ হৈছে অসমলৈ ৷
বিজেপিৰ প্ৰচাৰাভিযানত নতুন মাত্ৰা প্ৰদানৰ উদ্দেশ্যৰে মঙলবাৰে বায়ু সেনাৰ বিশেষ বিমানেৰে ডিব্ৰুগড়ত উপস্থিত হোৱা দেশৰ প্ৰধানমন্ত্ৰী নৰেন্দ্ৰ মোদীয়ে মনোহাৰী চাহ বাগিচাৰ ৰিৰ্জটত নিশাটো কটাই আজি পুৱাভাগত বাগিচাৰ খনৰ মহিলা চাহ শ্ৰমিকৰ এক মনবিনিময় অনুষ্ঠানতে অংশ লোৱাৰ লগতে কেঁচা পাতো চিঙে ৷ ইয়াৰ পিছতে প্ৰধানমন্ত্ৰী গৰাকী বায়ু সেনাৰ হেলিকপ্টাৰে উত্তৰ অসমত বিশাল প্ৰচাৰ সভাত অংশ ল’বৰ বাবে উৰা মাৰে ধেমাজীলৈ ৷
ধেমাজীৰ গোগামুখত অস্থায়ী হেলিপেডত অৱতৰণ কৰাৰ পিছত প্ৰধানমন্ত্ৰী গৰাকীক কেন্দ্ৰীয় মন্ত্ৰী সৰ্বানন্দ সোনোৱাল,মন্ঃ ডা:ৰণোজ পেগু সহ বহু কেই গৰাকী নেতাই উস্ম আদৰণি জনাই ৷ ইয়াৰ পিছতে বিশাল সভাত উপস্থিত হোৱাৰ লগেলগে বিপুল হৰ্ষোল্লাসৰে প্ৰধানমন্ত্ৰীক আদৰণি জনাই প্ৰায় এক লক্ষাধিক জনতাই ৷
বিশাল সভা খনিত ভাষণ প্ৰদানৰ আৰম্ভণিতে অসমীয়াতে অসমবাসীক আগতীয়াকৈ বহাগ বিহুৰ শুভেচ্ছা জনালে প্ৰধানমন্ত্ৰী নৰেন্দ্ৰ মোদীয়ে l কংগ্ৰেছক তীব্র কটাক্ষ কৰি প্রধানমন্ত্রীয়ে কয়, অসমত কংগ্ৰেছৰ পৰাজয়ৰ হেটট্ৰিক হ’ব | কংগ্ৰেছৰ তথাকথিত ৰাজকুমাৰৰ পৰাজয়ৰ শতক হ’ব৷ ইয়াৰ বিপৰীতে আপোনালোকৰ আশীৰ্বাদত মই প্রধানমন্ত্রী হিচাপে হেটট্ৰিক কৰিলো৷ গোগামুখৰ এই খেলপথাৰ খনলৈ মই তিনিবাৰ আহিলো৷ আজিৰ এই বৃহৎ জনতাই প্রমাণ কৰে অসমত বিজেপি চৰকাৰৰ হেটট্ৰিক হ’ব ৷
কংগ্ৰেছক লক্ষ্য কৰি প্ৰধানমন্ত্ৰী গৰাকীয়ে কয়,কংগ্ৰেছৰ কাৰ্যকালত বন্দুক-বোমাৰ শব্দত কঁপিছিল অসম৷ অসমলৈ এতিয়া শান্তিৰ পৰিৱেশ ঘূৰি আহিছে৷ বন্দুক এৰি নতুন ভৱিষ্যতৰ পথেৰে আগবাঢ়িছে বিদ্রোহী বিদ্রোহী সংগঠনৰ সদস্যই ৷ এসময়ত অসম কেৱল চাহৰ বাবে পৰিচিত আছিল ৷ কিছুদিনৰ পাছত চিপছৰ বাবেও পৰিচিত হ’ব অসম ৷ জাগীৰোডৰ ছেমি কণ্ডাক্টৰ প্ৰকল্পত উৎপাদিত চিপছৰ বাবেও পৰিচিত হ’ব ।
অসমক আৰু অগ্ৰগতি দিয়াৰ গেৰাণ্টী দি প্ৰধানমন্ত্ৰী নৰেন্দ্ৰ মোদীয়ে আৰু কয় ,ক্ষমতাৰ বাবে কংগ্ৰেছে অসমক ভাগ ভাগ কৰিছে। ৬০-৬৫ বছৰে কংগ্ৰেছে ব্ৰহ্মপুত্ৰত মাথোঁ তিনিখনহে দলং নিৰ্মাণ কৰিছে। বিজেপিয়ে ৫ খনকৈ দলং উপহাৰ দিলে।অসমৰ ৩ লাখ মহিলাই লাখপতি বাইদেউৰ সুবিধা লাভ কৰিছে’৪০ লাখ মহিলাক লাখপতি বনোৱাৰ সংকল্প বিজেপিৰ ৷
কংগ্ৰেছক টাৰ্গেট কৰি মোদীয়ে কয়,কংগ্রেছে নতুন খেল খেলিবলৈ আৰম্ভ কৰিছে ৷ ভোটবেংকৰ স্বাৰ্থতে ষড়যন্ত্ৰ ৰচিছিল কংগ্রেছে ৷ সাম্প্রদায়িক বিধেয়ক সংসদত আহিবলৈ নিদিলে বিজেপিয়ে ৷ সংবিধান প্রণেতাৰ পিঠিত ছুৰী মৰাৰ খেল খেলিছিল কংগ্রেছে ৷ কংগ্রেছে অবৈধ বাংলাদেশীৰ পক্ষত ঠিয় দিছে ৷ বিজেপিয়ে অবৈধ বাংলাদেশীৰ বিৰুদ্ধে যুঁজি যাব ৷ অসমৰ ভূমি অবৈধ বাংলাদেশীক দখল কৰিবলৈ দিয়া নহ’ব । এইক্ষেত্ৰত এখন প্ৰগতিশীলকামী চৰকাৰ গঠন কৰিবৰ বাবে বিজেপিক দিছপুৰৰ মচনদত বঢাওক আৰু উন্নয়ন তৰাম্বিত কৰিবলৈ বিজেপিক ভোট দি জয়যুক্ত কৰক ।
কেন্দ্ৰীয় মন্ত্ৰী সৰ্বানন্দ সোনোৱাল ,ধেমাজীৰ বিজেপি প্ৰাৰ্থী ডা:ৰণোজ পেগু,উত্তৰ অসমৰ সকলো কেইখন আসনত প্ৰতিদ্বন্দ্বিতা কৰা প্ৰাৰ্থী ক্ৰমে নৱ কুমাৰ দলে,মানৱ ডেকা,ভূৱন পেগু,ঋষিৰাজ হাজৰিকা,ভূপেন বৰা,এন গগৈ সহ বহু কেই গৰাকী জ্যেষ্ঠ বিজেপি নেতা উপস্থিত থাকে ৷ উল্লেখ্য যে গোগামুখৰ সভাৰ পিছতে প্ৰধানমন্ত্ৰী গৰাকী উৰা মাৰিব বিশ্বনাথ জিলাৰ বিহালীলৈ ৷
