উত্তৰ ছিকিমত ধাৰাবাহিক বৰষুণৰ ফলত সংঘটিত একাধিক ভূমিস্খলন বাবে লাচেন অভিমুখী পথ সম্পূৰ্ণৰূপে বন্ধ হৈ পৰিছে। ফলত শতাধিক পৰ্যটক আবদ্ধ হৈ পৰিছে।
তথ্য অনুসৰি, চুংথাং-লাচেন সংযোগী পথৰ কেবাটাও স্থানত মাটি সৰি পৰা আৰু শিল খহি পৰাৰ বাবে যাতায়াত সম্পূৰ্ণৰূপে ব্যাহত হৈছে। ফলত লাচেনলৈ যোৱা আৰু তাত থকা পৰ্যটকসকল আগবাঢ়িব বা উভতি আহিব নোৱাৰা অৱস্থাত পৰিছে।
প্ৰশাসনৰ ফালৰ পৰা জনোৱা মতে, প্ৰায় ১৫০-২০০ জন পৰ্যটক এই ঘটনাত আৱদ্ধ হৈ আছে। আৱদ্ধ লোকসকলক চুংথাংস্থিত ITBP শিবিৰ আৰু এখন গুৰদুৱাৰাত অস্থায়ীভাৱে আশ্ৰয় দিয়া হৈছে। তেওঁলোকৰ বাবে খাদ্য, পানী আৰু প্ৰাথমিক চিকিৎসাৰ ব্যৱস্থাও কৰা হৈছে।
উদ্ধাৰ আৰু সহায় অভিযান ইতিমধ্যে আৰম্ভ কৰা হৈছে। বৰ্ডাৰ ৰোডছ অৰ্গানাইজেশ্যন (BRO)-এ পথ মুকলি কৰাৰ কাম চলাই আছে। অৱশ্যে অব্যাহত বৰষুণ আৰু বেয়া বতৰৰ বাবে এই কামত বাধা সৃষ্টি হৈছে।
প্ৰশাসনে জনোৱা মতে, বতৰ স্বাভাৱিক হ’লেহে সম্পূৰ্ণৰূপে পথ মুকলি কৰা সম্ভৱ হ’ব। ইয়াৰ মাজতে কিছু পৰ্যটকে নিজৰ ভ্ৰমণ বাতিল কৰি গেংটকলৈ উভতি গৈছে।
উল্লেখযোগ্য যে, বৰষুণৰ সময়ত উত্তৰ ছিকিমৰ পাহাৰীয়া অঞ্চলসমূহত সঘনাই ভূমিস্খলন সংঘটিত হয়, যাৰ ফলত যোগাযোগ ব্যৱস্থা ব্যাহত হয় আৰু পৰ্যটন খণ্ডতো প্ৰভাৱ পৰে।