Himanta Viswa Sarma:
জৰুৰীকালীন অৱস্থাৰ ক’লা অধ্যায়ৰ ৫০ বছৰ উপলক্ষ্যে ভাৰতীয় জনতা যুৱ মৰ্চা আৰু মহিলা মৰ্চাৰ উদ্যোগত বুধবাৰে মহানগৰীৰ ভোগেশ্বৰী ফুকননী ইনডৰ ষ্টেডিয়ামত অনুষ্ঠিত মক পাৰ্লিয়ামেণ্ট’ শীৰ্ষক এক অনুষ্ঠান ৷
অনুষ্ঠানত অংশ লৈ মুখ্যমন্ত্ৰী ড:হিমন্ত বিশ্ব শৰ্মা কংগ্ৰেছৰ বিৰুদ্ধে সোচ্ছাৰ হৈ পৰে ৷ তেওঁৰ ভাষণত কয়, আজিৰ পৰা ৫০ বছৰ পূৰ্বে এই দিনটোতে ভাৰতীয় সংবিধানক নস্যাৎ কৰি গণতন্ত্ৰক হত্যা কৰাৰ এক ক’লা অধ্যায়ৰ সূচনা কৰিছিল ৷ গণতন্ত্ৰক সম্পূৰ্ণৰূপে ভৰিৰে মোহাৰি ১৯৭৫ চনৰ ২৫ জুন অৰ্থাৎ আজিৰ দিনটোতে তদানীন্তন প্ৰধানমন্ত্ৰী ইন্দিৰা গান্ধীয়ে জৰুৰীকালীন অৱস্থাৰ ঘোষণা কৰিছিল। সেই জৰুৰীকালীন অৱস্থাৰ ক’লা অধ্যায়ৰ ৫০ বছৰ সম্পূৰ্ণ হ’ল।
জৰুৰীকালীন অৱস্থাৰ সময়ত বাক স্বাধীনতা, সংবাদ মাধ্যমৰ মুক্ত প্ৰচাৰ বন্ধ কৰি ন্যায়পালিকা, কাৰ্যপালিকা সকলোকে ইন্দিৰা গান্ধীয়ে নিঃশেষ কৰিবলৈ উঠি পৰি লাগিছিল। ৭ হেজাৰোধিক সাংবাদিকক গ্ৰেপ্তাৰ, লক্ষাধিক লোকক কাৰাৰুদ্ধ, ৬.২ নিযুত দৰিদ্ৰ মানুহক বন্ধ্যাকৰণ আদি আছিল জৰুৰীকালীন সময়ৰ ভয়াৱহ উদাহৰণ।
গণতন্ত্ৰক হত্যা কৰা, সংবিধানক বৃদ্ধাংগুষ্ঠ দেখুওৱা কংগ্ৰেছ বাহিনী ভাৰতবৰ্ষত চিৰদিনলৈ গণতন্ত্ৰ আৰু সংবিধান বিৰোধী হিচাপেই চিহ্নিত হৈ থাকিব । ইন্দিৰা গান্ধী তথা কংগ্ৰেছ চৰকাৰৰ স্বেচ্ছাচাৰিতাৰ বিৰোধিতা কৰি নিজৰ সৰ্বোচ্চ বলিদান দিয়া প্ৰতিগৰাকী দেশপ্ৰেমিকক শ্ৰদ্ধাৰে স্মৰণ কৰিলোঁ ৷
মুখ্যমন্ত্ৰীয়ে আৰু কয়, যিসকলে সংবিধানক বুঢ়া আঙুলি দেখুৱাইছিল, সেইসকলেই আজি সংবিধান ৰক্ষাৰ প্ৰবচন আগবঢ়ায়৷ জৰুৰীকালীন সময়ৰ সেই ক’লা ইতিহাসক কোনেও পাহৰিব নোৱাৰে, ইতিহাসে মনত ৰাখিব সেই সময়ক ৷ ক্ষমতা লিপ্সাৰ বাবে কংগ্ৰেছ দলে গণতন্ত্রক বৃদ্ধাংগুষ্ঠ দেখুৱাই সংবিধানক হত্যা কৰিছিল | আনকি ৫০ বছৰৰ পাছতো জৰুৰীকালীন অৱস্থাৰ আঁৰৰ মানসিকতা কংগ্ৰেছত বিকশিত হৈ আছে আৰু ই সঘনাই সময়ে সময়ে পৰিলক্ষিত হৈ আহিছে ৷
অনুষ্ঠানত ৰাজ্যিক বিজেপিৰ সভাপতি দিলীপ শইকীয়া,মহিলা মৰ্চাৰ সভানেত্ৰী স্বপ্না বনিয়া,যুৱ মৰ্চাৰ ৰাজ্যিক সভাপতি ৰাজেশ দাস সহ বহু কেইগৰাকী বিশিষ্ট ব্যক্তি উপস্থিত থাকে ৷