Flood situation in the state remains unchanged today:
উজনি-নামনি সৰ্বত্ৰ প্ৰলয়ংকৰী বান ৷ নেৰানেপেৰা বৰষুণত বৃদ্ধি নৈ-উপনৈৰ জলপৃষ্ঠ ৷ ইতিমধ্যে বিপদসীমাৰ ওপৰেৰে বৈছে ব্ৰহ্মপুত্ৰৰ জলপৃষ্ঠ৷ ঠায়ে ঠায়ে বাঢ়নী পানীয়ে ছিগিছে ইটোৰ পাছত সিটোকৈ মথাউৰি ৷ আনহাতে কাজিৰঙা ৰাষ্ট্ৰীয় উদ্যানৰ ৮০ শতাংশ অঞ্চল এতিয়া পানীৰ তলত ৷ বানত দিগবিদিক হেৰুৱাইছে বন্য প্ৰাণীয়ে ৷ বানৰ বাবে বহু বন্যজন্ত ৩৭ নং ৰাষ্ট্ৰীয় ঘাইপথ পাৰ হৈ কাৰ্বি আংলং পাহাৰলৈ ঢাপলি মেলিছে ৷ বানত এটা গড় পোৱালি সহ চাৰিটা বন্যজন্তৰ মৃত্যু হোৱা বিপৰীতে উদ্ধাৰ হৈছে ২৪ টা বন্যপ্ৰাণী ৷
ৰাজ্যত আজিৰ দিনটোতো অপৰিৱৰ্তিত হৈ আছে বান পৰিস্থিতি। নেৰানেপেৰা বৰষুণৰ ফলত ব্ৰহ্মপুত্ৰকে ধৰি ইয়াৰ উপনৈসমূহ ফেনে ফোটোকাৰে বাঢ়ি অহাৰ ফলত ৰাজ্যৰ কে’বাটাও প্রান্তত আজিও বহুকেইটা মথাউৰি ছিঙি নিয়াত ন ন অঞ্চল বানৰ কবলত পৰিছে। দুর্যোগ প্রশমন বিভাগে সদৰী কৰা অনুসৰি আজিৰ দিনটোত পুনৰ তিনিজন লোকে বানত প্রাণ হেৰুৱায়। ইয়াৰ লগে লগে চলিত বাৰিষাৰ বানত মুঠ মৃতকৰ সংখ্যা ৩৮জনলৈ বৃদ্ধি পালে।
লগতে বিভাগে সদৰী কৰা তথ্য অনুসৰি, ৰাজ্যৰ ২৮খন জিলাব ৮৪টা ৰাজহ চক্ৰৰ অধীনৰ মুঠ ২,২০৮খন গাঁও আজিৰ দিনটোত বানৰ কবলত পৰিছে। ইয়াৰ ফলত আক্রান্ত হৈছে ১১ লাখ ৩৪ হেজাৰজন লোক,ক্ষতিগ্ৰস্ত ৪২,৪৭৬.১৮ হেক্টৰ কৃষিভূমি ৷
আনহাতে বানত আবদ্ধ হৈ পৰা লোকসকলক জিলা প্রশাসন, এছডিআৰএফ, এনডিআরএফ, সেনা বাহিনী আদিয়ে উদ্ধাৰ অভিযান অব্যাহত ৰখাৰ লগতে সমগ্ৰ ৰাজ্যত বানাক্ৰান্ত ৰাইজৰ বাবে ১৩০টা আশ্রয় শিবিৰ আৰু ৩৫৯টা সাহায্য বিতৰণ শিবিৰ স্থাপন কৰা হৈছে বুলি সংশ্লিষ্ট বিভাগে সদৰী কৰিছে। ইয়াৰ উপৰি আঠ লাখ ৩২ হেজাৰ পশুধন বানৰ কবলত পৰিছে বুলি বিভাগে তথ্য সদৰী কৰিছে । ৰাজ্যৰ প্ৰলয়ংকৰী বানত এই পৰ্যন্ত মৃত্যু হৈছে ৩৯ জনৰ৷
উল্লেখ্য যে , তিনিচুকীযাৰ ডুমডুমা আৰু শদিয়াত দুজনকৈ লোক বানৰ কবলত পৰি মৃত্যু হোৱাৰ লগতে ধেমাজিৰ জোনাহত এজনে মৃত্যুক আঁকোৱালি লয়। লগতে বিশ্বনাথৰ হালেমত এজন লোক নিৰুদ্দেশ হৈ থকা খবৰ আহিছে। আনহাতে, তেজপুৰত বাঢ়নী পানীত উটি যোৱা ৫৫ বছৰীয়া সিংহ বাহাদুৰ ছেত্রী নামৰ লোকজনৰ মৃতদেহ অভিযানকাৰী দলে উদ্ধাৰ কৰিবলৈ সক্ষম হয়।