Secondary Education:
ৰাজ্যৰ উচ্চ শিক্ষা বিভাগে বিলুপ্তি কৰিলে নিম্ন আৰু উচ্চ প্রাথমিক বিদ্যালয়ৰ ৯৪৪টা শিক্ষকৰ পদ। ৰাজ্যৰ মাধ্যমিক শিক্ষা সঞ্চালকালয়ৰ অধীনৰ এই পদসমূহৰ অধিকাংশই দীর্ঘদিন খালী হৈ আছিল। বিগত সময়ছোৱাত চৰকাৰে এই পদবোৰ পূৰণৰ কোনো ব্যৱস্থা গ্রহণ নকৰিলে। লগতে বিদ্যালয় একত্ৰীকৰণৰ ফলতো কিছু সংখ্যক পদ খালী হয়।
উল্লেখ্য যে চৰকাৰৰ বিদ্যালয় একত্ৰীকৰণ নীতিৰ অধীনত ৰাজ্যৰ এক বৃহৎ সংখ্যক নিম্ন আৰু উচ্চ প্রাথমিক বিদ্যালয় মাধ্যমিক বিদ্যালয়ৰ লগত ইতিমধ্যে চামিল কৰা হৈছে। আগন্তুক দিনত আৰু অধিক সংখ্যক বিদ্যালয়ক এনে চামিলকৰণ প্ৰক্ৰিয়াত সামৰি লোৱা হ’ব। গতিকে সেই সময়ত আৰু অধিক পদ বিলুপ্তিকৰণৰ সম্ভাৱনা শিক্ষা বিভাগৰ উচ্চস্তৰীয় সূত্ৰই সদৰী কৰে।
ৰাজ্যৰ পদ বিলুপ্ত কৰা জিলাবোৰ হ’ল- বৰপেটা, বিশ্বনাথ, বঙাইগাঁও, কাছাৰ, দৰং, ধেমাজি, ধুবুৰী, ডিব্ৰুগড়, গোৱালপাৰা, গোলাঘাট, হাইলাকান্দি, হোজাই, যোৰহাট, কামৰূপ, কামৰূপ মহানগৰ, লখিমপুৰ, মাজুলী, মৰিগাঁও, নগাঁও, নলবাৰী, শিৱসাগৰ, শোণিতপুৰ, দক্ষিণ শালমাৰা-মানকাচৰ, শ্রীভূমি আৰু তিনিচুকীয়া। এই পদবোৰৰ অধিকাংশ আৰবী, হিন্দী, মণিপুৰী আৰু বিভিন্ন ঐচ্ছিক বিষয়ৰ শিক্ষক।
তদুপৰি ইয়াৰ মাজত প্রধান শিক্ষকৰ পদো আছে। শিক্ষা বিভাগৰ তথ্য অনুসৰি, এই বৃহৎ সংখ্যক পদ বিলুপ্ত কৰাৰ বিপৰীতে ৰাজ্যত স্থাপন কৰা ১১৮ খন চাহ বাগিচা আদর্শ বিদ্যালয়ত নতুন পদ সৃষ্টি কৰা হৈছে; কিন্তু চাহ বাগিচাৰ বাহিৰৰ অঞ্চলৰ শিক্ষানুষ্ঠানৰ পৰা ন শতাধিক পদ বিলুপ্তকৰণে ৰাজ্যৰ শিক্ষা বিভাগৰ দুৰ্বলতাকে স্পষ্ট কৰিছে। ন শতাধিক পদ বিলুপ্ত কৰাটো সাধাৰণ কথা নহয় বুলি চর্চা চলিছে।
অথচ ৰাজ্যত এনে বহু শিক্ষানুষ্ঠান আছে, য’ত বিষয় অনুসৰি শিক্ষক নাই। বিদ্যালয়বোৰে টানি-আঁজুৰিহে এনে পৰিস্থিতিত শ্রেণী চলাই থাকিবলগীয়া হৈছে। তেনে দুর্বলতা আঁতৰোৱাৰ পৰিৱৰ্তে বৃহৎ সংখ্যক শিক্ষকৰ পদেই বিলুপ্ত কৰে শিক্ষা বিভাগে।
