ৰাজ্যত সম্পূৰ্ণৰূপে নিষিদ্ধ হ’ল ব’হাগ বিহুৰ সময়ত আহতগুৰিকে ধৰি নগাঁৱৰ বিভিন্ন স্থানত অনুষ্ঠিত ঐতিহাসিক ম’হ যুঁজ আৰু হাজোৰ বিখ্যাত বুলবুলি চৰাইৰ যুঁজ।
‘পিপুল ফৰ দ্য এথিকেল ট্রিটমেন্ট অৱ এনিমেলছ’ (পেটা) ইণ্ডিয়াই দাখিল কৰা এক গোচৰৰ শুনানিৰ অন্তত ন্যায়াধীশ দেৱাশীষ বৰুৱাৰ আদালতে এই নিষেধাজ্ঞা জাৰি কৰে।
উল্লেখ্য যে উচ্চতম ন্যায়ালয়ৰ এক নির্দেশ মর্মে দেশৰ বিভিন্ন প্রান্তত অনুষ্ঠিত এনে ধৰণৰ খেলবোৰ ইতিমধ্যে নিষিদ্ধ হৈছিল। বিগত ২০১৪ৰ সাত মে’ত উচ্চতম ন্যায়ালয়ে এই নিষেধাজ্ঞা আৰোপ কৰিছিল। তাৰ মাজতে ঐতিহাসিক তথা পৰম্পৰাগত বিষয় হিচাপে ম’হ যুঁজ আৰু বুলবুলি চৰাইৰ যুঁজ বাহাল ৰখাক লৈ ইয়াৰ লগত জড়িত কে’বাটাও পক্ষ পৰৱৰ্তী সময়ত ন্যায়ালয়ৰ দ্বাৰস্থ হৈছিল।
এই বিষয়টোত হস্তক্ষেপ কৰি অসম চৰকাৰে বিগত বৰ্ষৰ ২৭ ডিচেম্বৰত নিজাববীয়াকৈ এখন এছঅ’পি জাৰি কৰে। তাত উল্লেখ কৰা হয় যে কেৱল ব’হাগ বিহুৰ দিনকেইটাৰ ভিতৰতহে ম’হ যুঁজ আৰু বুলবুলি চৰাইৰ যুঁজ অনুষ্ঠিত কৰিব পাৰিব।
ৰাজ্য চৰকাৰৰ এই এছঅ’পিৰ ভিত্তিত যোৱা ব’হাগ বিহুৰ সময়ত ৰাজ্যত বিহুৰ সময়ত ম’হ যুঁজ আৰু বুলবুলি চৰাইৰ যুঁজ অনুষ্ঠিত হয়। ৰাজ্য চৰকাৰৰ এই এছঅপি সংবিধান উলংঘাকাৰী বুলি অভিহিত কৰি গুৱাহাটী উচ্চ ন্যায়ালয়ৰ দ্বাৰস্থ হয়
পেটা ইণ্ডিয়া। সংস্থাটোৰ আবেদনখনৰ ওপৰত হয় চূড়ান্ত শুনানি ।
সংস্থাটোৰ হৈ অধিবক্তাই তেওঁলোকৰ যুক্তি তথ্য সহকাৰে দাঙি ধৰে। এই সন্দৰ্ভত পেটা ইণ্ডিয়াৰ হৈ ন্যায়ালয়ত যুক্তি দর্শোৱা জ্যেষ্ঠ অধিবক্তা দিগন্ত দাসে উল্লেখ কৰে যে ম’হ আৰু বুলবুলি চৰাইৰ যুঁজে ‘প্রিভেনচন অব ক্রুৱেল্টি টু এনিমেলছ এক্ট, ১৯৬০’ উলংঘা কৰে। তদুপৰি বুলবুলি চৰাইৰ যুঁজে অতিৰিক্তভাৱে বন্যপ্রাণী সুৰক্ষা আইন ১৯৭২ উলংঘা কৰে।
ন্যায়ালয়ে পেটাৰ অধিবক্তাৰ এই যুক্তি গ্রহণযোগ্য বুলি কয়। আনহাতে, এই যুঁজত যি ক্রুৰতা প্রকাশ পায়, তাৰ তথ্যসহ বিৱৰণো পেটা ইণ্ডিয়াৰ পৰা শুনানিত দাখিল কৰা হয়। তথ্যৰ ভিতৰত যোৱা ১৬ জানুৱাৰীত মৰিগাঁও জিলাৰ আঁহতগুৰিত অনুষ্ঠিত ম’হ যুঁজৰ এটা ভিডিঅ’ ন্যায়ালয়ত দাখিল কৰা হয়। ভিডিঅ’টোত যুঁজত লিপ্ত হোৱা ম’ইবোৰ গুৰুতৰভাৱে আহত হোৱা, যুঁজত অৱতীৰ্ণ হ’বলৈ গৰাকীয়ে ম’হবোৰৰ ওপৰত নিৰ্যাতন চলোৱাৰ ছবি ভিডিঅ’বোৰত স্পষ্ট হয়।
একেদৰে যোৱা ১৫ জানুৱাৰীত হাজোত অনুষ্ঠিত বুলবুলি চৰাইৰ যুঁজৰ ভিডিঅ’ত চৰাইৰ গৰাকীয়ে যুঁজৰ বাবে বুলবুলি চৰাইবোৰৰ প্ৰতি আইন উলংঘাকাৰী আচৰণ প্রদর্শন কৰাটো স্পষ্ট হয়। এই সন্দৰ্ভত উল্লেখ কৰা হয় যে যুঁজৰ বাবে সাজু কৰিবলৈ বুলবুলিক ‘মাৰি জোৱানা’কে ধৰি উত্তেজিত কৰিব পৰা বিভিন্ন বিষাক্ত আৰু নিচাযুক্ত দ্রব্য সেৱন কৰোৱা হয়। তাৰ পাছত যিদৰে বুলবুলি চৰাইবোৰক যুঁজত নমোৱা হয়, তাত বুলবুলিৰ প্ৰতি নিষ্ঠুৰতা প্ৰদৰ্শনত বাকী নাথাকে।
এই সকলো তথ্য পৰীক্ষা কৰি উচ্চ ন্যায়ালয়ে অসম চৰকাৰে জাৰি কৰা এছঅ’পি খাৰিজ কৰি ম’হ যুঁজ আৰু বুলবুলি চৰাইৰ যুঁজ নিষিদ্ধ কৰে।
