United Nations :
লিভ ইন পার্টনাৰে নৃশংসভাৱে হত্যা (Delhi Murder) কৰা শ্রদ্ধা ৱালকাৰক লৈ দেশজুৰি চর্চা চলিছে । তেনে পৰিস্থিতিতে ৰাষ্ট্রসংঘৰ সচিব প্ৰধান এণ্ট’নিঅ’ গুটেৰেছে (Antonia Guterres) জনালে, প্রতি ১১ মিনিটত এগৰাকী মহিলাৰ হত্যা হয় । পৰিয়ালৰ সদস্য বা অতি ঘনিষ্ঠ লোকেই হত্যা কৰে তেওঁলোকক ।
তেওঁৰ মতে, নাৰীসকলৰ বিৰুদ্ধে হিংসাত্মক ঘটনা বৃদ্ধি পাইছে । মানৱ অধিকাৰ উলংঘনৰ প্রসংগত এইটোৱে সমগ্ৰ বিশ্বৰ সৰ্ববৃহৎ প্ৰত্যাহ্বান । প্রত্যেকখন দেশৰ চৰকাৰে এই জঘন্য অপৰাধৰ বিৰুদ্ধে কঠোৰ শাস্তি বিহাৰ ব্যৱস্থা কৰা উচিত । মহিলাসকলৰ বিৰুদ্ধে হিংসা হ্ৰাস কৰাৰ বিষয়ত এই মন্তব্য কৰিছে গুটেৰেছে ।
নাৰীৰ বিৰুদ্ধে হিংসা দূৰ কৰিবলৈ ২৫ নৱেম্বৰত আন্তর্জাতিক দিৱস পালন কৰা হয় । সেই অনুষ্ঠানৰ পূৰ্বে প্রকাশ্যত আহিল গুটেৰেছৰ এই মন্তব্য । তেওঁ কয়, “মহিলাসকলৰ বিৰুদ্ধে হিংসাত্মক ঘটনা ক্রমে বৃদ্ধি পাইছে । পার্টনাৰ বা পৰিয়ালৰ সদস্যৰ হাততেই হত্যা হৈছে অধিকাংশ মহিলাৰ ।
সমগ্ৰ বিশ্বত প্রতি ১১ মিনিটত এগৰাকী মহিলাৰ তেওঁৰ পৰিচিতৰ হাতত হত্যা হয় ।” যদিও তেওঁ স্পষ্টভাৱে শ্রদ্ধা ৱালকাৰৰ প্রসংগ টানি অনা নাই । অৱশ্যে সাম্প্রতিক পৰিস্থিতিৰ প্ৰতি লক্ষ্য ৰাখি এনে মন্তব্য দিছে গুটেৰেছে, মত বিশেষজ্ঞসকলৰ ।
অৱশ্যে গুটেৰেছৰ মতে, ক’ভিড পৰৱর্তী সময়ত মানুহৰ নানা কাৰণত দুশ্চিন্তা বৃদ্ধি পাইছে । সেয়ে ঘৰৰ পৰুষসকলৰ ক্ষোভৰ বলি হৈছে মহিলাসকল । কেৱল হত্যা নহয়, নানা ধৰণৰ আতিশয্যৰ বলি হৈছে তেওঁলোক ।
পৰিচিত লোকৰ উপৰিও সামাজিক মাধ্যমত নেটিজেনসকলক ব্যৱহাৰৰ মাধ্যমতো মহিলাসকলক অত্যাচাৰ কৰা হৈছে । তাৰ ফলত জীয়াই থকাৰ অধিকাৰ হেৰুৱাইছে মহিলাসকলে । এই সমস্যাৰ সমাধান কৰিবলৈ দেশৰ চৰকাৰ উদ্যোগী হ’ব লাগিব । মহিলাসকলৰ সুৰক্ষাৰ বাবে বাজেট বৃদ্ধি কৰিব লাগিব । লগতে তৃণমূল স্তৰৰ পৰা মানুহৰ মাজত নাৰীবিদ্বেষৰ বিৰুদ্ধে সচেতনতা গঢ়ি তুলিব লাগিব ।
লিভ ইন পার্টনাৰ শ্রদ্ধাক হত্যা কৰি সমগ্ৰ দেশত চর্চিত হৈছে আফতাব পুনাৱালাৰ নাম । পৰিকল্পিতভাৱে হত্যা কৰি, শৰীৰ ফ্রিজত লুকাই ৰাখি বহুদিন ধৰি স্বাভাৱিক জীৱনযাপন কৰি আছিল তেওঁ ।
শ্রদ্ধাৰ পিতৃৰ অভিযোগৰ ভিত্তিত তেওঁক গ্রেপ্তাৰ কৰা হয় । জেৰাৰ পাছত এটাৰ পাছত এটাকৈ বিস্ফোৰক তথ্য প্ৰকাশ পায় । প্রশ্ন হয়, আপোনজনেই কিয় মহিলাৰ বিপদৰ কাৰণ হৈ পৰিছে ? সেই প্রশ্নকে আৰু প্রাসংগিক কৰি দিলে ৰাষ্ট্রসংঘৰ (United Nations) সচিব প্ৰধানৰ মন্তব্যই ।