Professor accused of cheating surrenders to police:
অসম চৰকাৰৰ বিভিন্ন বিভাগত চাকৰি দিয়াৰ নামত গোৱালপাৰা মহাবিদ্যালয়ৰ ইংৰাজী বিভাগৰ অধ্যাপক মজবুল হক চৌধুৰীয়ে বিভিন্নজনৰ পৰা ধন সংগ্ৰহ কৰাৰ অভিযোগ উত্থাপিত হৈছে। অধ্যাপকজনে চাকৰিৰ প্রলোভনেৰে ধন সংগ্ৰহ কৰাৰ ভিডিঅ’ সামাজিক মাধ্যমত হৈছিল ভাইৰেল ।
এনে ঘটনাক্ৰমৰ মাজতে অধ্যাপক মজবুল হক চৌধুৰীয়ে বুধবাৰে গোৱালপাৰাত আত্মসমৰ্পণ কৰে ৷ থানালৈ অহাৰ পথত সাংবাদিকক কয়,তেওঁ নিদোৰ্ষী ৷ তেওঁক পৰিকল্পিতভাৱেই দোষী সজোৱা হৈছে যথাসময়ত আইনে নিজৰ পথ ল’ব। আৰক্ষীক সহযোগীতা আগবঢ়োৱাৰ উদ্দেশ্যৰে স্বইচ্ছাৰে আত্মসমৰ্পণ কৰিব আহিছে ৷
ইতিমধ্যে অধ্যাপকজনক এই কৰ্মকাণ্ডক লৈ গোৱালপাৰা মহাবিদ্যালয়ৰ অধ্যাপক-অধ্যাপিকাৰ মাজত তীব্ৰ প্ৰতিক্ৰিয়াৰ সৃষ্টি হয় ৷ সকলোৱে একেমুখে গৰিহণা দিয়ে। অধ্যাপকজনৰ বিৰুদ্ধে উত্থাপিত এই অভিযোগ সন্দর্ভত গোৱালপাৰা মহাবিদ্যালয়ৰ অধ্যক্ষ ড° সুভাষ বর্মনে কয় যে অধ্যাপকজনৰ কৰ্মকাণ্ডত কলেজ কর্তৃপক্ষ লজ্জিত।
অধ্যাপকজনৰ প্রলোভনত ভোল গৈ তেওঁক দিয়া ধন বিচাৰি বিভিন্ন ঠাইৰ পৰা বিভিন্নজন মহাবিদ্যালয়লৈ আহি থাকে। এই সমগ্র বিষয় তদন্ত কৰি ব্যৱস্থা গ্ৰহণৰ বাবে ঊর্ধ্বতন কর্তৃপক্ষক অৱগত কৰা বুলি অধ্যক্ষ ড° বর্মনে সদৰী কৰে। একেদৰে মহাবিদ্যালয়খনৰ ইংৰাজী বিভাগৰ মুৰব্বী অধ্যাপিকা লনী বৰুৱায়ো কলেজ কর্তৃপক্ষ অধ্যাপক চৌধুৰীৰ কৰ্মকাণ্ডত লজ্জিত বুলি মন্তব্য কৰিছে।
উল্লেখ্য যে উদ্থাপিত অভিযোগ অনুসৰি, জ্যেষ্ঠ কংগ্ৰেছ নেতা তথা অধিবক্তা আমজাদ আলীৰ পুত্ৰ চৌধুৰীয়ে বিগত তিনি বছৰ ধৰি গোৱালপাৰাকে ধৰি বিভিন্ন প্ৰান্তৰ নিবনুৱা যুৱক-যুৱতীৰ পৰা চাকৰিৰ প্রলোভনেৰে ধন সংগ্ৰহ কৰি আহিছে।
আনহাতে, কেৰাণী চাকৰি দিয়াৰ প্রলোভনেৰে অধ্যাপক চৌধুৰীয়ে গোৱালপাৰা নগৰৰ কৌশিক ৰায় নামৰ এজন যুৱকৰ পৰা ছয় লাখ টকা সংগ্ৰহ কৰাৰ অভিযোগ উত্থাপিত হৈছে । এই ধন সংগ্ৰহৰ পাছত তিনি বছৰে যুৱকজনক চৌধুৰীয়ে চাকৰি দিব নোৱৰাত তেওঁ অধ্যাপকজনৰ পৰা ধন ঘূৰাই বিচাৰে। ইয়াৰ বিপৰীতে চৌধুৰীয়ে যুৱকজনক আৰক্ষীৰ ভয় দেখুৱাই খেদি পঠিওৱাৰ অভিযোগ উত্থাপিত হৈছে। শেহতীয়াভাৱে বিষয়টো সন্দৰ্ভত শীর্ষ আৰক্ষী বিষয়াৰ নিৰ্দেশত আৰক্ষীয়ে তদন্ত আৰম্ভ কৰা বুলি এক সূত্রই জানিবলৈ দিছে।
