APSC:
দৈনিক অগ্ৰদূত ডিজিটেল ডেস্ক:অসম লোকসেৱা আয়োগ (এপিএছচি)ৰ জৰিয়তে বক্ৰ পথেৰে নিযুক্তি লাভ কৰা ৩৪ গৰাকী বিষয়াৰ বিৰুদ্ধে গোচৰৰ ধাৰা আৰোপৰ শুনানি আজিৰ পৰা ৰাজ্যৰ বিশেষ আদালতত আৰম্ভ হৈছে। আগন্তুক তিনিদিন ধৰি এই শুনানি অনুষ্ঠিত হোৱাৰ সম্ভাৱনা আছে।
উল্লেখ্য যে আয়োগৰ অধ্যক্ষ ৰাকেশ পালৰ আমোলত ২০১২-১৩ত সংঘটিত এই কেলেংকাৰিত লিপ্ত হৈ চাকৰি লাভ কৰা বুলি ন্যায়িক তদন্ত আয়োগৰ প্ৰতিবেদনত ৩৪ জন বিষয়াৰ নাম উল্লেখ আছে। সেই সকলক লৈয়েই আজিৰ পৰা এই শুনানি আৰম্ভ হৈছে। উল্লেখ্য যে ন্যায়িক আয়োগৰ প্রতিবেদন দাখিলৰ পাছত এই নিযুক্তি কেলেংকাৰিক লৈ ভাৰতীয় আৰক্ষী সেৱাৰ বিষয়া প্রতীক থুবেক লৈ আন এখন তদন্ত সমিতি গঠন কৰা হৈছিল। কিন্তু সেইখন সমিতিয়ে ন্যায়িক আয়োগৰ প্ৰতিবেদনক উপেক্ষা কৰি ২৮ জনক অভিযুক্ত কৰি অভিযোগনামা দাখিল কৰে।
ইয়াকে লৈ আদালতে গভীৰ অসন্তুষ্টি ব্যক্ত কৰে। আনকি থুবেক দায়িত্বৰ পৰা আঁতৰোৱাৰো নির্দেশ দিয়ে। সেই মতে চৰকাৰে থুবেক দায়িত্বৰ পৰা অব্যাহতি দিবলৈ বাধ্য হয়। আনহাতে, বাকী ৰোৱা অভিযুক্ত কেইজনৰ বিৰুদ্ধে বিশেষ আদালতে নিজাববীয়াকৈ অভিযোগ গ্রহণ কৰে। ইয়াৰে কে’বাজনো গ্রেপ্তাৰ হয়, কে ‘বাজনক চাকৰিৰ পৰা নিলম্বন কৰা হয়। কিন্তু তাৰ মাজতো একমাত্ৰ ৰাজনৈতিক প্রভাৱত অদ্যাপি কেইজনমানৰ বিৰুদ্ধে কোনো ব্যৱস্থা গ্রহণ কৰা হোৱা নাই।
অর্থাৎ একে অভিযোগত কেইজনমানক গ্ৰেপ্তাৰ কৰাৰ বিপৰীতে কেইজনমানক নিলম্বন কৰিয়েই দায়িত্ব সামৰিছে অসম চৰকাৰে। আনহাতে, নামমাত্ৰ কেইজনমানৰ বিৰুদ্ধে কোনো ব্যৱস্থাই ল’বলৈ সাহস কৰিব নোৱাৰিলে চৰকাৰে। কিন্তু বিশেষ আদালতে সকলোৰে বিৰুদ্ধে বিচাৰ চলাব পৰাকৈ আজিৰ পৰা ধাৰা আৰোপৰ শুনানি আৰম্ভ কৰিছে।