ASSAM GOVT. THREE DAY CHINTAN SHIVIR AT KAZIRANGA : আজিৰে পৰা কাজিৰঙাত তিনিদিনীয়াকৈ আৰম্ভ হৈছে ৰাজ্য চৰকাৰৰ চিন্তন শিৱিৰ ৷ চিন্তন শিবিৰৰ উদ্বোধনী অনুষ্ঠানত সদগুৰু হিচাপে জনাজাত যোগ আৰু আধ্যাত্মিক গুৰু জাগ্গী বাসুদেৱৰ সৈতে মুখ্যমন্ত্ৰী ড০ হিমন্ত বিশ্ব শৰ্মাই অংশগ্ৰহণ কৰে।
শনিবাৰে আবেলি কাজিৰঙাত উপস্থিত হোৱা সদগুৰু জনক আদৰণি জনায় মুখ্যমন্ত্ৰী গৰাকীয়ে৷ তাৰ পিছতে আৰম্ভ হোৱা বৈঠকত অংশ লৈ আধ্যাত্মিক গুৰু গৰাকীয়ে বিভিন্ন তত্বগধুৰ বক্তব্য প্ৰদান কৰে ৷ আনহাতে মুখ্যমন্ত্ৰী হিমন্ত বিশ্ব শৰ্মাই তেওঁৰ বক্তব্যত কয় যে,সদগুৰু গৰাকীৰ দিহা- পৰামৰ্শ আৰু প্ৰজ্ঞাই ২০২৬ চনৰ ভিতৰত অসমৰ সামগ্ৰিক উন্নয়নৰ ৰোড মেপ প্ৰস্তত কৰাত চিন্তন শিৱিৰক অপৰিসীম সহায় কৰিব ৷’ মুখ্যমন্ত্ৰী গৰাকীয়ে আৰু কয় যে প্ৰধানমন্ত্ৰী পৰামৰ্শ অনুসৰি এই শিৱিৰ অনুষ্ঠিত হয় বুলি প্ৰকাশ কৰে৷
শিৱিৰত ৰাজ্যৰ কেবিনেট মন্ত্ৰী ৰনজিৎ কুমাৰ দাস,অতুল বৰা ,কেশৱ মহন্ত,পৰিমল শুক্ল বৈদ্য,চন্দ্ৰমোহন পাটোৱাৰী,অজন্তা নেওগ,ইউ জি ব্ৰক্ষ্ম, সঞ্জয় কিষান,যোগেন মহন,বিমল বৰা, পীয়ূষ হাজৰিকা,জয়ন্ত মল্ল বৰুৱা,নন্দিতা গাৰ্লোচা, বিজেপি বিধায়ক তথা ৰাজ্য চৰকাৰৰ উচ্চ পদস্থ বিষয়া-বৰ্গ উপস্থিত থাকে ৷
মুখ্যমন্ত্ৰী শৰ্মাই বোকাখাটত দাহ কৰা গড়ৰ খড়্গৰ চাইৰে নিৰ্মাণ কৰি উলিওৱা গড়ৰ তিনিটা প্ৰতিকৃতি উদ্বোধন কৰে ৷
আনহাতে সন্ধিয়া ভাগত মুখ্যমন্ত্ৰী গৰাকীয়ে সদগুৰুৰ সৈতে কাজিৰঙা অভয়াৰণ্য জীপ চাফাৰী কৰে৷ উল্লেখ্য যে জীপ খনৰ চালকৰ আসনত বহে স্বয়ং আধ্যাত্মিক গুৰু গৰাকী৷কাষত মুখ্যমন্ত্ৰীক লৈ অভয়াৰণ্য খনৰ ভিতৰত প্ৰৱেশ কৰে ৷ কাজিৰঙাৰ নৌসৰ্গিক দৃশ্য দেখি আপ্লুত হৈ পৰে সদগুৰু৷
