Bihar New Govt:
বিহাৰৰ সদ্যসমাপ্ত নির্বাচনত সর্বাধিক আসন লাভ কৰিলেও বিজেপিয়ে পুনৰ সহযোগী দল জনতা দল (ইউ)ৰ মুৰব্বী নীতিশ কুমাৰকে মুখ্যমন্ত্ৰীৰ পদ এৰি দিবলৈ সন্মত হোৱা বুলি ব্যাপক চর্চা চলিছে। অৱশ্যে এইবাৰ মন্ত্ৰিত্বৰ ক্ষেত্ৰত বিজেপিৰ বিধায়কে বিদায়ী চৰকাৰতকৈ অধিক অগ্ৰাধিকাৰ লাভ কৰিব। যোৱা ১৪ নৱেম্বৰত ঘোষিত ৰাজ্যখনৰ নিৰ্বাচনী ফলাফলে এনডিএৰ অংশীদাৰ দলসমূহক উৎফুল্লিত কৰি ৰখাৰ সময়তে আগন্তুক চৰকাৰ গঠনক লৈ কেন্দ্রীয় গৃহমন্ত্রী অমিত শ্বাহৰ অধ্যক্ষতাত এনডিএৰ এখন সভা সম্পন্ন হৈছে। এই সভাত মুখ্যমন্ত্রীৰূপে কুমাৰকে বাহাল ৰখাৰ সিদ্ধান্ত গৃহীত হোৱা বুলি সূত্ৰই প্ৰকাশ কৰিছে।
সূত্রই লগতে জনোৱা মতে, এইবাৰ বিহাৰৰ এনডিএ চৰকাৰৰ মন্ত্রীসভাত সৰ্বাধিক সদস্য থাকিব বিজেপিৰ। শ্বাহৰ অধ্যক্ষতাত অনুষ্ঠিত এনডিএৰ অংশীদাৰ দলসমূহৰ উক্ত সভাত এই সিদ্ধান্ত গৃহীত হয় বুলি সূত্রই জানিবলৈ দিছে। সেই অনুসৰি এনডিএৰ মূল অংশীদাৰ দলটোৰ ১৫-১৬ জনে মন্ত্রিত্ব লাভৰ সম্ভাৱনা আছে। ইয়াৰ বিপৰীতে জেডিইউৰ ১৪ জন বিধায়কে কুমাৰৰ মন্ত্রীসভাত স্থান পাব পাৰে।
উল্লেখ্য যে ২৪৩ জনীয়া বিহাৰ বিধানসভাৰ সদ্যসমাপ্ত নির্বাচনত বিজেপিয়ে ৮৯ খন আসনত জয়লাভ কৰি সংখ্যাগৰিষ্ঠ দলত পৰিণত হয়। দ্বিতীয় সংখ্যাগৰিষ্ঠ দলত পৰিণত হোৱা কুমাৰৰ জেডিইউ জয়যুক্ত হয় ৮৫ টা সমষ্টিত। এনডিএৰ আন এক অংশীদাৰ কেন্দ্ৰীয় মন্ত্ৰী চিৰাগ পাছোৱান নেতৃত্বাধীন লোক জনশক্তি পার্টি (ৰামবিলাস)য়ে ১৯ খন আসনত জয়ধ্বজা উৰুৱায়। তদুপৰি এনডিএৰ আন দুই ক্ষুদ্ৰ অংশীদাৰ জিতন ৰাম মাঝিৰ হিন্দুস্তানী আৱাম মৰ্চা (ছেকুলাৰ)ই পাঁচখনত আৰু উপেন্দ্ৰ কুশৱাহাৰ ৰাষ্ট্ৰীয় লোকমৰ্চাই চাৰিখন আসনত জয়লাভ কৰে।
সূত্ৰই জনোৱা মতে এনডিএৰ সভাত গৃহীত এক সিদ্ধান্ত অনুসৰি এইবাৰ বিহাৰৰ মন্ত্রীসভাত সদস্যভুক্তিৰ ক্ষেত্ৰত এক নিয়ম অনুসৰণ কৰা হ’ব। সেয়া হ’ল প্ৰতি ছজন বিধায়কৰ মাজৰ পৰা এজনক মন্ত্রীসভাত অন্তর্ভুক্ত কৰা হ’ব। গতিকে এলজেপি (ৰামবিলাস)ৰ তিনিজন বিধায়কে মন্ত্রিত্ব লাভ কৰাৰ সম্ভাৱনা আছে। একেদৰে হিন্দুস্তানী আৱাম মৰ্চা (ছেকুলাৰ) আৰু ৰাষ্ট্ৰীয় লোকমৰ্চাই মন্ত্রীসভাৰ এটাকৈ পদ লাভ কৰাৰ সম্ভাৱনা আছে।
আনহাতে, নতুন মন্ত্রীসভাৰ শপতগ্ৰহণ অহা ১৯ বা ২০ নৱেম্বৰত সম্পন্ন হোৱাৰ সম্ভাৱনা ব্যক্ত কৰিছে সূত্রই। স্বাভাৱিকতে ৰাষ্ট্ৰীয় ৰাজনীতিতো প্ৰচুৰ প্ৰভাৱ থকা বিহাৰৰ নতুন মন্ত্রীসভা গঠনক লৈ সমগ্র দেশবাসীৰ দৃষ্টি নিবদ্ধ আছে।
লক্ষ্যণীয়ভাবে বিগত সময়ত দেখা গ’ল যে কেন্দ্ৰকে ধৰি কোনো ৰাজ্যৰ নিৰ্বাচনত এনডিএই জয়লাভ কৰিলে বিজেপিয়ে যিদৰে চৰকাৰ গঠন কৰিবলৈ বিচাৰে সেই অনুসৰিয়ে চৰকাৰ গঠন হয়। মৰ্চাৰ মূল অংশীদাৰ দলটোৰ সিদ্ধান্তক বিনাবাক্য ব্যয়ৰে সহযোগী দলসমূহে গ্ৰহণ কৰে। এইবাৰ বিহাৰৰ ক্ষেত্ৰতো আন এক লক্ষ্যণীয় দিশ হ’ল বিৰোধী একপ্ৰকাৰ নিশ্চিহ্ন হ’ল। সদ্যসমাপ্ত নির্বাচনত মাথোঁ ৩৫ খন আসনত জয়লাভ কৰি বিৰোধীয়ে কোনোমতে অস্তিত্ব জীয়াই ৰাখিছে।
ৰাজনৈতিক পৰ্যবেক্ষক মহলৰ মতে,হয়তো এইবাৰ বিধানসভাত নাথাকিব পাৰে কেবিনেট মৰ্যাদা সম্পন্ন বিৰোধী দলপতি পদৱী। বিৰোধী হিচাপে প্ৰয়োজনীয় আসন লাভ নকৰাৰ বাবে বিৰোধী দলপতি নাপাব ৰাষ্ট্ৰীয় জনতা দল( আৰজেডি)এ ৷
