২১ দিনীয়া তলাবন্ধৰ পাছত কি হ’ব? তাকে লৈ ইতিমধ্যে দেশজুৰি ব্যাপক চর্চা আৰম্ভ হৈছে। অহা ১৪ এপ্ৰিলত তলাবন্ধ অন্ত পৰাৰ পিছত পুনৰ ইয়াৰ সময়সীমা বৃদ্ধি কৰিব বুলি প্ৰচাৰ চলে যদিও কেন্দ্ৰীয় চৰকাৰে ইয়াক উৰাবাতৰি আখ্যা দি নাকচ কৰে। আজি বিভিন্ন ৰাজ্যৰ মুখ্যমন্ত্ৰীসকলৰ স’তে ভিডিঅ’ কনফাৰেন্সযোগে কৰ’না ভাইৰাছক লৈ অনুষ্ঠিত বৈঠকত একে প্ৰশ্নই উত্থাপন কৰিলে প্ৰধানমন্ত্ৰী নৰেন্দ্ৰ মোদীয়ে। তলাবন্ধৰ পাছৰ পৰিস্থিতি মোকাবিলাৰ বাবে কেন্দ্র আৰু ৰাজ্যক একমুখী পৰিকল্পনা সাজু ৰাখিবলৈ প্ৰধানমন্ত্ৰীয়ে কয়।
তলাবন্ধ অন্ত পৰাৰ পিছত কেন্দ্ৰ আৰু ৰাজ্যই জনসাধাৰণৰ জনজীৱন সুচল নিশ্চিত কৰাৰ বাবে এক উমৈহতীয়া পৰিকল্পনা হাতত ল’ব লাগিব বুলি আজি ভিডিঅ’ কনফাৰেন্সত মুখ্যমন্ত্ৰী সকলক পৰামৰ্শ দিয়ে প্ৰধানমন্ত্ৰীয়ে। কৰ’না ভাইৰাছে মানৱ জীৱনৰ প্ৰতি ভাবুকিৰ সৃষ্টি কৰা বুলি মন্তব্য কৰি তেওঁ কয়,’তলাবন্ধ খোলাৰ পাছতে পুনৰ জনতাৰ চলাচল নিশ্চিত কৰিবলৈ উমৈহতীয়া পৰিকল্পনা কৰিব লাগিব। তলাবন্ধৰ পাছত কৰ’না ভাইৰাছৰ সংক্ৰমন যাতে বিয়পি নপৰে তাৰ বাবে যৌথ পৰিকল্পনা জৰুৰী।’ ৰাজ্যসমূহক এনে পৰিকল্পনাৰ বাবে পৰামৰ্শ প্ৰেৰণ কৰিবলৈ নিৰ্দেশ দিয়াৰ লগতে কয় যে তলাবন্ধৰ অন্ত পৰাৰ পাছত সকলো পূৰ্বৰ দৰে গতানুগতিক হৈ পৰিব এনে হ’বলৈ দিব নোৱাৰি। ইয়াৰ পিছতো কোনো নিয়ন্ত্ৰণ বা সতৰ্কতাৰ প্রয়োজন নহ’ব। ৰাজ্য সমূহে তলাবন্ধক গুৰুত্ব সহকাৰে ল’ব। পুনৰ যাতে সংক্ৰমণ বিয়পি নপৰে তাৰ বাবে যুদ্ধকালীন তৎপৰতাৰে ৰাজ্যসমূহক কাম কৰিবলৈ নিৰ্দেশ দিয়ে ।
ভিডিঅ’ কনফাৰেন্সযোগে বৈঠকত অংশ লয় ৯জন মুখ্যমন্ত্ৰীয়ে। প্ৰধানমন্ত্ৰীৰ উপৰি বৈঠকত উপস্থিত থাকে কেন্দ্ৰীয় গৃহমন্ত্ৰী অমিত শ্বাহ, প্ৰতিৰক্ষা মন্ত্ৰী ৰাজনাথ সিঙকে ধৰি শীৰ্ষবিষয়াসকল । প্ৰধানমন্ত্ৰীয়ে ৰাজ্যসমূহক যুদ্ধকালীন তৎপৰতাৰে কাম কৰিবলৈ , ভাইৰাছৰ কেন্দ্ৰসমূহ চিনাক্ত কৰিবলৈ আৰু সেই স্থানসমূহ আৱদ্ধ কৰিবলৈ কয়। স্বাস্থ্য পৰীক্ষা, আক্ৰান্ত সন্ধান কৰা , আছুতীয়াকৈ ৰখা আৰু কোৱাৰেণ্টাইন কৰাত মনোনিৱেশ কৰিবলৈ কয়। মৃতকৰ সংখ্যা যিমান পাৰি কম কৰাটোৱে লক্ষ্য বুলিও প্ৰধানমন্ত্ৰীয়ে উল্লেখ কৰে । ইপিনে, বিশ্বজোৰা পৰিস্থিতি সন্তোষজনক নহয় বুলি উল্লেখ কৰি প্ৰধানমন্ত্ৰীয়ে কয় যে কিছুমান দেশত দ্বিতীয় বাৰ সংক্ৰমণ হোৱা বুলিও কোৱা হৈছে। কৰ’না ভাইৰাছৰ সংক্ৰমণ দেশত বিয়পি পৰাৰ পাছত দ্বিতীয়বাৰৰ বাবে মুখ্যমন্ত্ৰী সকলৰ স’তে প্ৰধানমন্ত্ৰী বৈঠকত মিলিত হয়।
