Nitish Kumer:
শুকুৰবাৰে বিহাৰৰ মুখ্যমন্ত্ৰী নীতিশ কুমাৰে ৰাজ্যসভাৰ সদস্য হিচাপে শপত গ্ৰহণ কৰে। শপত বাক্য পাঠ কৰোৱালে ৰাজ্যসভাৰ উপ-সভাপতি চি.পি. ৰাধাকৃষ্ণনে ।
উল্লেখ্য যে চাৰিওটা সদনৰ সদস্য হৈ অভিলেখ গঢ়িলে মুখ্যমন্ত্ৰী নীতিশ কুমাৰে। ইয়াৰ পূৰ্বে দুবাৰকৈ লোকসভা, বিহাৰ বিধান পৰিষদ, বিহাৰ বিধানসভাৰ সদস্য হিচাপে কাৰ্যনিৰ্বাহ কৰি ৰাজ্যসভাত এইবাৰ প্ৰথমবাৰৰ বাবে স্থান লাভ কৰিছে।
শপতগ্ৰহণৰ পিছতে নীতিশ কুমাৰে প্ৰধানমন্ত্ৰী নৰেন্দ্ৰ মোডী আৰু কেন্দ্ৰীয় গৃহমন্ত্ৰী অমিত শ্বাহৰ সৈতে আনুষ্ঠানিক বৈঠকত মিলিত হোৱাৰ সম্ভাৱনা আছে। এই বৈঠকৰ সময়ত বিহাৰত এন ডি এ চৰকাৰৰ নতুন ৰূপ আৰু ভৱিষ্যতৰ ৰাজনৈতিক কাঠামোৰ বিষয়ে বিতংভাৱে আলোচনা কৰা হ’ব বুলি আশা কৰা হৈছে। এনডিএ এক সূত্ৰই জানিব দিয়া মতে নিতীশ কুমাৰ মোদী মন্ত্ৰীসভাৰ সদস্য হোৱাৰ সম্ভাৱনা আছে ৷
ইয়াৰ পূৰ্বে জেডিইউৰ কাৰ্যকৰী সভাপতি সঞ্জয় ঝা, ৰাজ্যসভাৰ সাংসদ ৰামনাথ ঠাকুৰ, বিহাৰৰ উপ- মুখ্যমন্ত্ৰী সম্ৰাট চৌধুৰী, মন্ত্ৰী অশোক চৌধাৰী আৰু মদন সাহনীয়েও শুকুৰবাৰে পুৱা দিল্লীত তেওঁক সৌজন্যতামূলক সাক্ষাৎ কৰে।
মনকৰিবলগীয়া যে বিহাৰত অতি সোনকালে নতুন চৰকাৰ গঠন হোৱাৰ সম্ভাৱনা প্ৰকট হৈ পৰিছে ৷ ১৪ এপ্ৰিলত নিতীশ কুমাৰে মুখ্যমন্ত্ৰী পদৰ পৰা অব্যাহতি লোৱাৰ চৰ্চা চলিছে।
শুকুৰবাৰে শপত গ্ৰহণ কৰি সন্ধিয়া পাটনালৈ উভতি আহিব নীতিশ কুমাৰ। ১৪ এপ্ৰিলত নীতিশ কুমাৰে মুখ্যমন্ত্ৰীৰ পদৰ পৰা পদত্যাগ কৰিব পাৰে বুলি চৰ্চা চলিছে।
উল্লেখ্য যে বৃহস্পতিবাৰে দিল্লীত উপস্থিত হোৱাৰ লগে লগে নীতিশ কুমাৰে স্পষ্ট কৰি দিয়ে যে এতিয়া তেওঁৰ মূল গুৰুত্ব ৰাষ্ট্ৰীয় ৰাজধানীত হ’ব। তেওঁ কয়, “মই ২০ বছৰ ধৰি বিহাৰত ব্যাপকভাৱে কাম কৰিছো আৰু কৰি যাম। কিন্তু এতিয়া ইয়াৰ পৰা (দিল্লী) কাম কৰিম।” অৱশ্যে পাটনা ভ্ৰমণ সঘনাই অব্যাহত থাকিব বুলিও তেওঁ স্পষ্ট কৰি দিয়ে।
আনহাতে নীতিশৰ উত্তৰসুৰী কোন হ’ব বুলি ব্যাপক চৰ্চা চলি থকাৰ মাজতে বিহাৰত বিজেপিৰে মুখ্যমন্ত্ৰী হোৱাটো ইতিমধ্যেই খাটাং হৈছে ৷অৱশ্যে নিতীশ কুমাৰৰ তনয় নিশান্ত কুমাৰক জেডিইউৰ কোটাৰ পৰা উপ-মুখ্যমন্ত্ৰী দুজনৰ ভিতৰত এজন হিচাপে প্ৰায় নিশ্চিত বুলি গণ্য কৰা হৈছে। এনে পৰিস্থিতিত আগন্তুক সময়ত বিহাৰত জেডিইউৰ সমগ্ৰ নেতৃত্ব নিশান্ত কুমাৰৰ হাততে থাকিব সেয়া স্পষ্ট হৈ পৰিছে ৷