ফেব্ৰুৱাৰীৰ শেষ ভাগৰ পৰাই গুৱাহাটীসহ অসমৰ অধিকাংশ অঞ্চলতে দিনৰ ভাগত গৰম পৰিবলৈ আৰম্ভ কৰিছে । দেশৰ বিভিন্ন স্থানতে ইতিমধ্যে গৰমৰ আভাস পোৱা গৈছে । ইয়াৰ মাজতে শংকাৰ বতৰা জনালে দিল্লীৰ মৌচম ভৱনে । অসমসহ দেশৰ অধিকাংশ অঞ্চলতে আগন্তুক গ্ৰীষ্মত তাপমাত্ৰা স্বাভাৱিকতকৈ কিছু বেছি থকাৰ সম্ভাৱনা আছে ।
বিগত কিছু বছৰ ধৰিয়ে গোলকীয় উষ্ণতাৰ ফলত গৰমৰ প্ৰকোপ পূৰ্বৰ তুলনাত বহুখিনি বাঢ়িছে । এইবাৰ যদি তাতোকৈ বেছি গৰম পৰে, মানুহৰ দুৰ্গতিৰ সীমা নোহোৱাটো নিশ্চিত বুলিয়ে আশংকা কৰা হৈছে । বতৰ বিজ্ঞান বিভাগৰ তৰফৰ পৰা কোৱা হৈছে যে গ্ৰীষ্মৰ এই গৰমৰ প্ৰকোপৰ পৰা মুক্ত হৈ থাকিব পাৰে কেৱল মধ্য আৰু দক্ষিণ ভাৰতহে ।
উত্তৰ, উত্তৰ-পূব, পূব আৰু পশ্চিম ভাৰতত এইবাৰ পূৰ্বৰ তুলনাত অতি বেছি গৰম পৰিব পাৰে । দিল্লীৰ মৌচম ভৱনৰ পূৰ্বাভাসত কোৱা হৈছে যে মাৰ্চৰ পৰা মে’ পৰ্যন্ত দিনৰ সৰ্বোচ্চ তাপমাত্ৰা স্বাভাৱিকতেই যথেষ্ট বেছি থাকিব পাৰে । দেশৰ অধিকাংশ অংশতে তাপমাত্ৰা বৃদ্ধি পোৱা দেখা যাব ।
চত্তিছগড়, গুজৰাট, মহাৰাষ্ট্ৰ, গোৱা, অন্ধ্ৰপ্ৰদেশৰ বিভিন্ন অঞ্চলত তাপমাত্ৰা যথেষ্ট বাঢ়িব বুলি কোৱা হৈছে । সেইদৰে পঞ্জাৱ, হাৰিয়ানা, চণ্ডীগড়, দিল্লী, পূব আৰু পশ্চিম উত্তৰপ্ৰদেশ, চত্তিছগড়, ঝাৰখণ্ড, ওড়িছাত স্বাভাৱিকতাৰ পৰা ০.৫ ডিগ্ৰী পৰ্যন্ত বেছি তাপমাত্ৰা থাকিব পাৰে বুলি জনাইছে মৌচম বিভাগৰ বিষয়াই ।
বিগত জানুৱাৰীৰ তাপমাত্ৰা বিশ্লেষণ কৰি মৌচম ভৱনে জনাইছে যে শেষ ছটা দশকৰ হিচাপত দেশে এইবাৰ উষ্ণতম শীত দেখা পালে । মধ্য ভাৰতত শীতত গড় সৰ্বনিম্ন তাপমাত্ৰা আছিল ১.৮২ ডিগ্ৰী চেলচিয়াছ, যি বিগত ৩৮ বছৰৰ ভিতৰত অভিলেখ । ১৯০১-২০২১ৰ ভিতৰত উষ্ণতম বছৰ আছিল ১৯৫৮ । সেই বছৰ মধ্য ভাৰতত সৰ্বনিম্ন তাপমাত্ৰা আছিল ১৫ ডিগ্ৰীৰ ওপৰত ।
