Amravati is new capital of Andhra Pradesh:
দৈনিক অগ্ৰদূত ডিজিটেল ডেক্স:–দক্ষিণ সৰ্ববৃহৎ ৰাজ্য অন্ধ্রপ্রদেশে অৱশেষত লাভ কৰিলে স্থায়ী ৰাজধানী ৷ ৰাজ্য খনৰ স্থায়ী ৰাজধানী অমৰাৱতী হিচাপে ঘোষণা কৰা হৈছে। মুখ্যমন্ত্ৰী এন চন্দ্ৰবাবু নাইডু আৰু উপ-মুখ্যমন্ত্ৰী পৱন কল্যানে এই ঘোষণাৰ তথ্য তেওঁলোকৰ অফিচিয়েল ছ’চিয়েল মিডিয়া হেণ্ডেলত শ্বেয়াৰ কৰে। মুখ্যমন্ত্ৰী নাইডুৱে এই সিদ্ধান্তৰ অধিসূচনা এক্সত শ্বেয়াৰ কৰি লিখিছে যে অন্ধ্ৰ প্ৰদেশৰ ৰাজধানী হ’ব অমৰাৱতী।
উল্লেখযোগ্য যে শেহতীয়াকৈ সংসদৰ বাজেট অধিৱেশনৰ সময়ত অন্ধ্ৰপ্ৰদেশ পুনৰ্গঠন (সংশোধনী) বিধেয়ক ২০২৬ দুয়োটা সদনত সংখ্যাগৰিষ্ঠতাৰে গৃহীত হয়।
ক্ষেত্ৰফলৰ ফালৰ পৰা ভাৰতৰ ৭ম বৃহত্তম ৰাজ্য অন্ধ্ৰ প্ৰদেশে প্ৰায় ১২ বছৰ অপেক্ষাৰ অন্তত ৰাজধানী লাভ কৰিছে। ২০১৪ চনৰ ২ জুনত তেলেংগানা পৃথক ৰাজ্য হোৱাৰ পাছত হায়দৰাবাদ অন্ধ্ৰপ্ৰদেশ আৰু তেলেংগানা দুয়োখন ৰাজ্যৰ যৌথ ৰাজধানী আছিল। অন্ধ্ৰ প্ৰদেশ পুনৰ্গঠন সংশোধনী আইন, ২০২৬ অনুমোদনৰ পিছত ২০২৬ চনৰ ২ জুনৰ পৰা অমৰাৱতী অন্ধ্ৰ প্ৰদেশৰ স্থায়ী ৰাজধানী হ’ব।
স্বাধীন ভাৰতত প্ৰথমবাৰৰ বাবে সংসদত এখন নিৰ্দিষ্ট বিধেয়ক উত্থাপন কৰি এখন বিশেষ চহৰক এখন ৰাজ্যৰ স্থায়ী ৰাজধানী হিচাপে ঘোষণা কৰা হৈছে। এই বিধেয়কখনে অন্ধ্ৰপ্ৰদেশ পুনৰ্গঠন আইন, ২০১৪ৰ ৫ নং ধাৰা সংশোধন কৰিছে৷ যিয়ে প্ৰথমে হায়দৰাবাদক ১০ বছৰতকৈ অধিক সময়ৰ বাবে যৌথ ৰাজধানী হিচাপে নিৰ্ধাৰণ কৰিছিল।
সোমবাৰে ভাৰত চৰকাৰে গেজেট অধিসূচনা জাৰি কৰে। মঙলবাৰে অন্ধ্ৰ প্ৰদেশৰ মুখ্যমন্ত্ৰী চন্দ্ৰবাবু নাইডুৱে ঘোষণা কৰে যে, “অমৰাৱতী অন্ধ্ৰ প্ৰদেশৰ ৰাজধানী।” এই বৃহৎ পৰিৱৰ্তনৰ পিছত যুৱক-যুৱতীসকলৰ বাবে সাধাৰণ জ্ঞান (GK) উদ্দেশ্যে ভাৰতীয় ৰাজ্য আৰু ইয়াৰ ৰাজধানীসমূহৰ নতুন তালিকা আগবঢ়োৱা হ’ল।
মন কৰিবলগীয়া যে অমৰাৱতীক অন্ধ্ৰপ্ৰদেশৰ ৰাজধানী হিচাপে গঢ়ি তোলাৰ প্ৰচেষ্টা ১২ বছৰ ধৰি চলি আছিল। ২০১৫ চনত তেলেগু দেশম পাৰ্টিৰ শাসন কালত এই দাবী উত্থাপন হৈছিল। ২০১৯ চনত ৱাই এছ আৰ চি পি ক্ষমতালৈ অহাৰ পিছত অমৰাৱতীত সকলো প্ৰকল্প স্থগিত ৰখা হৈছিল।২০২৪ চনত টি ডি পি নেতৃত্বাধীন এন ডি এ পুনৰ ক্ষমতালৈ অহাৰ পিছত অমৰাৱতীক একমাত্ৰ আৰু স্থায়ী ৰাজধানী হিচাপে গঢ়ি তোলাৰ সিদ্ধান্ত লোৱা হৈছিল আৰু যোৱা বছৰ প্ৰকল্প পুনৰ আৰম্ভ কৰা হৈছিল। সংসদত মুঠ ৩৫জন সাংসদৰ বিতৰ্কৰ অন্তত ২ এপ্ৰিলত এই বিধেয়কখনে চূড়ান্ত অনুমোদন লাভ কৰে। শেহতীয়াকৈ ৰাজ্যসভা আৰু লোকসভাত অনুমোদন লাভ কৰা হৈছিল। ৰাষ্ট্ৰপতি দ্ৰৌপদী মুৰ্মুৰ অনুমোদনৰ পিছত অমৰাৱতীঅন্ধ্ৰপ্ৰদেশৰ ৰাজধানী হৈ পৰে।