NAGAON:
দৈনিক অগ্ৰদূত ডিজিটেল ডেক্স:–ৰূপকোঁৱৰ জ্যোতিপ্ৰসাদ আগৰৱালাই সোণপখিলী শিশু-নাটিকাখনি অসম্পূৰ্ণ অৱস্থাতে এৰিছিল৷ পাছলৈ সাহিত্যাচাৰ্য অতুল চন্দ্ৰ হাজৰিকাই সেইখন সম্পূৰ্ণ কৰে৷ এই শিশু-নাটিকাখনি নগাঁৱৰ এডু-আৰ্ট ফাউণ্ডেচ্নৰ ভগ্নী প্ৰতিষ্ঠান সূত্ৰধাৰে যোৱা নিশা নগাঁৱৰ কলংপাৰস্থিত স্থায়ী মঞ্চত মঞ্চস্থ কৰে৷ এই শিশু-নাটিকাখনিৰ বিষয়বস্তু আৰু কাব্যিক গাঁথনি অতি আকৰ্ষণীয় ৷ সোণপখিলীক বিচাৰি কবিতাকুমাৰ, চিন্তাকুমাৰ, মনীষাকুমাৰ, কল্পিতা আৰু ছন্দিতাৰ যি যাত্ৰা আৰু সেই যাত্ৰাত তেওঁলোকৰ বিভিন্ন অভিজ্ঞতাৰ কাহিনীয়েই এই সোণপখিলীৰ মূল বিষয় ৷
কেনেদৰে তেওঁলোকে বাওনাৰ দেশ পাৰ হৈ গৈ ৰাক্ষসৰ দেশত সোমায় আৰু অৱশেষত নিদ্ৰাদেৱীৰ সহায়ত সকলো বাধা-বিঘিনি পাৰ কৰি সোণপখিলীৰ সোনৰ কাৰেংত উপস্থিত হয়, সেইয়া এই নাটিকাৰ কাহিনীৰ অতি আকৰ্ষণীয় দিশ৷ সোণপখিলী ৰূপকোঁৱৰৰ সৃষ্টিৰ জ্ঞান, ধ্যান, শান্তি, সম্প্ৰীতি, মৰম আৰু ভালপোৱাৰ প্ৰতীক৷ জ্যোতিপ্ৰসাদ আগৰৱালাই নাটিকাখনি সম্পূৰ্ণকৈ লিখা নাছিল৷ তথ্য অনুসৰি, সাহিত্যাচাৰ্য অতুল চন্দ্ৰ হাজৰিকাই এই নাটিকাখনিক সম্পূৰ্ণ ৰূপ দিছিল৷ সেইকাৰণে সম্পূৰ্ণ সংস্কৰণটো বিচাৰি উলিয়াই সংৰক্ষণৰ উদ্দেশ্যেৰে সূত্ৰধাৰৰ দ্বাৰা নাটিকাখনি পুনৰ মুদ্ৰন কৰাৰ প্ৰচেষ্টা কৰা হয়৷ উক্তদিনা মঞ্চ উদ্বোধন কৰাৰ লগতে সংৰক্ষণৰ উদ্দেশ্যেৰে পুনৰ মুদ্ৰন কৰা সোণপখিলীৰ সম্পূৰ্ণ সংস্কৰণটো ৰাইজৰ সুবিধাৰ্থে মুকলি কৰি দি বিশিষ্ট নাট্যকাৰ, পৰিচালক দীপক বৰাই এইয়া অসমৰ নাট্যক্ষেত্ৰৰ বাবে আশাপ্ৰদ পদক্ষেপ বুলি উল্লেখ কৰে৷ প্ৰায় এক ঘণ্টাৰ নাট্যপ্ৰদৰ্শনত সূত্ৰধাৰৰ শিশু শিল্পীসকলৰ অভিনয়, নৃত্য, গীত আৰু অঙ্গ সঞ্চালনে উপস্থিত প্ৰায় তিনিশতাধিক দৰ্শকক মন্ত্ৰমুগ্ধ কৰি ৰাখে ৷
প্ৰতিকূল বতৰকো নেওঁচি দৰ্শকৰ উপস্থিতিয়ে নাট্যসন্ধিয়াটিক অধিক সজীৱ কৰি তোলে৷ উল্লেখযোগ্য যে এই নাটিকাখনত থকা প্ৰতিটো গীতত সুৰ-সংযোজন কৰাৰ লগতে বাণীবন্ধন কৰি সংৰক্ষণ কৰি ৰখাৰ ব্যৱস্থা কৰা হৈছে৷ ফেণ্টাছী সমৃদ্ধ নাটিকাখনিৰ সংগীত পৰিচালনা আৰু গীতৰ সুৰ কৰে উদীয়মান শিল্পী আচাৰ্দ মাছুদ ৰহমানে৷ উদীয়মান শিল্পী প্ৰাচুৰ্য মহন্তৰ দ্বাৰা পৰিকল্পিত অপূৰ্ব দৃশ্যসজ্জা আৰু মূচ্চৰ্না মহন্ত হাজৰিকাৰ মনোমোহা পোহৰ সংযোজন আছিল নাট্যসন্ধিয়াটিৰ অন্যতম আকৰ্ষণ৷ সুদক্ষ পৰিচালনাৰে গৌৰৱ কুমাৰ হাজৰিকাই নিজৰ নিপুণতাৰ পৰিচয় দাঙি ধৰে৷ মূলতঃ নৃত্যশিল্পী ৰূপে পৰিচিত যদিও তেওঁ বৰ্তমানলৈকে কেইবাখনো শিশু নাট পৰিচালনা কৰিছে ৷
এই নাট্যসন্ধিয়াটিত দৰ্শকৰূপে উপস্থিত থাকে নগাঁৱৰ বিশিষ্ট শিল্পী তাৰিণী মোহন শৰ্মাকে প্ৰমুখ্য কৰি ধনঞ্জয় তালুকদাৰ, মনোজ বৰদলৈ, পবিত্ৰ কলিতা, ধৰ্মেশ্বৰ গোস্বামী, ৰাজেন ফুকনৰ দৰে নগাঁৱৰ বহুকেইজন নাট্যকৰ্মী৷ অনুষ্ঠানৰ শেষত সমূহ শিল্পীক মানপত্ৰ প্ৰদান কৰাৰ লগতে সূত্ৰধাৰৰ নাট্য শাখাৰ এবছৰীয়া পাঠ্যক্ৰম সম্পূৰ্ণ কৰা ছাত্ৰ-ছাত্ৰীসকলক মানপত্ৰ প্ৰদান কৰে দীপক বৰাই ৷
এই নাটিকাখনত অংশগ্ৰহণকাৰী শিল্পী আৰু কলা-কুশলীসকল হ’ল দেৱাক্ষী, দেবাঙ্গনা, ঋদ্ধি, বেদাঙ্গনা, বিশ্ৰুতি, গৌৰাংগী, মনিতজ্যোতি, বনশিকা, হৰ্ষিতাৰাণী, এঞ্জেল, শিৱন্যা, হৰ্ষিতা, জিজ্ঞাসা, দিব্যংকা, অনভি, দেবলীনা, লৌচনা, আৰুশ, ইশান, সমীক্ষা, দৃশিকা, ভিক্টৰ, ৰাজ, সিদ্ধাৰ্থ,ময়ুৰজ্যোতি আৰু ফাৰহাট মেহজাবিন৷ পোহৰ ব্যবস্থাপনা তফজ্জল ইছলাম হাজৰিকা, ভাইটি, উৎপল ভূঞাৰ৷ শব্দ বাবুুৰ ৷