বেছি দিন উপলব্ধ নহ’ব চকলেট । মধ্যবিত্তসকলৰ বাবে আৰু মাত্ৰ ১০ বছৰ । কিছু বছৰ পাছত সোণতকৈও অধিক দামী চকলেটৰ স্বাদ ল’ব পাৰিব মুষ্টিমেয় লোকসকলেহে । ৪০ বছৰৰ পাছত চকলেট সম্পূৰ্ণভাৱে নিঃশেষ হৈ যোৱাৰ সম্ভাৱনা আছে বুলি মত প্ৰকাশ কৰে পৰিৱেশবিদসকলে ।
বৈজ্ঞানিকসকলৰ অনুসৰি, জলবায়ু পৰিৱৰ্তনেই ইয়াৰ অন্যতম কাৰণ । প্ৰত্যেক বছৰেই তাপমাত্ৰা বৃদ্ধি পাইছে । এনেদৰে তাপমাত্ৰা বৃদ্ধি হৈ থাকিলে আগন্তুক ১০ বছৰত চকলেট উৎপাদন প্ৰায় ৭০-৮০ শতাংশ হ্ৰাস পোৱাৰ সম্ভাৱনা আছে । ইতিমধ্যে কৃত্ৰিমভাৱে চকলেট তৈয়াৰ কৰাৰ গৱেষণা চলি আছে । কিন্তু কৃত্ৰিম চকলেটৰ স্বাদ প্ৰকৃত চকলেটৰ সদৃশ হ’ব নে নাই তাক লৈ সংশয়ৰ সৃষ্টি হৈছে ।
জলবায়ু পৰিৱৰ্তনে চকলেট উৎপাদনত যথেষ্ট প্ৰভাৱ পেলাইছে । আফ্ৰিকাৰ পশ্চিম উপকূলৰ দুখন দেশ আইভ’ৰি ক’ষ্ট আৰু ঘানাত পৃথিৱীৰ ভিতৰতে সৰ্বাধিক চকলেট উৎপাদন হয় । দুই দেশৰ সমুদ্ৰৰ নিকটৱৰ্তী অঞ্চলসমূহত ক’ক’ৱা গছৰ খেতি কৰা হয় । এই ক’ক’ৱা গছ ইমানেই স্পৰ্শকাতৰ যে তাপমাত্ৰা সামান্য পৰিৱৰ্তন হ’লেই ফল উৎপাদন বন্ধ হৈ যায় । পৰিৱেশবিদসকলে আশংকা প্ৰকাশ কৰিছে যে অনাগত ৯-১০ বছৰৰ ভিতৰত সেই অঞ্চলৰ গড় তাপমাত্ৰা দুই ডিগ্ৰী চেণ্টিগ্ৰেড বৃদ্ধি পাব । ফলত ক’ক’ৱা গছৰ ফল উৎপাদন সম্পূৰ্ণৰূপে বন্ধ হৈ যাব ।
তাপমাত্ৰা বৃদ্ধি হোৱাৰ ফলত উত্তাপৰ লগতে সমুদ্ৰপৃষ্ঠ বৃদ্ধি পোৱাৰ সম্ভাৱনা আছে । ফলত আইভ’ৰি ক’ষ্ট আৰু ঘানাৰ অঞ্চলসমূহ সমুদ্ৰত জাহ যাব পাৰে । ক’ক’ৱা গছত এক বিশেষ ধৰণৰ ভেঁকুৰ সংক্ৰমণো হয় । জলবায়ু পৰিৱৰ্তনৰ ফলত ভেঁকুৰৰ সংক্ৰমণো বৃদ্ধি পাব বুলি বহুতে মত প্ৰকাশ কৰে । এই সমস্যাসমূহৰ ফলত চকলেটৰ অস্তিত্ব সংকটত আছে ।
সম্প্ৰতি চকলেট সংৰক্ষণ কৰাৰ চেষ্টাও অব্যাহত আছে । ‘মাৰ্চ’ নামে চকলেট বাৰ কোম্পানীয়ে কেলিফ’ৰ্ণিয়া বিশ্ববিদ্যালয়ৰ স’তে যৌথভাৱে ক’ক’ৱা গছক সংৰক্ষণ কৰিবৰ বাবে চেষ্টা চলাইছে । কৃত্ৰিম পৰিৱেশত ক’ক’ৱা গছ খেতি কৰাৰ চেষ্টা কৰা হৈছে ।
