Free Coaching Scheme:
দৈনিক অগ্ৰদূত ডিজিটেল ডেস্ক:বিভিন্ন প্রতিযোগিতামূলক পৰীক্ষাত অৱতীৰ্ণ হ’ব খোজা দৰিদ্ৰ তথা আর্থিকভাবে পিছপৰা পৰিয়াল সমূহৰ ছাত্ৰ-ছাত্ৰীৰ সুবিধার্থে মুকলি কৰা বিনামুলীয়া ক’চিং আঁচনি ৰূপায়ণত ব্যর্থ হ’ল নৰেন্দ্ৰ মোদী চৰকাৰ। চৰকাৰী এই ব্যৰ্থতাৰ ফলত বিগত তিনি বছৰত সমগ্ৰ দেশত নিৰ্ধাৰিত হাৰতকৈ তেনেই কম তথা মাথোঁ ২,৭৯০ ছাত্র-ছাত্রীয়েহে এই ক’চিং গ্ৰহণ কৰিবলৈ সক্ষম হয়।
অথচ এই বিনামূলীয়া ক’চিং ১০,৫০০ ছাত্র-ছাত্রীক প্ৰদানৰ লক্ষ্য লৈছিল মোদী চৰকাৰে। ইয়াৰ বিপৰীতে আঁচনিখন ৰূপায়ণত চৰকাৰে ব্যৰ্থতা প্ৰদৰ্শন কৰাত নিৰ্ধাৰিত লক্ষ্যতকৈ তেনেই নগণ্য তথা মাথোঁ ২,৭৯০ ছাত্র-ছাত্রীয়েহে এই আঁচনিৰ অধীনত ক’চিং গ্ৰহণ কৰিবলৈ সক্ষম হয়।
শতাংশ হিচাপত ইয়াৰ পৰিমাণ হৈছে ২৬ শতাংশ। মোদী চৰকাৰৰ এই ব্যৰ্থতাৰ তথ্য শেহতীয়াভাৱে পোহৰলৈ আনিছে এখন সংসদীয় স্থায়ী সমিতিয়ে। উল্লেখ্য যে এই বিনামূলীয়া ক’চিং আঁচনিৰ অধীনত বছৰি আৰ্থিকভাৱে পিছপৰা আৰু দৰিদ্ৰ পৰিয়ালৰ ৩৫শ ছাত্ৰ-ছাত্ৰীক সামৰি লোৱাৰ লক্ষ্য নির্ধাৰণ কৰিছিল কেন্দ্রীয় সামাজিক ন্যায় মন্ত্রণালয়ে। এই লক্ষ্যত কেন্দ্র উপনীত হ’বলৈ সক্ষম নহ’ল বুলি সামাজিক ন্যায় আৰু সবলীক্ৰণৰ স্থায়ী সমিতিয়ে শেহতীয়া এক প্রতিবেদনত উল্লেখ কৰিছে।
যোৱা ১০ আগষ্টত স্থায়ী সমিতিখনে উক্ত প্রতিবেদন সংসদত দাখিল কৰে। লক্ষ্যণীয়ভাৱে নীট-ইউজিৰ প্ৰশ্নকাকত ফাদিলক লৈ নৱপ্ৰজন্মৰ প্রতিবাদে দেশ উত্তাল কৰাৰ সময়তে চলিত বর্ষব স্বাধীনতা দিৱসৰ ভাষাত প্রধানমন্ত্রী মোদীয়ে প্রতিযোগিতামূলক পৰীক্ষাত অৱতীৰ্ণ হ’ব বিচৰা সকলো ছাত্র-ছাত্রীক বিনামূলীয়া অনলাইন ক’চিং প্ৰদানৰ ব্যৱস্থা মুকলি কৰা হ’ব বুলি উল্লেখ কৰিছিল। অৱশ্যে মোদীয়ে ঘোষণা কৰা এই বিনামূলীয়া অনলাইন ক’চিং কেনেদৰে প্ৰৱৰ্তন কৰা হ’ব সেই সম্পর্কীয় ৰূপৰেখা চৰকাৰে বৰ্তমানলৈ ৰাজহুৱা কৰা নাই।
সামাজিক ন্যায় আৰু সবলীকৰণৰ সংসদীয় স্থায়ী সমিতিয়ে যোৱা ১০ আগষ্টত দাখিল কৰা উক্ত প্ৰতিবেদনত উল্লেখ কৰিছে যে ২০২৩-২৪৩ চৰকাৰী বিনামূলীয়া ক’চিং কেৱল ২২৩ ছাত্র-ছাত্রীয়েহে গ্ৰহণ কৰে। ইয়াৰ পাছৰ বছৰ অর্থাৎ ২০২৪-২৫ত এই বিনামূলীয়া ক’চিঙৰ সুবিধা ২,১৩৬ ছাত্র-ছাত্রীক প্ৰদান কৰা হয় যদিও ২০২৫-২৬ত এই বিনামূলীয়া ক’চিঙৰ সুবিধা ৪৩১ ছাত্র-ছাত্ৰীয়েহে গ্রহণ কৰিবলৈ সক্ষম হয়। ইয়াৰ বিপৰীতে এই বিনামূলীয়া ক’চিঙৰ বাবদ ২০২৩-২৪৩ ২৪ কোটি টকা ধাৰ্য কৰা হয় যদিও বাস্তৱত কেৱল ৭.৭৬ কোটি টকাহে ব্যয় হয়।
