Suvendu Adhikari:
দৈনিক অগ্ৰদূত ডিজিটেল ডেক্স:-সদ্য সমাপ্ত পশ্চিমবংগ বিধানসভাৰ নিৰ্বাচনত ২০৭খন আসন লাভ কৰি বিজেপিয়ে কলকাতা মচনদ দখল কৰাৰ পিছত ৰাজ্যখনৰ নতুন মুখ্যমন্ত্ৰী কোন হ’ব সেয়া জানিবলৈ সকলোৱে আগ্ৰহী হৈ আছে । বিজেপিৰ মুখ্যমন্ত্ৰীৰ নাম শেষ মুহূৰ্তলৈকে গোপনে ৰখাৰ সংস্কৃতিৰ প্ৰতি লক্ষ্য ৰাখি জনসাধাৰণৰ কৌতুহল আৰু অধিক হৈ পৰিছে। অৱশ্যে এটা সূত্ৰই দাবী কৰিছে যে পশ্চিমবংগৰ নতুন মুখ্যমন্ত্ৰীৰ নাম চূড়ান্ত কৰা হৈছে। মাত্ৰ আনুষ্ঠানিকতা বাকী ৷
বিজেপিৰ এক সূত্ৰই জনোৱা মতে, বিৰোধী দলৰ নেতা তথা একেৰাহে দুটা নিৰ্বাচনত মমতা বেনাৰ্জীক পৰাস্ত কৰা শুভেন্দু অধিকাৰী পশ্চিমবংগৰ পৰৱৰ্তী মুখ্যমন্ত্ৰী হোৱাৰ সম্ভাৱনা প্ৰৱল। সূত্ৰটোৱে স্পষ্টভাৱে উল্লেখ কৰিছে যে দলৰ শীৰ্ষ নেতৃত্বই অধিকাৰীৰ নামত সন্মতি প্ৰকাশ কৰিছে। বুধবাৰে সন্ধিয়া কলকাতা উপস্থিত হ’ব গৃহমন্ত্ৰী অমিত শ্বাহ I নিশাই গৃহমন্ত্ৰী শ্বাহৰ পৰ্যবেক্ষণত কলকাতাত অনুষ্ঠিত হ’ব বিজেপি বিধায়িনী দলৰ বৈঠক। নৱনিৰ্বাচিত বিধায়কসকলৰ সৈতে বৈঠকত মিলিত হোৱাৰ পিছত হয়তো ৰাজ্যৰ নতুন মুখ্যমন্ত্ৰী হিচাপে অধিকাৰীৰ নাম ঘোষণা কৰিব পাৰে।
জানিব পৰা মতে, পশ্চিমবংগ বিজেপিৰ ৰাজ্যিক সভাপতি সমীক ভট্টাচাৰ্যই শুভেন্দু অধিকাৰীৰ নাম প্ৰস্তাৱ কৰিব আৰু কেন্দ্ৰীয় গৃহমন্ত্ৰী অমিত শ্বাহে তেওঁৰ নাম বিধায়িনী দলৰ নেতা হিচাপে আনুষ্ঠানিকভাৱে ঘোষণা কৰিব।
উল্লেখ্য যে বিজেপিৰএক উচ্চস্তৰীয় সূত্ৰই জানিব দিয়া মতে বংগৰ নতুন চৰকাৰত থাকিব পাৰে দুজনকৈ উপ- মুখ্যমন্ত্ৰী ৷ ইয়াৰ বাবে দুটা নাম বিশেষ চৰ্চালৈ আহিছে। ৰাজ্যিক বিজেপিৰ সভাপতি সমিক ভট্টাচাৰ্য আৰু ৰূপা গাংগুলী ৷
ল্লেখযোগ্য বংগৰ নিৰ্বাচনৰ ফলাফলৰ পিছতে গৃহমন্ত্ৰী অমিত শ্বাহক পৰ্যবেক্ষক আৰু ওড়িশাৰ মুখ্যমন্ত্ৰী মোহন মাঝিক সহ-পৰ্যবেক্ষক হিচাপে নিযুক্তি দিয়া হৈছিল। আনহাতে বংগ বিজেপিৰ ৰাজ্যিক সভাপতি সমীক ভট্টাচাৰ্যই ইতিমধ্যে মঙলবাৰে স্পষ্ট কৰি দিছিল যে অহা ৯ মে’ত বিশ্বগুৰু ৰবীন্দ্ৰনাথ ঠাকুৰৰ জন্ম জয়ন্তীৰ দিনাই পশ্চিমবংগত বিজেপিয়ে নতুন চৰকাৰ গঠন কৰিব ৷
#শুভেন্দু অধিকাৰীৰ নাম কিয় চৰ্চালৈ আহিছে?
শুভেন্দু অধিকাৰী এসময়ত তৃণমূল কংগ্ৰেছত আছিল। তেওঁ আছিল মমতা বেনাৰ্জীৰ অতি ঘনিষ্ঠ মিত্ৰ। কিন্তু ২০২১ চনৰ বিধানসভা নিৰ্বাচনৰ ঠিক পূৰ্বে মমতা বেনাৰ্জীৰ প্ৰতি মোহভংগ হৈ বিজেপিত যোগদান কৰে। পৰৱৰ্তী সময়ত মমতা বেনাৰ্জী আৰু তৃণমূল কংগ্ৰেছৰ বিৰুদ্ধে তীব্ৰ প্ৰচাৰ চলাইছিল। আনকি তেওঁ মমতা বেনাৰ্জীক নন্দিগ্ৰামৰ আসনত মুখ্যমন্ত্ৰী হৈ থকাৰ সময়তে পৰাস্ত কৰিছিল। এইবাৰো সদ্য সমাপ্ত নিৰ্বাচনতো ভৱানীপুৰত মমতা বেনাৰ্জীক ১৫ হাজাৰৰো অধিক ভোটত তেওঁক পৰাস্ত কৰে। মমতা বেনাৰ্জীৰ চৰকাৰৰ কেইবাটাও গুৰুত্বপূৰ্ণ পদত মন্ত্ৰী হিচাপে অভিজ্ঞতা সম্পন্ন শুভেন্দু অধিকাৰীয়ে বিৰোধী দলপতি হিচাপেও কাৰ্যনিৰ্বাহ কৰিছিল। ফলস্বৰূপে তেওঁক বৰ্তমানৰ বংগ বিজেপি চৰকাৰৰ নেতৃত্ব দিবলৈ আটাইতকৈ যোগ্য প্ৰাৰ্থী হিচাপে গণ্য কৰা হয়। এনে প্ৰেক্ষাপটত শুভেন্দু অধিকাৰীয়েই বংগৰ মুখ্যমন্ত্ৰী হোৱাটো একপ্ৰকাৰ নিশ্চিত হোৱাৰ সম্ভাৱনা প্ৰৱল ৷