দেশত পুনৰ সন্ধান লাভ কৰা হৈছে প্ৰাচীন স্থাপত্যৰ । এটি বালি খাদানত খনন কৰি থকাৰ সময়তে মন্দিৰৰ চুড়া সদৃশ ধ্বংসাৱশেষৰ দৰে লগা কিছু স্থাপত্য দেখিবলৈ পায় । অন্ধ্ৰ প্ৰদেশৰ নেল্লোৰ জিলাৰ পেৰুমালাপাডু গাঁৱৰ কাষেৰে বৈ যোৱা পেন্না নদীৰ পাৰত আছে এই বালিৰ মহল । অনুমান কৰা অনুসৰি এই স্থাপত্য দুশ বছৰৰ অধিক পুৰণি । মন্দিৰৰ ধ্বংসাৱশেষ উদ্ধাৰ হোৱা স্থানত পূৰ্বতে এটি শিৱ মন্দিৰ আছিল বুলি মুখে মুখে চলি অহা কাহিনীও আছে । স্থানীয় বাসিন্দা সকলৰ বিশ্বাস বিষ্ণুৰ অন্যতম অৱতাৰ পৰশুৰামে এই শিৱ মন্দিৰটো স্থাপন কৰিছিল; কিন্ত পেন্না নদীৰ গতিপথ পৰিৱৰ্তন হোৱাৰ ফলত লাহে লাহে মন্দিৰটো বালিৰ তললৈ সোমাই পৰে । অৱশেষত বালি খননৰ সময়তে পুনৰ মন্দিৰটোৰ সন্ধান লাভ কৰা হয় ।
পুৰাতত্ব বিভাগৰ সহকাৰী সঞ্চালক ৰামসুব্বা ৰেড্ডীৰ মতে সন্ধান লাভ কৰা স্থাপত্যৰ সন্দৰ্ভত এতিয়াই নিশ্চিতভাৱে কিছু কোৱাটো সম্ভৱ হৈ উঠা নাই । সমগ্ৰ বিষয়টো বিস্তাৰিতভাৱে প্ৰথমে পৰীক্ষা কৰিব লাগিব । তাৰ পাছতহে এই সন্দৰ্ভত স্পষ্টভাৱে কিবা এটা ক’ব পৰা হ’ব । বালিৰ মহলটোত সদ্যহতে সম্পূৰ্ণভাৱে খনন চলোৱা হ’ব । স্থাপত্যটোৰ বাকী অংশ পুনৰ উদ্ধাৰ কৰাই হ’ব সম্প্ৰতি বিভাগৰ প্ৰথম লক্ষ্য । কিছুদিন পূৰ্বে ওড়িছাৰ মহানদীৰ বুকুতো উদ্ধাৰ কৰা হৈছিল আন এক প্ৰাচীন মন্দিৰৰ ধ্বংসাৱশেষ । ইয়াৰ পাছতে চুবুৰীয়া ৰাজ্য অন্ধ্ৰত মন্দিৰৰ ধ্বংসাৱশেষ উদ্ধাৰ হোৱাত স্বাভাৱিকতে পুৰাতত্ববিদসকল উৎসাহিত হৈ পৰিছে ।