Programme of the disabled association’s agitation:
মুখ্যমন্ত্ৰী ড:হিমন্ত বিশ্ব শৰ্মা নেতৃত্বাধীন চৰকাৰখনৰ প্ৰতিবন্ধীসকলৰ প্ৰতি কিঞ্চিতমানো দয়া-মমতা নাই বুলি অভিযোগ উত্থাপন কৰি ন্যায্য প্ৰাপ্তিৰ দাবীৰে পুনৰ আন্দোলন গঢ়ি তোলাৰ হুংকাৰ প্ৰদান কৰিছে ৰাজ্যৰ প্ৰতিবন্ধী লোকসকলে ৷
প্ৰতিবন্ধী সুৰক্ষা সংস্থা অসমে প্ৰতিবন্ধীৰ সমস্যা সমাধানৰ বাবে এই চৰকাৰে তিলমানো গুৰুত্ব দিয়া নাই বুলি অভিযোগ তুলি সংস্থাৰ সাধাৰণ সম্পাদক নৃপেন মালাকাৰে কয় যে যি সময়ত প্ৰধানমন্ত্ৰী নৰেন্দ্ৰ মোদীয়ে শাৰীৰিকভাৱে সক্ষম লোকসকলক দিব্যাংগ বুলি অভিহিত কৰি দিব্যাংগ লোকক সকলোধৰণৰ সহায়-সহযোগিতা আগবঢ়াই আহিছে যদিও বাকী ৰাজ্যসমূহক বাদ দি অসমে এই সুবিধাসমূহৰ পৰা বঞ্চিত হৈ আহিছে ৷
মালাকাৰে কয়, ‘ দীনদয়াল দিব্যাংগ পেঞ্চন আঁচনিৰ জৰিয়তে প্ৰতিবন্ধীসকলক মাহেকত এহেজাৰ টকাকৈ দিয়াৰ ব্যৱস্থা আছিল যদিও মুখ্যমন্ত্ৰী ড॰ শৰ্মাই ইয়াক বন্ধ কৰি তথা বিগত বৰ্ষৰ পৰা অৰুণোদয়ৰ লগত ইয়াক একাকাৰ কৰি বহু দিব্যাংগ ব্যক্তিক বঞ্চিত কৰিলে ৷’ প্ৰতিবন্ধীৰ আন্দোলনৰ ফলশ্ৰুতিত সামাজিক ন্যায় আৰু সৱলীকৰণ বিভাগে ডিচেম্বৰত উচ্চস্তৰীয় সমিতিৰ বৈঠক অনুষ্ঠিত কৰি প্ৰতিবন্ধীসকলৰ সমস্যা সমাধান কৰা হ’ব বুলি যোৱা ৩০ নৱেম্বৰতে লিখিত প্ৰতিশ্ৰুতি দিছিল যদিও আজিকোপতি সেয়া হৈ নুঠাত মালাকাৰে ক্ষোভ প্ৰকাশ কৰি কয় যে মাহেকীয়া ভাত্তা, নিযুক্তিকে ধৰি প্ৰতিবন্ধী ব্যক্তিক চলাই অহা প্ৰৱঞ্চনাৰ বিৰুদ্ধে মাঘ বিহুৰ পাছৰে পৰা ৰাজ্যৰ প্ৰতিখন জিলা সদৰত পুনৰ প্ৰতিবাদী কাৰ্যসূচী গ্ৰহণ কৰা হ’ব ৷
ন্যায্যপ্ৰাপ্তিৰ দাবীৰে প্ৰতিবন্ধীসকলে আন্দোলন কৰিবলগীয়া হোৱাটো দুৰ্ভাগ্যজনক কথা বুলি তেওঁ মন্তব্য কৰি এই চৰকাৰে ৰাজ্যৰ প্ৰতিবন্ধী সকলক চূড়ান্তভাৱে প্ৰাপ্যৰ পৰা বঞ্চিত কৰি আহিছে বুলি অভিযোগ তোলে ৷