পৰৱৰ্তী বছৰত বাজেটত ধাৰ্য ধনৰ পৰিমাণ ৩৫ কোটি টকালৈ হ্রাস কৰা হয় আৰু ইয়াৰে মাথোঁ ১৭.৬৮ কোটি টকাহে ব্যয় হয়। গতিকে ২০২৫-২৬ত এই বিনামূলীয়া ক’চিঙৰ বাবে ধাৰ্য কৰা ধনৰ পৰিমাণ ২০ কোটি টকালৈ চৰকাৰে হ্ৰাস কৰে। পাছত কার্যক্ষেত্রত দেখা গ’ল যে ধাৰ্য ধনৰ মাথোঁ ৭.১১ কোটি টকাহে ব্যয় হয়।
অৱশ্যে সংসদত কেন্দ্রীয় সামাজিক ন্যায় মন্ত্রণালয়ে প্রকাশ কৰা অনুসৰি এই বিনামূলীয়া ক’চিঙৰ বাবদ ২০২৫-২৬ত ৯.৮৬ কোটি টকা ব্যয় হয়। উল্লেখ্য যে কেন্দ্ৰীয় লোকসেৱা আয়োগ (ইউপিএছচি), ষ্টাফ ছিলেকচন কমিছন, ৰেলৱে, ৰাজ্যিক লোকসেৱা আয়োগ, বিভিন্ন বেংক, আইআইটি-জেইই, নীট, কেট, চিএলএটি আদি প্রতিযোগিতামূলক পৰীক্ষাত অৱতীৰ্ণ হ’ব খোজা আর্থিকভাৱে পিছপৰা তথা দৰিদ্ৰ পৰিয়ালৰ ছাত্ৰ-ছাত্ৰীৰ বাবে মোদী চৰকাৰে এই বিনামূলীয়া ক’চিং আঁচনি মুকলি কৰে। অভিযোগ অনুসৰি উপযুক্ত আন্তৰিকতাৰ অভাৱত আঁচনিখনৰ সফল ৰূপায়ণ হোৱা নাই। তৎসত্ত্বেও কেন্দ্রীয় সামাজিক ন্যায় মন্ত্রণালয়ে ২০২৬-২৭ত সাত হেজাৰ ছাত্ৰ-ছাত্ৰীক এই বিনামূলীয়া ক’চিং প্ৰদানৰ লক্ষ্য লৈছে।
অৱশ্যে এই বিনামুলীয়া ক’চিঙৰ আওতাত কিয় সাত হেজাৰ ছাত্ৰ-ছাত্ৰীক সামৰি ল’বলৈ সামাজিক ন্যায় মন্ত্রণালয়ে বিচাৰিছে সেয়া বোধগম্য নহ’ল বুলি সংসদীয় স্থায়ী সমিতিখনে প্রতিবেদনত উল্লেখ কৰিছে। সমিতিখনে লগতে আঙুলিয়াই দিছে যে এই আঁচনিৰ সুবিধা গ্ৰহণৰ পৰা প্ৰাৰ্থী বা ছাত্র-ছাত্রী বঞ্চিত হোৱাৰ অন্যতম প্ৰধান কাৰণ হ’ল আঁচনিখনৰ সুবিধা কেৱল বার্ষিক সর্বাধিক আঠ লাখ টকা আয়ৰ পৰিয়ালসমূহৰ ছাত্ৰ-ছাত্ৰীয়েহে গ্রহণ কৰিব পাৰিব বুলি নিয়ম চৰকাৰে বান্ধি দিছে।
গতিকে সংসদীয় স্থায়ী সমিতিখনে পৰিয়ালৰ বাৰ্ষিক আয়ৰ ক্ষেত্ৰত থকা এই সীমাৰ কথা পুনৰ বিবেচনা কৰিবলৈ চৰকাৰক পৰামৰ্শ দিছে। অৱশ্যে এই ক্ষেত্রত সামাজিক ন্যায় মন্ত্রণালয়ৰ পৰা কোনো ইতিবাচক সঁহাৰি পোৱা নগ’ল বুলিও সমিতিখনে উল্লেখ কৰিছে।
